ភ្នំពេញ ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី ១នៃក្រុមប្រឹក្សាអភិវឌ្ឍន៍កម្ពុជា បានដាក់ក្តីរំពឹងថា នឹងទទួលបានគម្រោងវិនិយោគបំបែកកំណត់ត្រាថ្មី ឈានដល់៥០០គម្រោង នៅឆ្នាំ២០២៥នេះ ទោះមានភាពមិនប្រាកដប្រជានៃសេដ្ឋកិច្ចសកលក្តី។ ក្នុងកិច្ចសម្ភាសន៍ជាមួយអ្នកសារ ព័ត៌មាន ក្នុងពិធីចាក់បេតុងតភ្ជាប់មុខតំណចុងក្រោយ នៃគម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគចំនួន៣៧៣គម្រោង ដែលមានតម្លៃជិត ៦ពាន់លានដុល្លារអាម៉េរិក ក្នុងឆមាសទី១ ឆ្នាំ២០២៥ និងគម្រោងចំនួន ៦០បន្ថែមទៀត ដែលមានតម្លៃប្រមាណ ១,៥ពាន់លានដុល្លារអាម៉េរិក កំពុងស្ថិតក្រោមការត្រួតពិនិត្យ។ ឯកឧត្តម ឧបនាយករដ្ឋមន្ត្រី ស៊ុន ចាន់ថុល បានបន្តថា នៅឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងវិនិយោគចំនួន៤១៤គម្រោង ដោយក្នុងរយៈពេល៣០ឆ្នាំមកនេះ កម្ពុជាមិនដែលបានអនុម័តចំនួន៤០០គម្រោងបែបនេះនោះទេ ប៉ុន្តែក្នុងឆ្នាំនេះ អាចនឹងបំបែកកំណត់ត្រាថ្មីទៀត អាចឈានដល់ ៥០០គម្រោង។ « សូមជម្រាបថា មកដល់ខែ៦ យើងបានអនុម័យគម្រោង ៣៧៣គម្រោងទៅហើយ ឆ្នាំ២០២៣ តែ២៦៨គម្រោង ឆ្នាំ២០២៤ បាន៤១៤គម្រោង អីចឹងយើងនឹងបំបែកអាត្រារបស់យើងទៀត អីចឹងខ្ញុំជឿជាក់ឆ្នាំនេះ ប្រហែលអាចដល់ ៥០០គម្រោង។ ហេតុដូចម្តេចបានគេមកដាក់ទុននៅកម្ពុជាទៀត? ដោយសារគេទុកចិត្តលើរាជរដ្ឋាភិបាលយើង ព្រោះកម្ពុជាមានសុខសន្តិភាព និងស្ថិរភាពនយោបាយ អាហ្នឹងនិយាយឱ្យច្បាស់ឱ្យការពិត »។ ឯកឧត្តម ឧបនាយករដ្ឋមន្ត្រី ស៊ុន ចាន់ថុល ក៏បានឆ្លៀតឱកាសអំពាវនាវឱ្យពលករខ្មែរនៅក្រៅប្រទេសពិចារណាត្រឡប់មកប្រទេសកំណើតវិញ ដោយលើក ឡើងពីតម្រូវការកម្លាំងពលកម្មដែលកំពុងកើនឡើងរបស់ប្រទេស ខណៈប្រទេសកម្ពុជាត្រូវការកម្មករប្រមាណ ៣០ម៉ឺននាក់ ក្នុងមួយឆ្នាំ។ យោងតាមរបាយការណ៍របស់ ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា ក្នុងឆមាសទី១ ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុបចំនួន៣៧៣ គម្រោង អាចបង្កើតការងារបានប្រមាណ ២៥៥ពាន់កន្លែង។ ក្នុងចំណោមគម្រោងវិនិយោគសរុប គម្រោងវិនិយោគដែលមានទីតាំងស្ថិតនៅក្រៅតំបន់ សេដ្ឋកិច្ចពិសេសមានចំនួន ២១៦គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ច ពិសេសមានចំនួន ១៥៧គម្រោង។ ជារួម ក្នុងឆមាសទី១ ឆ្នាំ២០២៥នេះ ការអនុម័តគម្រោងវិនិយោគមានការ កើនឡើងចំនួន ១៨៣គម្រោង ខណៈទុនវិនិយោគមានការកើនឡើងប្រមាណ ២,៥ប៊ីលានដុល្លារអាម៉េរិក ស្មើនឹង ប្រមាណ ៧៧% ធៀបនឹងរយៈពេលដូចគ្នាក្នុងឆ្នាំ២០២៤៕