កិច្ចប្រជុំគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដើម្បីពង្រឹងការអនុវត្តការងារឱ្យកាន់តែមានប្រសិទ្ធភាព ទីស្ដីការក្រសួង៖ នាព្រឹកថ្ងៃព្រហស្បតិ៍ ទី១៧ ខែកញ្ញា ឆ្នាំ២០២៥ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានអញ្ជើញដឹកនាំកិច្ចប្រជុំដើម្បីពង្រឹងការអនុវត្តការងារត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការទទួលបន្ទុក ប្រធានលេខាធិការដ្ឋាន អនុប្រធានក្រុមជញ្ជីងចល័ត អនុប្រធាន សមាជិក សមាជិកាលេខាធិការដ្ឋាន មន្រ្តីជញ្ជីងចល័ត ប្រធាន និងអនុប្រធានស្ថានីយជញ្ជីងអចល័តទូទាំងប្រទេស និងមន្ត្រីពាក់ព័ន្ធជាច្រើនរូបផងដែរ។ កិច្ចប្រជុំនេះ រៀបចំឡើងក្នុងគោលបំណងដើម្បីពិនិត្យលើការងារដែលកំពុងអនុវត្តតាមរយៈការពង្រឹងតួនាទី ភារកិច្ច និងការទទួលខុសត្រូវឱ្យបានត្រឹមត្រូវ ព្រមទាំងស្វែងរកដំណោះស្រាយរួមគ្នា ពីបញ្ហាប្រឈមនានា ជាមួយវិស័យឯកជន សំដៅធ្វើយ៉ាងណាឱ្យការអនុវត្តការងារ និងត្រួតពិនិត្យយានយន្តនៅតាមស្ថានីយជញ្ជីងនីមួយៗប្រព្រឹត្តទៅដោយអនុលោមតាមច្បាប់ និងលិខិតបទដ្ឋានគតិយុត្តដោយម៉ឺងម៉ាត់។ ឯកឧត្តមប្រធានអង្គប្រជុំ បានកោតសរសើរ និងបានផ្តល់អនុសាសន៍ណែនាំដល់មន្រ្តីនៅក្នុងស្ថានីយត្រូវពង្រឹងសាមគ្គីភាពក្នុងស្ថានីយ គោរពវិន័យ ត្រូវពង្រឹង និងត្រូវរៀបចំសកម្មភាពចុះត្រួតពិនិត្យយានយន្តដឹកជញ្ជូនលេីសទម្ងន់កម្រិតកំណត់នៅក្នុងដែនសមត្ថកិច្ចរបស់ខ្លួន ហើយត្រូវរាយការណ៍មកថ្នាក់ដឹកនាំ ដើម្បីចាត់វិធានការបន្ទាន់ និងត្រូវសហការឱ្យបានល្អជាមួយក្រុមការងារក្រសួង និងគ្រប់ភាគីពាក់ព័ន្ធទាំងអស់។ ទន្ទឹមនឹងការអនុវត្តវិធានការច្បាប់ ក៏ត្រូវចុះអប់រំផ្សព្វផ្សាយដល់អាជីវករ និងម្ចាស់អាជីវកម្មនានាពាក់ព័ន្ធនឹងការដឹកជញ្ជូន ឱ្យមានការយល់ដឹងអំពីច្បាប់ និងលិខិតបទដ្ឋានគតិយុត្តនានាកាន់តែទំលំទូលាយបន្ថែមទៀត។