ថ្នាក់ដឹកនាំក្រសួងចុះពិនិត្យគម្រោងសាងសង់ស្ពានឆ្លងកាត់ទន្លេមេគង្គ(ដីឥដ្ឋ-ថ្មគរ) ដើម្បីពន្លឿនការសាងសង់ឱ្យបានឆាប់រហ័ស កណ្ដាល៖ នាថ្ងៃពុធ ទី៨ ខែតុលា ឆ្នាំ២០២៥ ឯកឧត្តម ភី សុភាត់ អនុរដ្ឋលេខាធិការ តំណាងឯកឧត្តម សូរ វ៉ិចទ័រ រដ្ឋលេខាធិការ និងជានាយកគម្រោងសាងសង់ស្ពានឆ្លងកាត់មេគង្គ(ដីឥដ្ឋ-ថ្មគរ) ដឹកនាំសមាជិកគ្រប់គ្រងគម្រោង ចុះពិនិត្យគម្រោងសាងសង់ស្ពានមេគង្គដីឥដ្ឋ-ថ្មគរ ដោយមានការចូលរួមពីមន្ត្រីបច្ចេកទេស និងអាជ្ញាធរមូលដ្ឋានពាក់ព័ន្ធផ្សេងទៀត។ បេសកកម្មនេះ ធ្វើឡើងក្នុងគោលបំណងចំនួ៤ សំខាន់ៗរួមមាន៖ ១). វិធានការណ៍សុវត្ថិភាពនៅផ្នែកផ្លូវក្រវាត់ក្រុងទី៣ ដែលបិទបណ្ដោះអាសន្ន និងចំណុចប្រសព្វនៃផ្លូវ ១១៦ ២).ត្រួតពិនិត្យតំបន់សំណង់សសរគ្រឹះនៃស្ពានលើអាកាស ត្រង់ PK1+540 និងយល់ដឹងអំពីវឌ្ឍនភាពសំណង់ និងការតេស្តសាកល្បងលទ្ធភាពទ្រទ្រង់របស់សសរគ្រឹះ ៣).ត្រួតពិនិត្យរោងចក្រជួសជុលដែកខាងលិចទន្លេ និងពិនិត្យការប្រតិបត្តិការលុបច្រែះដែកដោយម៉ាស៊ីនឡេស៊ែរ និង ៤).ត្រួតពិនិត្យតំបន់សំណង់គ្រឹះសសរក្នុងទឹកនៅខាងលិចទន្លេ ដើម្បីយល់ដឹងអំពីបច្ចេកទេសសាងសង់សសរគ្រឹះ។ ឯកឧត្តម អនុរដ្ឋលេខាធិការ បានជំរុញឱ្យក្រុមការងារបច្ចេកទេស និងភាគីពាក់ព័ន្ធត្រូវសហការគ្នាឱ្យបានល្អ ដើម្បីពន្លឿន ការសាងសង់ស្ពានមេគង្គដីឥដ្ឋ-ថ្មគរ ឱ្យបានកាន់តែឆាប់រហ័សតាមការគ្រោងទុក ព្រមទាំងជួយសម្រួលដល់ការធ្វើដំណើររបស់បងប្អូនប្រជាពលរដ្ឋផងដែរ។ សូមជម្រាបជូនថា គម្រោងសាងសង់ស្ពានឆ្លងកាត់ទន្លេមេគង្គ(ដីឥដ្ឋ-ថ្មគរ) មានទីតាំងស្ថិតក្នុងខេត្តនៅក្នុងខេត្តកណ្តាល មានប្រវែងសរុប ១ ៦០០ ម៉ែត្រ និងទទឹង ២៦ម៉ែត្រ(៤គន្លងផ្លូវ)។ ផ្លូវតភ្ជាប់ក្បាលស្ពាន ប្រវែង ២ ១០០ ម៉ែត្រ ទទឹងផ្លូវ ២៦ ម៉ែត្រ ក្រាលបេតុងកៅស៊ូ(AC) និងសាងសង់ផ្លូវបង្វែរទិសចរាចរណ៍ ចំនួន៤ខ្សែ (គ្រោងនឹងបញ្ចប់ក្នុងឆ្នាំ២០២៨)ខាងមុខនេះ៕