កិច្ចប្រជុំប្រចាំឆ្នាំ២០២៥ របស់ធនាគារវិនិយោគហេដ្ឋារចនាសម្ព័ន្ធអាស៊ី (2025 AIIB Annual Meeting) នៅទីក្រុងប៉េកាំង សាធារណរដ្ឋប្រជាមានិតចិន ទីក្រុងប៉េកាំង សាធារណរដ្ឋប្រជាមានិតចិន៖ ឯកឧត្តម ឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង ចូលរួមកិច្ចប្រជុំប្រចាំឆ្នាំ២០២៥ របស់ធនាគារវិនិយោគហេដ្ឋារចនាសម្ព័ន្ធអាស៊ី (2025 AIIB Annual Meeting) ក្រោមប្រធានបទ “ការតភ្ជាប់សម្រាប់ការអភិវឌ្ឍ កិច្ចសហប្រតិបត្តិការដើម្បីភាពចម្រុងចម្រើន - Connecting for Development, Collaborating for Prosperity” ចាប់ពីថ្ងៃទី២៤-២៦ ខែមិថុនា ឆ្នាំ២០២៥។ កម្មវិធីនេះមានគោលបំណងបង្ហាញអំពីសកម្មភាព និងយុទ្ធសាស្រ្តវិនិយោគរបស់ AIIB ក្នុងការគាំទ្រការអភិវឌ្ឍប្រកបដោយចីរភាព នៅក្នុងតំបន់អាស៊ី និងនៅលើកម្រិតសាកល។ កម្មវិធីនេះបានក្លាយជាវេទិកាសំខាន់សម្រាប់រដ្ឋជាសមាជិក ដៃគូអភិវឌ្ឍន៍ វិនិយោគិន អ្នកស្រាវជ្រាវ និងស្ថាប័នហិរញ្ញវត្ថុ ក៏ដូចជាអ្នកជំនាញមកពីគ្រប់វិស័យ សរុបប្រមាណជិត ៤០០០នាក់ ដើម្បីពិភាក្សា និងផ្លាស់ប្តូរយោបល់អំពី៖ ការផ្ដល់ហិរញ្ញវត្ថុសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធ, ការអភិវឌ្ឍប្រកបដោយចីរភាព និងការឆ្លើយតបចំពោះបម្រែបម្រួលអាកាសធាតុ, និងការចូលរួមរបស់វិស័យឯកជនក្នុងការជំរុញការរីកចម្រើនសេដ្ឋកិច្ច។ សូមជម្រាបជូនថា កិច្ចប្រជុំប្រចាំឆ្នាំ នាឆ្នាំ២០២៥នេះ ក៏ជាព្រឹត្តិការណ៍ដើម្បីអបអរសាទរខួប ១០ឆ្នាំ នៃការបង្កើតធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដែលបានមានវត្ថុបំណងចំបងក្នុងការគាំទ្រនិងជំរុញការវិនិយោគលើគម្រោងហេដ្ឋារចនាសម្ព័ន្ធប្រកបដោយចីរភាពនៅតំបន់អាស៊ី និងកម្រិតសាកល៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube