ស្ពានមិត្តភាពកម្ពុជា-កូរ៉េ បានឈានដល់ដំណាក់កាលរៀបចំកិច្ចលទ្ធកម្ម ដើម្បីជ្រើសរើសក្រុមហ៊ុនម៉ៅការសាងសង់ ហើយដែលគ្រោងនឹងបើកការដ្ឋានសាងសង់នៅអំឡុងពេលឆមាសទី១ ឆ្នាំ២០២៦។ នេះបើតាមមន្រ្តីក្រសួងសាធារណការនិងដឹកជញ្ជូន លើកឡើងនៅក្នុងកិច្ចប្រជុំពិនិត្យលទ្ធភាពបម្រុងទីតាំងសម្រាប់ដំឡើងប្រព័ន្ធបំពង់មេនាំទឹកស្អាតតាមបណ្តោយស្ពាន ក្នុងគម្រោងសាងសង់ស្ពានមិត្តភាពកម្ពុជា-កូរ៉េ។ស្ពាងឆ្លងទន្លេមេគង្គ (មិត្តភាពកម្ពុជា-កូរ៉េ) ដែលតភ្ជាប់ពីផ្សាររាត្រីទៅក្រុងអរិយក្សត្រស្ថិតនៅក្នុងគម្រោងសិក្សាជាច្រើនឆ្នាំ ហើយបើតាមប្រភពពីមន្រ្តីក្រសួងសាធារណការ និងដឹកជញ្ជូន នឹងឈានទៅបើកការដ្ឋានសាងសង់នៅអំឡុងឆមាសទីមួយឆ្នាំ ២០២៦។ ស្ពានមិត្តភាពកម្ពុជា-កូរ៉េ ទទួលបានហិរញ្ញប្បទានពីធនាគាអាហរ័ណ-នីហរ័ណ នៃសាធារណរដ្ឋកូរ៉េ។ ស្ពាននេះសាងសង់ឡើងជាប្រភេទស្ពានខ្សែកាបមានចំនួន ២ ស្ពាន ដែលសាងសង់ឆ្លងទន្លេសាបប្រវែង ១ ០៧០ ម៉ែត្រ និងឆ្លងទន្លេមេគង្គប្រវែង ១ ២៦២ ម៉ែត្រ ជាមួយទទឹងស្ពានប្រវែង ២៦,៥ ម៉ែត្រ។ ក្រៅពីស្ពាន ក៏មានការសាងសង់ផ្លូវតភ្ជាប់ប្រវែង ១១៧៤.៩ ម៉ែត្រ ដែលគ្រោងចំណាយថវិកាសាងសង់សរុបប្រមាណ ២៤០ លានដុល្លារអាមេរិក។ក្រៅពីលើកឡើងពីគម្រោងសាងសង់ស្ពាន កាលពីម្សិលមិញនេះមន្រ្តីក្រសួងសាធារណការនិងដឹកជញ្ជូនក្រោមវត្តមានលោក ស៊ឹង សុគង់ អនុរដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំដើម្បីពិនិត្យលើលទ្ធភាពបម្រុងទីតាំង សម្រាប់ដំឡើងប្រព័ន្ធបំពង់មេនាំទឹកស្អាតតាមបណ្តោយស្ពាន ក្នុងគម្រោងសាងសង់ស្ពានមិត្តភាពកម្ពុជា-កូរ៉េ ដោយមានការចូលរួមពីសំណាក់សមាជិកអង្គភាពគ្រប់គ្រងគម្រោង (PMU) មន្ត្រីជំនាញនៃរដ្ឋាករទឹកស្វយ័តក្រុងភ្នំពេញ និងក្រុមហ៊ុនទីប្រឹក្សាបច្ចេកទេស Yooshin Joint Venture (YSJV)។ កិច្ចប្រជុំនេះរៀបចំឡើងក្នុងគោលបំណងដើម្បីពិនិត្យ និងពិភាក្សាលើលទ្ធផលនៃការធ្វើពិសោធន៍ Wind Tunnel របស់ទីប្រឹក្សាបច្ចេកទេស ឆ្លើយតបទៅនឹងការស្នើសុំបញ្ចូលទីតាំងបម្រុងដាក់ប្រព័ន្ធបំពង់មេនាំទឹកស្អាតតាមបណ្តោយស្ពានរបស់រដ្ឋាករទឹកស្វយ័តក្រុងភ្នំពេញ សម្រាប់បម្រុងទុកដើម្បីផ្គត់ផ្គង់ទឹកស្អាតពីតំបន់អរិយក្សត្រមករាជធានីភ្នំពេញ៕