ចុះពិនិត្យស្ថានភាពចរាចរណ៍យានយន្តដឹកជញ្ជូនលើសទម្ងន់កម្រិតកំណត់នៅលើផ្លូវជាតិលេខ៨ លេខ៣៨២ និងលេខ៧០បេ ក្នុងភូមិសាស្រ្តខេត្តកណ្តាល កណ្តាល ៖ នាថ្ងៃព្រហស្បតិ៍ ទី១១ ខែកញ្ញា ឆ្នាំ២០២៥ ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ អមដំណើរដោយ ឯកឧត្តមអនុរដ្ឋលេខាធិការ លោកប្រធានលេខាធិការដ្ឋាននៃគណៈកម្មាធិការសម្របសម្រួលអចិន្រ្តៃយ៍ និងមានការចូលរួមពីលោកអនុប្រធានមន្ទីរសាធារណការ និងដឹកជញ្ជូនខេត្តកណ្តាល និងខេត្តព្រៃវែង លោក ហែម ច័ន្ទរះ អភិបាលរងស្រុកល្វាឯម អាជ្ញាធរភូមិ ឃុំ និងមន្រ្តីពាក់ព័ន្ធជាច្រើនរូបទៀត បានចុះពិនិត្យអំពីស្ថានភាព ចរាចរណ៍យានយន្តដឹកជញ្ជូនធុនធ្ងន់នៅលើកំណាត់ផ្លូវជាតិលេខ៨ លេខ៣៨២ និងលេខ៧០បេ ក្នុងភូមិសាស្រ្តខេត្តកណ្តាល។ តាមការពិនិត្យជាក់ស្តែង ឃើញថាកំណាត់ផ្លូវជាតិលេខ៣៨២ និងលេខ៧០បេ និងស្ពានមួយចំនួន បានរងនូវការខូចខាត ដោយសារមានរថយន្តធុនធ្ងន់មួយចំនួនបានបើកបរចុះពីផ្លូវជាតិលេខ៨ តាមផ្លូវជាតិលេខ៣៨២ និងលេខ៧០បេ ចេញទៅច្រកកោះរការ ខេត្តព្រៃវែង។ ចំពោះមុខបញ្ហា និងដំណោះស្រាយ ឯកឧត្តមប្រធាន បានណែនាំដល់ប្រធានស្ថានីយជញ្ជីងអចល័ត ព្រៃព្នៅ ស្ថានីយជញ្ជីងអចល័ត អ្នកលឿង ខេត្តព្រៃវែង និងប្រធានស្ថានីយជញ្ជីងអចល័ត កំពង់ភ្នំ ខេត្តកណ្តាល ត្រូវដាក់កម្លាំងមន្រ្តីចុះល្បាតជាប្រចាំ ដើម្បីត្រួតពិនិត្យ និងទប់ស្កាត់យានយន្តដឹកជញ្ជូនលើសទម្ងន់ ដែលចរាចរណ៍នៅតាមផ្លូវជាតិខាងលើ និងបានស្នើដល់មន្ទីរសាធារណការ និងដឹកជញ្ជូនខេត្តកណ្តាល ឱ្យជំរុញការងារសាងសង់ស្ថានីយជញ្ជីងអចល័ត នៅលើផ្លូវជាតិលេខ៨ ត្រង់ចំណុចចន្លោះគ.មលេខ៣០+៥៩០ដល់គ.មលេខ៣១+៣៧០ ក្នុងឃុំព្រែកតាមាក់ ស្រុកខ្សាច់កណ្តាល ខេត្តកណ្តាល ឱ្យបានលឿនផងដែរ៕