សិក្ខាសាលាពិគ្រោះយោបល់លើសេចក្ដីព្រាង ស្ដីពីផែនការយុទ្ធសាស្ដ្របញ្ជ្រាបយេនឌ័រ ក្នុងវិស័យសាធារណការ និងដឹកជញ្ជូន ឆ្នាំ២០២៦-២០២៨ ទីស្តីការក្រសួង៖ ថ្ងៃអង្គារ ទី១៦ ខែកញ្ញា ឆ្នាំ២០២៥ លោកជំទាវ មឹន មាណវី រដ្ឋលេខាធិការ និងជាប្រធានគណៈកម្មការទទួលបន្ទុកយេនឌ័រ និងយន្តការគាំទ្រ នៃក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងសិក្ខាសាលាពិគ្រោះយោបល់លើសេចក្ដីព្រាង ស្ដីពីផែនការយុទ្ធសាស្ដ្របញ្ជ្រាបយេនឌ័រ ក្នុងវិស័យសាធារណការ និងដឹកជញ្ជូន ឆ្នាំ២០២៦-២០២៨ រៀបចំដោយគណ:កម្មការទទួលបន្ទុកយេនឌ័រ និងយន្តការគាំទ្រ ព្រមទាំងសហការរៀបចំដោយគម្រោង P4I និងមានការចូលរួមពីសមាជិក សមាជិកាគណ:កម្មការទទួលបន្ទុកយេនឌ័រ និងយន្តការគាំទ្រថ្នាក់ក្រសួង និងរាធានី-ខេត្ត។ តាមរយៈការអនុវត្តគម្រោង“ការលើកកម្ពស់ភាពជាអ្នកដឹកនាំរបស់ស្ត្រី ក្នុងវិស័យដឹកជញ្ជូន នៅកម្ពុជា” ដំណាក់កាលទី១” ទទួលបានជោគជ័យ និងវគ្គបណ្តុះបណ្តាល ស្តីពីការប្រឹក្សាណែនាំសម្រាប់ស្ត្រីកម្ពុជា ដែលបានសម្រេចនូវផែនការសកម្មភាពចំនួន ៥ ដែលការរៀបចំបង្កើតផែនការយុទ្ធសាស្រ្តបញ្ជ្រាបយេនឌ័រឆ្នាំ២០២៦-២០២៨ ក្នុងវិស័យសាធារណការ និងដឹកជញ្ជូន ជាសកម្មភាព១ ក្នុងចំណោមសកម្មភាពទាំង ៥ នៅក្នុងការលើកកម្ពស់ភាពជាអ្នកដឹកនាំរបស់ស្ត្រីក្នុងអភិបាលកិច្ចនៃវិស័យដឹកជញ្ជូនកម្ពុជា ដំណាក់កាលទី២។ លទ្ធផលនៃសេចក្តីព្រាងផែនការយុទ្ធសាស្រ្តបញ្ជ្រាបយេនឌ័រក្នុងវិស័យសាធារណការ និងដឹកជញ្ជូន ឆ្នាំ២០២៦-២០២៨ ទទួលបានតាមរយៈលទ្ធផលកិច្ចប្រជុំពីរចំនួនលើក (កាលពីថ្ងៃទី១៥ ខែកក្កដា និងថ្ងៃទី០៦ ខែសីហា ឆ្នាំ២០២៥ កន្លងមកនេះ) ដោយការបង្ហាញពីក្របខ័ណ្ឌផែនការ ឧបករណ៍ប្រមូលទិន្នន័យ និងលទ្ធផលសំខាន់ៗដែលទទួលបានពីការពិគ្រោះយោបល់របស់គ្រូណែនាំពីប្រទេសអូស្ត្រាលី។ លទ្ធផលនៃសេចក្តីព្រាងផែនការនេះ ទទួលបានធាតុចូលតាមរយៈការធ្វើការអង្កេតពីថ្នាក់ជាតិ និងថ្នាក់ក្រោមជាតិ ដោយមានអ្នកចូលរួមឆ្លើយសរុបចំនួន ៦៦៨ នាក់ (ថ្នាក់ជាតិចំនួន ២៨១ និងថ្នាក់ក្រោមជាតិ ៣៨៧)។ សូមបញ្ជាក់ជូនថា សិក្ខាសាលាពិគ្រោះយោបល់នេះ មានការធ្វើបទបង្ហាញអំពីសេចក្តីព្រាងផែនការយុទ្ធសាស្ត្រនេះជូនដល់អ្នកចូលរួមឱ្យបានទូលំទូលាយជាងមុន ក៏ដូចជាប្រមូលមតិកែលម្អ ដើម្បីបញ្ចប់ឯកសារនេះជាស្ថាពរ៕