ភ្នំពេញ៖ បច្ចុប្បន្ន ស្ពានមិត្តភាពកម្ពុជា-ចិន មេគង្គក្រចេះ សម្រេចបានសាងសង់បានប្រមាណ៩៦ភាគរយហើយ។ បើតាមលោកឧបនាយករដ្ឋមន្ត្រី ស៊ុន ចាន់ថុល ស្ពានតម្លៃជាង១០០លានដុល្លារនេះ នឹងត្រូវដាក់ឱ្យដំណើរបណ្តោះអាសន្នសម្រាប់យានយន្តធុនតូច នាអំឡុងរដូវកាលបុណ្យភ្ជុំបិណ្ឌ ក្នុងខែកញ្ញា។ពិធីចាក់បេតុងតភ្ជាប់មុខតំណស្ពានចុងក្រោយនៃ «ស្ពានមិត្តភាពកម្ពុជា-ចិន មេគង្គក្រចេះ» ដើម្បីត្រៀមបើកឱ្យឆ្លងកាត់បណ្តោះអាសន្នសម្រាប់ទោចក្រយានយន្ត និងរថយន្តធុនតូច(ប្រភេទទេសចរណ៍/គ្រួសារ) ត្រូវបានធ្វើឡើងក្រោមវត្តមាន លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(ក.អ.ក.) នាថ្ងៃទី៧ ខែកក្កដា។ សេចក្តីប្រកាសព័ត៌មានរបស់លោក ស៊ុន ចាន់ថុល បានបញ្ជាក់ថា ការចាក់បេតុងតភ្ជាប់មុខតំណស្ពាននេះ គឺជាការសម្រួលចរាចរណ៍ដល់ប្រជាពលរដ្ឋក្នុងតំបន់ ក៏ដូចជាអ្នកដំណើរ អ្នកទេសចរ ក្នុងឱកាសនៃការប្រារព្ធពិធីបុណ្យដាក់បិណ្ឌ និងភ្ជុំបិណ្ឌ ខណៈបច្ចុប្បន្នស្ពាននេះសម្រេចការសាងសង់បាន៩៦ភាគរយ។ ស្ពានប្រវែង១,៧៦១ម៉ែត្រនេះ មានទទឹង១៣,៥ម៉ែត្រ ដោយត្រើយខាងកើតស្ថិតក្នុង ភូមិតាលុស ឃុំបុសលាវ ស្រុកចិត្របុរី និងត្រើយខាងលិចស្ថិតក្នុង ភូមិថ្មរាប ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ ។ ស្ពាននេះ មានផ្លូវរថយន្តចំនួន២គន្លង, ផ្លូវទោចក្រយានមាន២គន្លង, ផ្លូវថ្មើរជើងមាន២គន្លង ដែលមានសសរជើងស្ពានចំនួន ៣៦ដើម និងមានផ្លូវនាវាចរណ៍មានទំហំ១០០ម៉ែត្រx១៥ម៉ែត្រ ផងដែរ។គម្រោងសង់ស្ពាន និងកំណាត់ផ្លូវតភ្ជាប់នេះ ត្រូវបានបើកការដ្ឋានការរសាងសង់នាថ្ងៃទី២ ខែមករា ឆ្នាំ២០២៣ ដោយប្រើប្រាស់កម្ចីសម្បទានពីរដ្ឋាភិបាលប្រទេសចិន ប្រមាណជាង១១៤លានដុល្លារ។ ស្ពាននេះសាងសង់ដោយក្រុមហ៊ុនសំណង់សៀងហៃ(SCG) និងត្រួតពិនិត្យបច្ចេកទេសដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន(WACC)។ គិតត្រឹមបំណាច់ខែមិថុនា ឆ្នាំ២០២៥ ការងារសាងសង់តួស្ពានសម្រេចវឌ្ឍនភាពបាន ៩៦ភាគរយ។ ដោយឡែក វឌ្ឍនភាពគម្រោងទាំងមូល ដោយបូករួមជាមួយនឹងកំណាត់ផ្លូវតភ្ជាប់ផងនោះ គឺសម្រេចបាន ៧០ភាគរយ។ នេះបើយោងតាមការប្រភពព័ត៌មានដែលផ្សព្វផ្សាយនៅលើបណ្តាញទំនាក់ទំនងសង្គមផ្លូវការរបស់លោក ស៊ុន ចាន់ថុល។ តាមការរំពឹងទុក ស្ពាននេះនឹងសាងសង់រួចរាល់ក្នុងខែកញ្ញា ឆ្នាំ២០២៦ ទៅតាមផែនការ ឬបញ្ចប់មុនផែនការបើគិតតាមសន្ទុះការងារជាក់ស្តែងនាពេលបច្ចុប្បន្ន។ លោក ស៊ុន ចាន់ថុល បានបញ្ជាក់ថា ស្ពាននេះតម្លៃជាង១០០លានដុល្លារនេះ នឹងចូលរួមបម្រើដល់ការតភ្ជាប់ប្រព័ន្ធដឹកជញ្ជូនផ្ទៃក្នុងរបស់កម្ពុជាឱ្យកាន់តែមានភាពប្រទាក់ក្រឡា ជាពិសេសគឺជំរុញកំណើនដឹកជញ្ជូនក្នុងវិស័យកសិកម្ម កសិ-ឧស្សាហកម្ម និងទេសចរណ៍ នៅតាមបណ្តាខេត្តស្ថិតក្នុងភូមិភាគឦសាន។ គម្រោងនេះ ជួយសម្រួលដល់ការធ្វើដំណើរផ្សេងៗរបស់បងប្អូនប្រជាពលរដ្ឋនៅក្នុងសកម្មភាពរស់នៅប្រចាំថ្ងៃ ការធ្វើដំណើររបស់សិស្សានុសិស្សទៅសាលារៀន និងការធ្វើដំណើររបស់បងប្អូនទៅកាន់មន្ទីរពេទ្យ ជាពិសេសនៅគ្រាអាសន្ន ឬពេលយប់ព្រលប់ដោយពុំចាំបាច់ចំណាយពេលវេលា និងប្រាក់កាស ក្នុងការឆ្លងសាឡាង និងមានសុវត្ថិភាពខ្ពស់។ លើសពីនេះ គម្រោងនេះ នឹងចូលរួមផងដែរក្នុងការលើកកម្ពស់ការតភ្ជាប់អាស៊ាន និងការតភ្ជាប់មហាអនុតំបន់មេគង្គ(GMS) និងអនុតំបន់មេគង្គឡាន-ឆាងផងដែរ៕