ខេត្តមណ្ឌលគិរី គ្របដណ្ដប់ទៅដោយធនធានធម្មជាតិសម្បូរបែប ធនធានព្រៃឈើ វាលស្មៅ អាកាសធាតុបរិសុទ្ធ និងធនធានរ៉ែ បានផ្ដល់សក្ដានុពលយ៉ាងធំធេងដល់វិស័យអេកូទេសចរណ៍ ការដាំដុះបន្លែ និងការចិញ្ចឹមសត្វ ដែលជាផ្នែកមួយយ៉ាងសំខាន់ ក្នុងការលើកស្ទួយជីវភាពរបស់ប្រជាពលរដ្ឋនៅតាមមូលដ្ឋាន។ សកម្មភាពការងាររបស់មន្ទីរបរិស្ថានខេត្តមណ្ឌលគិរី រួមមាន៖ -ការងារអប់រំផ្សព្វផ្សាយបរិស្ថានៈ រៀបចំយុទ្ធនាការនានាទាក់ទងនឹងការអប់រំបរិស្ថាន ចុះផ្សព្វផ្សាយច្បាប់ស្តីពីតំបន់ការពារធម្មជាតិ ផលិត និងផ្សព្វផ្សាយ សមិទ្ធផលការងារ និងការងារអប់រំតាមរយៈបណ្តាញសង្គមរបស់មន្ទីរ -ការងារគ្រប់គ្រងតំបន់ការពារធម្មជាតិៈ ចូលបំភ្លឺ និងសវនាការ កសាងសំណុំរឿងបទល្មើសធនធានធម្មជាតិ សហការបង្ក្រាបអាជីវកម្មរ៉ែខុសច្បាប់ រក្សាទុកវត្ថុតាងមួយចំនួន ដាក់ស្លាកព័ត៌មាន និងបំរាមផ្សេងៗ បណ្ដុះកូនឈើ ដាំជួស កូនឈើ និងចែកកូនឈើ និងចូលរួមសម្អាតបរិស្ថាន -ការងារគាំពារបរិស្ថានៈ ចុះធ្វើអធិការកិច្ច និងប្រមូលទិន្នន័យ ចូលរួមវាយតម្លៃហេតុប៉ះពាល់បរិស្ថាន -ការងារអភិវឌ្ឍន៍សហគមន៍ៈ សហការជាមួយសហគមន៍ ប្រមូលទិន្នន័យប្រើប្រាស់ដីធ្លីក្នុងភូមិសាស្រ្ត ចុះពិនិត្យ និងផ្ទៀងផ្ទាត់ការកាប់ទន្ទ្រានយកដីសហគមន៍ ពីអ្នកខាងក្រៅដែលមិនមែនជាសមាជិកសហគមន៍ ប្រគល់ពូជគោដល់សមាជិកសហគមន៍ដើម្បីចិញ្ចឹមសាកល្បង សហការជាមួយអង្គការផ្សេងៗ លើការងារ ផ្ទៀងផ្ទាត់ និងវាស់វែងដីសហគមន៍ តំបន់ការពារធម្មជាតិ និងផ្សព្វផ្សាយអំពីច្បាប់ទាក់ទងនឹងបរិស្ថាន សូមជម្រាបជូនថា ខេត្តមណ្ឌលគិរីមានតំបន់ការពារធម្មជាតិចំនួន ៥ រួមមានៈ ដែនជម្រកសត្វព្រៃកែវសីមា ដែនជម្រកសត្វព្រៃភ្នំព្រេច ដែនជម្រកសត្វព្រៃភ្នំណាមលៀរ ដែនជម្រកសត្វព្រៃលំផាត់ និងដែនជម្រកសត្វព្រៃស្រែពក៕