ភ្នំពេញ៖ អាងហែលទឹកនៅពហុកីឡដ្ឋានជាតិអូឡាំពិក ត្រូវការជួសជុលធ្វើ ឱ្យប្រសើរឡើងតាមស្តង់ដារអន្តរជាតិ ដែលអាចឱ្យអត្តពលិកកម្ពុជាហ្វឹក​ហាត់​ត្រៀ​ម​ខ្លួនយក មេដៃជូនជាតិក្នុងព្រឹត្តិការណ៍កីឡាស៊ីហ្គេមដែលកម្ពុជានឹងធ្វើម្ចាស់ផ្ទះឆ្នាំ២០២៣ខាងមុខ។នេះបើតាមលោកទេសរដ្ឋមន្ត្រីស៊ុនចាន់ថុល រដ្ឋមន្ត្រី​ក្រ​សួងសាធារណការ និងដឹកជញ្ជូន និងជាប្រធាន សហព័ន្ធកីឡាហែលទឹកកម្ពុជា ថ្លែងក្នុងពិធីក្រុងពាលីជួសជុល និងសាងសង់ អាងហែលទឹកនៅពហុកីឡ​ដ្ឋានជាតិអូឡាំពិកកាលថ្ងៃទី២៦តុលា។ លោកទេសរដ្ឋមន្ត្រីបានបង្ហាញពីការខិតខំប្រឹងប្រែងក្នុងការ ស្វែងរកប្រភពថវិកាពីសប្បុរសជន និងក្រុមហ៊ុនឯកជននានា ដើម្បីកសាងអាងហែលទឹកឱ្យ​បាន​ច្រើន កន្លែងទៀត ក្នុងគោលបំណងដើម្បីអភិវឌ្ឍន៍វិស័យកីឡាហែលទឹកនៅកម្ពុជាឱ្យមានការរីកចម្រើន និង ស្វែងរកមេដៃជូនជាតិឱ្យបា​នច្រើនក្នុង​ព្រឹត្​តិ​ការ​ណ៍កីឡាស៊ីហ្គេមដែលកម្ពុជានឹងធ្វើម្ចាស់ផ្ទះឆ្នាំ២០២៣ ខាងមុខនេះ​។ លោកទេសរដ្ឋមន្រ្តីបញ្ជាក់ថា៖« ការថែទាំជួសជុលអាងហែលទឹកនេះ គម្រោងចំណាយរយៈពេលពី៧ទៅ៨ខែ ហើយកីឡាករ-កីឡាការិនីដែល​កំពុ​ងទទួ​លការ​​ហ្វឹកហាត់បច្ចុប្បន្នទាំង អស់ នឹងត្រូវទៅហ្វឹកហាត់នៅកន្លែងថ្មីជាបណ្តោះអាសន្នសិន រង់ចាំការជួសជុល និងសាងសង់បាន បញ្ចប់ជាស្ថាពរ»។ បើតាមក្រសួងសាធារណៈការកីឡាហែលទឹកឃើញមានការរីកចម្រើនគួរឱ្យកត់សម្គាល់នៅសម័យសង្គមរាស្ត្រនិយម តាមរយៈការបង្កើតឱ្យមានអាង​ហែល​ទឹ​​កសម្រាប់អត្តពលិកហ្វឹកហាត់ជាច្រើនកន្លែង ប៉ុន្តែជា អកុសល ក្រោមការដឹកនាំរបស់របបកម្ពុជាប្រជាធិបតេយ្យ (ខ្មែរក្រហម) និងសង្គ្រាមជាច្រើន ទស្សវ​ត្សរ៍កន្លងមក អាងហែលទឹកនៅក្នុងពហុកីឡដ្ឋានជាតិនេះ ត្រូវបានខូចខាតស្ទើរតែទាំងស្រុង។