ពិធីបើកសិក្ខាសាលាផ្សព្វផ្សាយ និងបណ្តុះបណ្តាល ស្តីពីគោលការណ៍ណែនាំក្របខ័ណ្ឌតាមដាន ត្រួតពិនិត្យ និងវាយតម្លៃសមិទ្ធកម្មផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន កំពត៖ នាថ្ងៃសុក្រ ទី៣១ ខែតុលា ឆ្នាំ២០២៥ ឯកឧត្តម សុន សុខកេង អនុរដ្ឋលេខាធិការ និងជាអនុប្រធានប្រចាំការនៃក្រុមការងារតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្រ ផែនការអភិវឌ្ឍន៍ និងគោលនយោបាយរបស់ក្រសួងសាធារណការ និងដឹកជញ្ជូន (ហៅកាត់ថា ក.យ.ផ.គ.សកដ) តំណាង លោកជំទាវ កុយ សុដានី រដ្ឋលេខាធិការប្រចាំការ និងជាប្រធានក្រុមការងារ បានអញ្ជើញជាអធិបតីភាពក្នុងពិធីបើកសិក្ខាសាលាផ្សព្វផ្សាយ និងបណ្តុះបណ្តាលស្តីពីគោលការណ៍ណែនាំក្របខ័ណ្ឌតាមដាន ត្រួតពិនិត្យ និងវាយតម្លៃសមិទ្ធកម្មផែនការសកម្មភាពអាទិភាពក្នុងវិស័យសាធារណការ និងដឹកជញ្ជូន (ហៅកាត់ថា ក្របខ័ណ្ឌ M&E-MPWT) ដោយមានការអញ្ជើញចូលរួមពី ឯកឧត្តមអគ្គនាយក លោក លោកស្រីជាថ្នាក់ដឹកនាំក្រសួង ប្រធានមន្ទីរសាធារណការ និងដឹកជញ្ជូនខេត្ត និងមន្រ្តីរាជការដែលជាមន្រ្តីបង្គោលមកពីអង្គភាពចំនួន១៧ ក្រោមឱវាទក្រសួង ក្នុងតំបន់៣។ សិក្ខាសាលានេះត្រូវបានរៀបចំឡើងស្របតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្តមរដ្ឋមន្រ្តី ក្នុងគោលបំណងធ្វើការផ្សព្វផ្សាយ និងបណ្តុះបណ្តាលជូនមន្រ្តីបង្គោលមកពីអង្គភាពក្រោមឱវាទក្រសួងនូវ ក្របខ័ណ្ឌ M&E-MPWT ដែលជាសមិទ្ធផលដ៏សំខាន់មួយទៀតរបស់ក្រសួងសាធារណការ និងដឹកជញ្ជូន សម្រាប់ឱ្យគ្រប់អង្គភាពចំណុះក្រសួងយកទៅអនុវត្តនាពេលខាងមុខឱ្យមានសង្គតិភាព ប្រសិទ្ធភាព ស័ក្តិសិទ្ធិភាព និងគណនេយ្យភាព ឆ្លើយតបទៅនឹងយុទ្ធសាស្រ្តបញ្ចកោណ ផែនការយុទ្ធសាស្រ្តអភិវឌ្ឍន៍ជាតិ ឬគោលនយោបាយ និងផែនការយុទ្ធសាស្រ្តអភិវឌ្ឍន៍វិស័យសាធារណការ និងដឹកជញ្ជូន ឱ្យទទួលបានជោគជ័យទាន់ពេលវេលា។ ក្នុងអង្គសិក្ខាសាលា ឯកឧត្តមអនុរដ្ឋលេខាធិការ បានគូសបញ្ជាក់ថា ក្របខ័ណ្ឌ M&E-MPWT ដែលបានធ្វើការផ្សព្វផ្សាយ និងបណ្តុះបណ្តាលជូនមន្រ្តីបង្គោលនាពេលនេះ ត្រូវបានរៀបចំឡើងដោយមានការពិគ្រោះយោបល់ផ្ទៃក្នុងជាមួយគ្រប់អង្គភាព និងតួអង្គពាក់ព័ន្ធជាច្រើនលើកច្រើនសារ ទាំងក្នុងកម្រិតបច្ចេកទេស និងក្នុងកម្រិតថ្នាក់ដឹកនាំ ដែលអាចចាត់ទុកជាការបោះជំហានលើមាគ៌ាដ៏ត្រឹមត្រូវថ្មីមួយទៀតរបស់ក្រសួងសាធារណការ និងដឹកជញ្ជូន ក្នុងកិច្ចខិតខំប្រឹងប្រែង ប្រកបដោយឆន្ទៈ និងការប្តេជ្ញាចិត្តខ្ពស់ក្នុងការចូលរួមអនុវត្តគោលនយោបាយរបស់រាជរដ្ឋាភិបាល ដោយឈរលើគោលការណ៍រួមគឺ ជវភាពនៃប្រព័ន្ធតួអង្គតែមួយ (រួមគិត រួមរៀបចំ រួមអនុវត្ត និងរួមទទួលខុសត្រូវ) ជាពិសេសក្របខ័ណ្ឌនេះគឺជាឧបករណ៍ដ៏ចាំបាច់សម្រាប់ជំរុញ និងវាស់វែងសមិទ្ធកម្មនៃការចូលរួមអនុវត្តគោលនយោបាយរបស់រាជរដ្ឋាភិបាល និងកំពុងចូលរួមយ៉ាងសំខាន់ក្នុងការធានានូវអភិបាលកិច្ច ដែលកំណត់នៅក្នុងវដ្ដនៃការរៀបចំគោលនយោបាយរបស់រាជរដ្ឋាភិបាល ស្របតាមអនុសាសន៍ដ៏ខ្ពង់ខ្ពស់របស់ សម្តេចធិបតីនាយករដ្ឋមន្រ្តី លើកឡើងថា “ធ្វើអ្វីក៏ដោយ បើគ្មានការតាមដានទេ គឺមិនជោគជ័យទេ”៕