បាត់ដំបង ៖ មន្ទីរមន្ទីរសាធារណ និងដឹកជញ្ជូនខេត្ត បានឱ្យដឹងថា គម្រោងជួសជុលផ្លូវក្នុងបាត់ដំបងប៉ែកខាងលិចស្ទឹង សម្រេចបាន៦០ភាគរយហើយ នៅសល់៤០ភាគរយទៀត កំពុងជួសជុលឡើងវិញ ដូចជាផ្លូវលេខ៣ និងតំបន់ផ្ទះបុរាណ ត្រូវចាក់កៅស៊ូ AC និងជួសជុលកែលម្អឱ្យមានចិញ្ចើមផ្លូវនិងផ្លូវថ្មើរជើងបន្ថែមជាដើម ។ លោកស្រី កឹម សុគន្ធារី អនុប្រធានមន្ទីរសាធារណការនិងដឹកជញ្ជូនខេត្តបាត់ដំបងបញ្ជាក់ថា បច្ចុប្បន្ននេះគម្រោងផ្លូវ ប្រវែងជាង២០គីឡូម៉ែត្រ បានជីកដើម្បីដាក់ប្រពន្ធលូក្នុងក្រុងបាត់ដំបង។ ក្នុងនោះ គម្រោងបានជួសជុលផ្លូវក្នុងក្រុង បាន៦០ភាគរយហើយ( បញ្ចប់ក្នុងគម្រោង) ស្ថិតនៅត្រើយខាងលិចស្ទឹងសង្កែ នៅសល់ប្រហែល៤០ភាគរយទៀត ក្រសួងសេដ្ឋកិច្ចនិងហិរញ្ញវត្ថុបាននិងកំពុងសម្រួល ឯកសារក្នុងការដេញថ្លៃរួចពេលណាគឺគេចាប់ផ្ដើមធ្វើអនុវត្តធ្វើតែម្ដង ។ លោកស្រី អនុប្រធានមន្ទីរសាធារណការ បានបញ្ជាក់ក្នុងកម្មវិធីសន្ទនាមតិវិទ្យុជាតិចម្ការចេក នាថ្ងៃទី១៥ខែសីហា២០២៥ បន្ថែមថា សម្រាប់ផ្លូវដែលសល់៤០ភាគរយស្មើនិង១១គីឡូម៉ែត្រទៀត ស្ថិតនៅគម្រោងថ្មីមួយទៀត ក្នុងការជួសជុលកែលម្អឡើងវិញ ដោយរក្សាផ្លូវដើម ផ្លូវពីមុនយ៉ាងម៉េច ត្រូវធ្វើផ្លូវនោះឡើងវិញដូចពីមុន។ អ្នកស្រីបន្តថា បើជាប្រភេទផ្លូវកៅស៊ូ DBST ផ្លូវបេតុង ឬផ្លូវAC ក្រុមហ៊ុនត្រូវធ្វើ ប្រភេទទាំងនោះឡើងវិញ ។ ប៉ុន្ដែគម្រោងកញ្ចប់ក្រោយនេះ មិនត្រឹមតែជួសជុលប៉ុណ្ណោះទេ ថែមទាំងកែលម្អនៅផ្លូវមួយចំនួនទៀតដូចជានៅផ្លូវលេខបីនិងតំបន់ផ្ទះបុរាណ ដែលគម្រោងត្រូវចាក់កៅស៊ូ AC កែលម្អប្រព័ន្ធស្រូបទឹកក្នុងលូ រៀបចំឱ្យមានចិញ្ចើមផ្លូវនិងផ្លូវសម្រាប់ថ្មើរជើង ដើម្បីឱ្យកាន់តែមានភាពទាក់ទាញសម្រាប់ភ្ញៀវទេសចរជាតិ-អន្តរជាតិអាចដើរទស្សនា។ ដូច្នេះហើយ គម្រោងកញ្ចប់ថ្មីខាងមុខនេះ ត្រូវធ្វើផ្លូវនិងប្ដូរពីផ្លូវ DBST មកជាប្រភេទផ្លូវកៅស៊ូAC ទាំងអស់នៅតំបន់នោះ ដែលត្រូវការថវិកាច្រើនទៀត