(ភ្នំពេញ)៖ មន្ទីរពិសោធន៍ជាតិសំណង់នៃក្រសួងរៀបចំដែនដី នគរូបនីយកម្ម និងសំណង់ និងមន្ទីរពិសោធន៍សំណង់ និងសាធារណការ នៃក្រសួងសាធារណការ និងដឹកជញ្ជូន បានរួមសហការគ្នាក្នុងការពង្រឹងលើវិស័យសំណង់ ដើម្បីធានាបាននូវគុណភាព សុវត្ថិភាព និងសោភណភាពសំណង់ ជាឧត្តមប្រយោជន៍ប្រជាជនកម្ពុជា ។ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ និងថ្នាក់ដឹកនាំក្រសួងសាធារណការ និងដឹកជញ្ជូន សង្ឃឹមថា តាមរយៈកិច្ចសហប្រតិបត្តិការនាពេលនេះ នឹងជួយឱ្យមន្ទីរពិសោធន៍សំណង់នៃក្រសួងទាំងពីរ កាន់តែត្រូវបានពង្រឹងស្តង់ដារ គុណភាព សុវត្ថិភាព សោភណភាព និងមានការកំណត់សម្ភារៈបរិក្ខារសំណង់ ឱ្យបានច្បាស់លាស់លើសំណង់ហេដ្ឋារចនាសម្ព័ន្ធផ្សេងៗទាំងអស់បន្ថែមទៀត ដើម្បីបង្កើនជំនឿទុកចិត្តដល់មហាជនទូទៅអាចទទួលយកបាន ។ ក្នុងពិធីចុះអនុស្សរណៈនៃការយោគយល់គ្នារវាងមន្ទីរពិសោធន៍ជាតិសំណង់ នៃក្រសួងរៀបចំដែនដី នគរូបនីយកម្ម និងសំណង់ និងមន្ទីរពិសោធន៍សំណង់ និងសាធារណការនៃក្រសួងសាធារណការនិងដឹកជញ្ជូន ដែលបានធ្វើឡើងនារសៀលថ្ងៃទី២៤ ខែសីហា ឆ្នាំ២០២៥ ឯកឧត្តមឧបនាយករដ្ឋមន្ត្រី សាយ សំអាល់ បានមានប្រសាសន៍បញ្ជាក់ថា ការចុះអនុស្សារណៈយោគយល់គ្នានាពេលនេះ គឺពិតជាមានសារៈសំខាន់សម្រាប់មន្ទីរពិសោធន៍ជាតិសំណង់ នៃក្រសួងរៀបចំដែនដី នគរូបនីយកម្ម និងសំណង់ និងមន្ទីរពិសោធន៍សំណង់ និងសាធារណការ នៃក្រសួងសាធារណការ និងដឹកជញ្ជូន ដែលការងារនេះទាក់ទិនទៅនឹងយុទ្ធសាស្ត្ររួមរបស់ក្រសួង ដែលបានដាក់ចេញគឺការពូនជ្រុំរដ្ឋបាលសាធារណៈទំនើប ឆ្លាតវៃ និងវាងវៃ ក្នុងនោះគឺការធ្វើសមាហរណកម្មឱ្យត្រូវគ្នារវាងស្ថាប័នរដ្ឋ និងស្ថាប័នពាក់ព័ន្ធ ។ ឯកឧត្តមឧបនាយករដ្ឋមន្ត្រី សាយ សំអាល់ បានចាត់ទុកការចុះអនុស្សរណៈយោគយល់គ្នានាពេលនេះ ថាជាការដកនូវរបាំងការងារមួយដ៏ធំរវាងក្រសួងទាំងពីរ ដោយជំនួសមកវិញនូវរបៀបរបបការងាររួម ដោយស្ថាប័ននីមួយៗទទួលខុសត្រូវរៀងៗខ្លួន ប៉ុន្តែវាធ្វើឱ្យកាន់តែមានភាពងាយស្រួលជាងមុនដល់អតិថិជនរបស់ខ្លួន ។ ជាមួយនេះក្រសួងទាំងពីរនឹងកំណត់ស្តង់ដារួមពីសំណង់សាធារណៈ និងសំណង់ស៊ីវិល និងឈានទៅកសាងលិខិតបទដ្ឋានគតិយុត្តិរួម ដើម្បីធានាគុណភាព សុវត្ថិភាព និងសោភ័ណភាពសំណង់ ជាឧត្តមប្រយោជន៍ប្រជាជនកម្ពុជា ។ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា កន្លងមកមន្ទីរពិសោធន៍សំណង់ និងសាធារណការ បានខិតខំធ្វើយ៉ាងណាដើម្បីស្ថាបនាផ្លូវឱ្យមានស្តង់ដារគុណភាព និងមានការទទួលស្គាល់ពីស្ថាប័ន និងវិស័យឯកជន ។ តាមរយៈកិច្ចសហប្រតិបត្តិការនាពេលនេះ ឯកឧត្តមរដ្ឋមន្រ្តីសង្ឃឹមថា ពិតជានឹងជួយឱ្យមន្ទីរពិសោធន៍សំណង់នៃក្រសួងទាំងពីរ កាន់តែត្រូវបានពង្រឹងស្តង់ដារ គុណភាព សុវត្ថិភាព សោភណភាព និងមានការកំណត់សម្ភារៈបរិក្ខារសំណង់ ឱ្យបានច្បាស់លាស់លើសំណង់ហេដ្ឋារចនាសម្ព័ន្ធផ្សេងៗទាំងអស់បន្ថែមទៀត ដើម្បីបង្កើនជំនឿទុកចិត្តដល់មហាជនទូទៅអាចទទួលយកបាន ៕