ផ្លូវបេតុងមួយខ្សែឆ្លងកាត់ចំនួន៤ភូមិ ដែលរងការខូចខាតជង្ហុកតូច ធំ ពិការក្នុងការធ្វើដំណើរដល់ប្រជាពលរដ្ឋ ត្រូវបានអាជ្ញាធរខណ្ឌកំបូលបានចុះធ្វើការជួសជុលកែលម្អឡើងវិញ នៅព្រឹកថ្ងៃទី២៨ ខែតុលា ឆ្នាំ២០២៥នេះ។អាជ្ញាធរបានឱ្យដឹងថា ការចុះជួសជុលនេះ បន្ទាប់ពីមើលឃើញផ្លូវខាងលើរងការខូចខាតដោយជំនន់ទឹកភ្លៀងនារដូវវស្សា ធ្វើឲ្យពិបាកក្នុងការធ្វេីដំណេីររបស់ប្រជាពលរដ្ឋ និងមានការយកចិត្តទុកដាក់ពីលោក ឃឹម ស៊ុនសូដា អភិបាលនៃគណៈអភិបាលខណ្ឌកំបូល លោកបានដឹកនាំមន្ត្រីក្រោមឱវាទ ចុះធ្វើការជួសជុលលុបបំពេញដើម្បីមានបង្កភាពងាយស្រួលក្នុងការធ្វើដំណើររបស់ប្រជាពលរដ្ឋ និងចៀសវាងមានការគ្រោះថ្នាក់ត្រង់ប្រការណាមួយ។អាជ្ញាធរបានបន្តថា ផ្លូវដែលរងការខូចខាតខាងលើនេះ ចាប់ពីផ្លូវជាតិលេខ៤ រហូតទៅដល់វត្តតាភេម ដែលឆ្លងកាត់បួនភូមិ គឺភូមិផ្សារកំបូល ភូមិកំបូល ភូមិត្រពាំងទួល និងភូមិតាភេម ស្ថិតនៅក្នុងសង្កាត់កំបូល ខណ្ឌកំបូល។ ចំពោះផ្លូវដែលរងការខូចខាតផ្សេងៗទៀតអាជ្ញាធរនឹងបន្តជួលជុលជាបន្តបន្ទាប់៕