កិច្ចពិភាក្សាជាមួយគណៈប្រតិភូក្រុមហ៊ុន VW Software Technology Co., LTD ដើម្បីសហការចូលរួមវគ្គបណ្ដុះបណ្ដាលស្ដីពី "សន្តិសុខសាយប័រ" ដល់មន្រ្តីរាជការពាក់ព័ន្ធ ក្រោមឱវាទក្រសួងសាធារណការ និងដឹកជញ្ជូន ទីស្ដីការក្រសួង៖ នាព្រឹកថ្ងៃសុក្រ ទី៨ ខែសីហា ឆ្នាំ២០២៥ ឯកឧត្ដម ឈួន វិន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្ដម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយ លោក Vincent M. នាយកប្រតិបត្តិក្រុមហ៊ុន VW Software Technology Co., LTD ដោយមានការអញ្ជើញចូលរួមពី ឯកឧត្ដមអនុរដ្ឋលេខាធិការ ថ្នាក់ដឹកនាំ អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ មន្រ្តីជំនាញពាក់ព័ន្ធ ក្រុមការងារក្រុមហ៊ុន VW Software Technology Co., LTD និងតំណាងសាកលវិទ្យាល័យអាមេរិកាំងអន្តរជាតិ (AUPP) ។ ជំនួបពិភាក្សានេះរៀបចំឡើងដើម្បីពង្រឹងសមត្ថភាពមន្ត្រីក្នុងការការពារព័ត៌មាន និងប្រព័ន្ធប្រតិបត្តិការសំខាន់ៗ ពីការវាយប្រហារផ្សេងៗលើសន្តិសុខសាយប័រតាមរយៈការរៀបចំវគ្គបណ្ដុះបណ្ដាលឯកទេសសុវត្ថិភាព និងពង្រឹងសន្តិសុខឌីជីថលជូនដល់មន្ត្រីបច្ចេកទេសពាក់ព័ន្ធនៃក្រសួងសាធារណការ និងដឹកជញ្ជូន ។ ក្រោយពីបានពិភាក្សា និងការធ្វើបទបង្ហាញពី លោក Vincent M. នាយកប្រតិបត្តិក្រុមហ៊ុន VW Software Technology Co., LTD ក៏បានជម្រាបជូនឯកឧត្ដមរដ្ឋលេខាធិការអំពីវគ្គបណ្តុះបណ្តាលដែលកើតចេញពីកិច្ចព្រមព្រៀងភាពជាដៃគូសហការរវាងក្រុមហ៊ុន VW Software Technology Co., LTD ជាមួយសាកលវិទ្យាល័យអាមេរិកាំងភ្នំពេញ (AUPP) ដែលជាគ្រឹះស្ថានឧត្តមសិក្សាឈានមុខគេ ក្នុងការចូលរួមចំណែកពង្រឹងសមត្ថភាពតាមសន្តិសុខសាយប័រនៅកម្ពុជា។ បន្ថែមពីនេះ ឯកឧត្ដមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះលោកនាយកប្រតិបត្តិក្រុមហ៊ុន និងក្រុមការងារ និងបានធ្វើការវាយតម្លៃខ្ពស់អំពីសារៈសំខាន់នៃវគ្គបណ្តុះបណ្តាល ដែលផ្តោតសំខាន់លើការពង្រឹងគុណភាព និងសមត្ថភាពធនធានមនុស្សរបស់ក្រសួងសាធារណការ និងដឹកជញ្ជូន ក៏ដូចជាក្រសួង-ស្ថាប័ន ដទៃទៀត លើផ្នែកសន្តិសុខសាយប័រ ក្នុងការបង្កើនភាពធន់នៃហេដ្ឋារចនាសម្ព័ន្ធឌីជីថល និងការរួមចំណែកដល់កិច្ចខិតខំប្រឹងប្រែងក្នុងការការពារប្រព័ន្ធសន្តិសុខសាយប័រជាតិ៕