កិច្ចប្រជុំពិនិត្យ លើសេចក្តីព្រាងច្បាប់ស្តីពីចរាចរណ៍ផ្លូវគោកថ្មី របស់ក្រុមការងារតាក់តែងសេចក្តីព្រាងច្បាប់ស្តីពីចរាចរណ៍ផ្លូវគោក ទីស្តីការក្រសួង៖ នាថ្ងៃទី៧ ខែសីហា ឆ្នាំ២០២៥ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំក្រុមការងារតាក់តែងសេចក្តីព្រាងច្បាប់ស្តីពីចរាចរណ៍ផ្លូវគោក ដើម្បីពិនិត្យ និងពិភាក្សាបន្ថែមលើមាត្រាមួយចំនួន នៃសេចក្តីព្រាងច្បាប់ស្តីពីចរាចរណ៍ផ្លូវគោកថ្មី ឱ្យមានភាពច្បាស់លាស់ ស្របតាមបច្ចេកទេស និងការវិវឌ្ឍរបស់សង្គម ដោយមានការចូលរួមពីតំណាងក្រសួងសាធារណការ និងដឹកជញ្ជូន ក្រសួងមហាផ្ទៃ និងក្រសួងយុត្តិធម៌ ដោយបានពិនិត្យ ពិភាក្សា និងទទួលបានការផ្តល់យោបល់យ៉ាងផុលផុសផងដែរ។ លោកជំទាវប្រធានអង្គប្រជុំ ក៏បានស្នើដល់តំណាងក្រសួងយុត្តិធម៌ដើម្បីពិនិត្យ និងផ្តល់យោបល់បន្ថែមលើមាត្រាមួយចំនួនពាក់ព័ន្ធនឹងករណីមានគ្រោះថ្នាក់ចរាចរណ៍ផ្លូវគោក និងបទល្មើសចរាចរណ៍ផ្លូវគោក។ សេចក្តីព្រាងច្បាប់នេះនឹងបញ្ជូនទៅក្រុមប្រឹក្សាអ្នកច្បាប់ របស់ទីស្តីការគណៈរដ្ឋមន្ត្រីដើម្បីពិនិត្យ មុននឹងដាក់ឆ្លងក្នុងកិច្ចប្រជុំពេញអង្គរបស់គណៈរដ្ឋមន្ត្រី៕