កិច្ចប្រជុំផ្សព្វផ្សាយអំពីគម្រោងអភិវឌ្ឍន៍ហេដ្ឋារចនាសម្ព័នទីក្រុង លើការរៀបចំគ្រប់គ្រងប្រព័ន្ធទឹកកខ្វក់ ប្រព័ន្ធការពារទឹកជំនន់ និងការរៀបចំទីលានចាក់សំរាម ក្នុងខេត្តព្រៃវែង ព្រៃវែង៖ ថ្ងៃទី១៨ ខែកញ្ញា ឆ្នាំ២០២៥ ឯកឧត្តម ហេង ណន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងអភិវឌ្ឍន៍ហេដ្ឋារចនាសម្ព័នទីក្រុង ក្រោមក្របខណ្ឌហិរញ្ញប្បទានពីធនាគារវិនិយោគហេដ្ឋារចនាសម្ព័នអាស៊ី (AIIB) បានដឹកនាំកិច្ចប្រជុំ និងចុះពិនិត្យស្ថានភាពទីតាំងគម្រោងក្នុងក្រុងព្រៃវែង ខេត្តព្រៃវែង ដោយមានការចូលរួមពីឯកឧត្តម សាយ សុជាតិ អភិបាលរងនៃគណៈអភិបាលខេត្តព្រៃវែង លោក និងលោកស្រី តំណាងមន្ទីរពាក់ព័ន្ធនានា។ គោលបំណងនៃកិច្ចប្រជុំនេះគឺដើម្បី គឺផ្សព្វផ្សាយអំពីគម្រោងអភិវឌ្ឍន៍ហេដ្ឋារចនាសម្ព័នទីក្រុង ដែលផ្តោតសំខាន់លើការរៀបចំគ្រប់គ្រងប្រព័ន្ធទឹកកខ្វក់ប្រព័ន្ធការពារទឹកជំនន់ និងការរៀបចំទីលានចាក់សំរាមក្នុងទីក្រុង និងបង្ហាញពីប្រភេទហេដ្ឋារចនាសម្ព័ន្ធអទិភាពដែលត្រូវគាំទ្រ ព្រមទាំងស្នើសុំកិច្ចសហការពីរដ្ឋបាលខេត្ត ពេលអនុវត្ត។ ជាលទ្ធផល ឯកឧត្តមអភិបាលរង បានសម្តែងក្តីរីករាយនិងអរគុណ ឯកឧត្តមរដ្ឋលេខាធិការ ក្រសួងសាធារណៈការ និងដឹកជញ្ជូន ដែលបានជ្រើសរើសខេត្តព្រៃវែង ជាខេត្តគោលដៅមួយក្នុងចំនួនខេត្តផ្សេងទៀត ដែលធ្វើអោយខេត្តមានឱកាសទទួលបាននូវសមិទ្ធផល ដែលកំពុងមានតម្រូវការដ៏ចាំបាច់នេះ បម្រើជូនដល់ប្រជាពលរដ្ឋក្នុងមូលដ្ឋាន។ ឯកឧត្តមបានបង្ហាញអំពីការត្រៀមលក្ខណរួចរាល់ជាមួយភាគីពាក់ព័ន្ធក្នុងការចូលរួម កិច្ចសហការសម្របសម្រួលអនុវត្តគម្រោង៕