គិតត្រឹមដើមខែកក្កដា ឆ្នាំ២០២៥ នេះ កំណាត់ចុងក្រោយនៃគម្រោងស្ថាបនាផ្លូវជាតិលេខ៥ ពីក្រុងសិរីសោភ័ណដល់ក្រុងប៉ោយប៉ែត ខេត្តបន្ទាយមានជ័យប្រវែង ៣៥,១៤ គីឡូម៉ែត្រ សម្រចបានលទ្ធផលជារួម ៣២%។បើតាមមន្រ្តីក្រសួងសាធារណការនិងដឹកជញ្ជូន បើគ្មានការប្រែប្រួលនោះទេ គម្រោងស្តារ និងលើកកម្រិតគុណភាពផ្លូវជាតិលេខ ៥ កំណាត់ចុងក្រោយនេះ គ្រោងនឹងបញ្ចប់ក្នុងអំឡុងឆ្នាំ២០២៦ ខាងមុខ។ផ្លូវជាតិលេខ ៥ ជាផ្លូវអាស៊ានហាយវេលេខ ១ (AH1) បានសាងសង់បញ្ចប់ពីព្រែកក្តាមដល់ក្រុងសិរីសោភ័ណខេត្តបន្ទាយមានជ័យ ខណៈកំណាត់ចុងក្រោយប្រវែងជាង ៣០ គីឡូម៉ែត្រពីក្រុងសិរីសោភ័ណទៅដល់ទីប្រជុំជនក្រុងប៉ោយប៉ែត កំពុងសាងសង់ជំរុញបញ្ចប់ទៅតាមផែនការ។គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៥ គឺជាគម្រោងក្រោមកម្ចីឥណទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការ អន្តរជាតិជប៉ុនប្រចាំកម្ពុជា ដែលផ្តើមសាងសង់ចេញពីព្រែកក្តាម រហូតដល់ក្រុងប៉ោយប៉ែត ឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និង ខេត្តបន្ទាយមានជ័យ មានប្រវែងសរុប ៣៦៦ គីឡូម៉ែត្រ ដែលចំណាយថវិកាប្រមាណ ៥០០ លានដុល្លារអាមេរិក។ ការស្ថាបនាបែងចែកជាបីផ្នែកធំៗគឺ៖ ភាគខាងជើង ភាគខាងត្បូង និងភាគកណ្តាល។ ខណៈកំណាត់ពីព្រែកក្តាមដល់ក្រុងសិរីសោភ័ណខេត្តបន្ទាយមានជ័យ បានបញ្ចប់សម្ពោធដាក់ឲ្យប្រើប្រាស់ជាផ្លូវការ កំណាត់ចុងក្រោយពីក្រុងសិរីសោភ័ណខេត្តបន្ទាយមានជ័យ ទៅទីប្រជុំជនក្រុងប៉ោយប៉ែតប្រវែងជាង ៣៥ គីឡូម៉ែត្រ តាមផែនការគ្រោងបញ្ចប់នៅពាក់កណ្តាលឆ្នាំ ២០២៦។ ស្របពេលដែលការដ្ឋានកំពុងជំរុញបញ្ចប់ទៅតាមផែនការ ក្រសួងសាធារណការ និងដឹកជញ្ជូន ក៏អំពាវនាវដល់អ្នកប្រើប្រាស់កំណាត់ផ្លូវជាតិលេខ៥ (សិរីសោភ័ណ-ប៉ោយប៉ែត) បើកបរដោយប្រុងប្រយ័ត្នខ្ពស់ ពោលគឺត្រូវបើកបរក្នុងល្បឿនមួយអាចគ្រប់គ្រងបាន ដើម្បីធានាសុវត្ថិភាពខ្លួនឯង និងអ្នកដទៃ និងបើកបរក្នុងល្បឿនសមល្មមកាត់បន្ថយការហុយធូលីភក់លើប្រជាពលរដ្ឋនៅតាមដងផ្លូវ។ ទន្ទឹមនឹងនោះ ក្រសួងក៏ស្នើដល់ប្រជាពលរដ្ឋរស់នៅតាមសងខាងផ្លូវ និងប្រជាពលរដ្ឋធ្វើដំណើរ មានការយោគយល់ អធ្យាស្រ័យខ្ពស់ ក្នុងពេលដំណើរការការដ្ឋានពង្រីក និងលើកកម្រិតគុណភាពកំណាត់ផ្លូវជាតិលេខ ៥ នេះផងដែរ៕