ក្នុងជួសជុលកែលម្អ ។ លោកស្រី កឹម សុគន្ធារីបានបន្ថែមថា ចំពោះបញ្ហាផ្លូវនេះដែលមានជង្ហុក សំបុកមាន់ឬ ដីហុយនោះ មន្រ្ដីគម្រោងមិនព្រងើយកន្ដើយនោះឡើយ បច្ចុប្បន្នគម្រោងបានធ្វើការជួសជុលផ្លូវបណ្ដើរៗដូចជា ផ្លូវនៅខាងផ្សារបឹងឈូក និងផ្លូវលេខ២កន្លះត្រូវបានជួសជុលធ្វើជាបន្ដបន្ទាប់ផងដែរ ។ ទាក់ទងបញ្ហាផ្លូវក្នុងក្រុងនេះដែរ លោក សុង ស៊ើង ប្រធានការិយាល័យសាធារណការក្រុងបាត់ដំបងបានថ្លែងឱ្យដឹងថាក្រុងបាត់ដំបងមានសង្កាត់ចំនួន៦ដែលស្ថិតក្នុងទីប្រជុំជន ដែលមានផ្លូវ១៧៦ខ្សែ ក្នុងផ្លូវទាំងអស់នោះមានផ្លូវខ្លះស្ថិតនៅក្នុងគម្រោងជួសជុលនិងកែលម្អផ្លូវ និងផ្លូវមួយចំនួនទៀតនៅក្រៅគម្រោងខ្លះ។ ចំពោះក្រុងបាត់ដំបងមានថវិកាតិចតួច ក្នុងការជួសជុលផ្លូវក្រៅគម្រោងដូចជាផ្លូវនៅ សង្កាត់ទូលតាឯក មុខសាលាអូរតាគាំ២ផ្លូវចូលទៅសឹករង និងផ្លូវមួយចំនួននៅសង្កាត់ស្វាយប៉ោជាដើម ។ លោកបានបន្ថែមថាសម្រាប់ក្រុងបាត់ដំបងមានសង្កាត់៤ គឺ សង្កាត់ព្រែកព្រះសម្ដេច សង្កាត់រតនៈ សង្កាត់ស្វាយប៉ោ និង សង្កាត់ចំការសំរោង (មានពីរភូមិ ) ដែលស្ថិតនៅក្នុងគម្រោងអភិវឌ្ឍប្រពន្ធលូរំដោះទឹកកខ្វក់និងការជួសជុលកែលម្អផ្លូវក្នុងក្រុងផងដែរ។ លោក សុង ស៊ើង ប្រធានការិយាល័យសាធារណការក្រុងបានបញ្ជាក់ថា ក្រុងបានសហការជាមួយមន្ទីរសាធារណការក្នុងការផ្សព្វផ្សាយ និងសូមឱ្យប្រជាពលរដ្ឋចូលរួមថែរក្សាប្រព័ន្ធលូនិងថែទាំផ្លូវទាំងអស់គ្នាកុំបាញ់ទឹកលាងឡានលាងម៉ូតូ ឬបង្ហៀរទឹកដាក់ លើផ្លូវ ធ្វើខូចខាត់ផ្លូវដែលយើងខំធ្វើនោះ ។ បើតាមមន្ទីរសាធារណការ និងដឹកជញ្ជូនខេត្តបានដឹងថា ការអនុវត្តគម្រោងស្តារប្រព័ន្ធលូរំដោះទឹកកខ្វក់និងការជួសជុលកែលម្អផ្លូវក្នុងក្រុងនៅត្រើយខាងលិចស្ទឹងសង្កែ ចាប់ផ្ដើមសាងសង់នៅថ្ងៃ០៥ ខែកក្កដា ឆ្នាំ ២០២១ និង ត្រូវបញ្ចប់នៅថ្ងៃ៣១ ខែ តុលា ឆ្នាំ២០២៥ មានរយៈពេល៥១ ខែ ស្ថិតនៅសង្កាត់ស្វាយប៉ោ និងសង្កាត់ចំការសំរោង ក្រោមគម្រោងកម្ចីធនាគារអភិវឌ្ឍអាស៊ី ៕