អាជ្ញាធរឃុំជ្រោយបន្ទាយ នាព្រឹកថ្ងៃទី១៦ ខែតុលា ឆ្នាំ២០២៥ នេះ បានបើកសំណើដាក់ឲ្យដេញថ្លៃគម្រោងសាងសង់ផ្លូវបេតុងអាមេ ចំនួន ២ ខ្សែ ដែលមានប្រវែងជាង ៤០៥ ម៉ែត្រ ទទឹង ៥ ម៉ែត្រ និង ៤ ម៉ែត្រកន្លះ កម្រាស់ ០.១៥ ម៉ែត្រ នៅក្នុងតម្លៃប៉ាន់ស្មាន ១៩៧៩៦៤២៣៦ រៀល។នៅក្នុងដំណើរការបើកសំណើដេញថ្លៃរបស់រដ្ឋបាលឃុំខាងលើនេះ គេសង្កេតឃើញមានការចូលរួមពីសំណាក់ក្រុមហ៊ុនជាច្រើនដែលបានចូលរួម ដោយឡែកក្រុមហ៊ុនដែលបានដាក់ប៊ីត ចូលទៅក្នុងប្រអប់ក្នុងការដេញថ្លៃប្រកួតប្រជែងលើគម្រោងមួយនេះគឺមានក្រុមហ៊ុន ចំនួន ៤ ក្រុមហ៊ុន។ចំពោះក្រុមហ៊ុនដែលដេញបានជោគជ័យ ក្នុងដំណើរការសាងសង់ផ្លូវបេតុងទាំងពីរខ្សែនោះបានទៅលើក្រុមហ៊ុន (វិថីខនស្ត្រាក់សិន) ក្នុងតម្លៃដេញបាន ១១៧.៤៥០.០០០ រៀល។លោក ប៉ិច ងន់ស្រ៊ឺ មេឃុំជ្រោយបន្ទាយបានឲ្យដឹងថា ប៉ុន្មានឆ្នាំចុងក្រោយនេះ នៅក្នុងមូលដ្ឋានឃុំជ្រោយបន្ទាយ គឺមានការសាងសង់ផ្លូវបេតុងជាបន្តបន្ទាប់ ដោយផ្ដោតសំខាន់លើតម្រូវការរបស់ប្រជាពលរដ្ឋ ដែលមានអាទិភាពជាងគេ និងទី២ គឺផ្ដោតទៅលើផ្លូវដែលសិស្សានុសិស្សមានការចាំបាច់ប្រើប្រាស់ ក្នុងការធ្វើដំណើរទៅសាលារៀន ដូច្នេះអាជ្ញាធរ ក៏សម្រេចសាងសង់ផ្លូវបេតុងចំនួន ២ ខ្សែ ដែលបានតភ្ជាប់ពីផ្លូវកៅស៊ូ ចូលទៅអនុវិទ្យាល័យ ជ្រោយបន្ទាយ។ លោកថា ប្រជាពលរដ្ឋដែលទទួលផលក្នុងការប្រើប្រាស់ផ្លូវ មានពីចំណុចទីមួយ ពួកគាត់អាចដឹកសិផលទំនិញសម្ភារៈអីផ្សេងៗ គឺមានភាពងាយស្រួលនៅក្នុងការដឹកជញ្ជូន ហើយសម្រាប់ប្រជាពលរដ្ឋដែលធ្វើដំណើរទៅទទួលសេវារដ្ឋបាលផ្សេងៗ នៅក្នុងមូលដ្ឋានក៏តម្រូវការជិះតាមផ្លូវនេះ អ្វីដែលសំខាន់ គឺសម្រាប់សិស្សានុសិស្សដែលធ្វើដំណើរទៅរៀន។ លោកមេឃុំ ក៏បានបញ្ជាក់ថា កន្លងទៅផ្លូវនេះនៅជាផ្លូវដីនៅឡើយ គឺមានផលលំបាកតិចតួចដោយសារប្រជាពលរដ្ឋដឹកកសិផលអីផ្សេងៗ ធ្វើឲ្យមានការខូចខាតពិបាកធ្វើដំណើរសម្រាប់សិស្សានុសិស្សដែលឆ្ពោះទៅសាលារៀន។ ដូច្នេះហើយ បានជាឆ្នាំនេះអាជ្ញាធរសម្រេចសាងសង់ផ្លូវបេតុងទាំង ២ ខ្សែនេះ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ ក៏ដូចជា សិស្សានុសិស្សធ្វើដំណើរទៅសាលារៀន គឺមានភាពងាយស្រួល។