សិក្ខាសាលាផ្សព្វផ្សាយ "ផែនការសកម្មភាពបញ្ជ្រាបយេនឌ័រក្នុងវិស័យសាធារណការ និងដឹកជញ្ជូន ឆ្នាំ ២០២៦-២០២៨" និងពិធីបិទគម្រោង "លើកកម្ពស់ភាពជាអ្នកដឹកនាំរបស់ស្ត្រីក្នុងអភិបាលកិច្ចនៃវិស័យដឹកជញ្ជូនកម្ពុជា ដំណាក់កាលទី២" ទីស្ដីការក្រសួង៖ នាព្រឹកថ្ងៃអង្គារ ទី២១ ខែតុលា ឆ្នាំ២០២៥ លោកជំទាវ មឹន មាណវី រដ្ឋលេខាធិការ និងជាប្រធានគណៈកម្មការទទួលបន្ទុកយេនឌ័រ និងយន្តការគាំទ្រក្រសួងសាធារណការ និងដឹកជញ្ជូនតំណាងដ៏ខ្ពង់ខ្ពស់ឯកឧត្តមរដ្ឋមន្ត្រី បានអញ្ជើញជាអធិបតីភាពក្នុងសិក្ខាសាលាផ្សព្វផ្សាយ "ផែនការសកម្មភាពបញ្ជ្រាបយេនឌ័រក្នុងវិស័យសាធារណការ និងដឹកជញ្ជូនឆ្នាំ ២០២៦-២០២៨" និងពិធីបិទគម្រោង "លើកកម្ពស់ភាពជាអ្នកដឹកនាំរបស់ស្ត្រីក្នុងអភិបាលកិច្ចនៃវិស័យដឹកជញ្ជូនកម្ពុជា ដំណាក់កាលទី២" ដោយមានការអញ្ជើញចូលរួមពីតំណាងស្ថានទូតអូស្ត្រាលីប្រចាំប្រទេសកម្ពុជា ក្រុមប្រឹក្សាជាតិស្ត្រីកម្ពុជា មូលនិធិអាស៊ី និងឯកឧត្តម លោកជំទាវជាថ្នាក់ដឹកនាំក្រសួង និងមន្ត្រីរាជការក្រសួង សរុបប្រមាណ ១៥០រូប។ សិក្ខាសាលានេះត្រូវបានរៀបចំឡើងក្នុងគោលបំណងប្រកាសផ្សព្វផ្សាយ និងដាក់អោយអនុវត្តផែនការសកម្មភាពបញ្ជ្រាបយេនឌ័រក្នុងវិស័យសាធារណការ និងដឹកជញ្ជូនឆ្នាំ ២០២៦-២០២៨ ដោយមានការឯកភាពដ៏ខ្ពង់ខ្ពស់ពីឯកឧត្តមរដ្ឋមន្ត្រីក្រសួងសាធារណការ និងដឹកជញ្ជូន។ ទន្ទឹមនឹងនោះ លោកជំទាវគណៈអធិបតីក៏បានប្រកាសបិទគម្រោង "លើកកម្ពស់ភាពជាអ្នកដឹកនាំរបស់ស្ត្រីក្នុងអភិបាលកិច្ចនៃវិស័យដឹកជញ្ជូនកម្ពុជា" ដែលបានទទួលការគាំទ្រពីរដ្ឋាភិបាលអូស្ត្រាលី ក្នុងការផ្តល់ជំនួយផ្នែកបច្ចេកទេស និងថវិកា លើដំណើរការមួយចំនួនរួមមានៈ (ក). វគ្គបណ្តុះបណ្តាលភាពជាអ្នកដឹកនាំ (ខ). ជំរុញការបង្កើតក្រុមនារីតាមអង្គភាព (គ). ផ្តល់ប្រឹក្សាលើការធ្វើវឌ្ឍនភាពផែនការសកម្មភាពបញ្ជ្រាបយេនឌ័រ និង(ឃ). ផ្តួចផ្តើមឱ្យមានកម្មវិធីអ្នកដឹកនាំគម្រូដែលគាំទ្រសមភាពយេនឌ័រ៕