សិក្ខាសាលាផ្សព្វផ្សាយតម្រង់ទិសជំនាញសិក្សារបស់វិទ្យាស្ថានតេជោសែន សាធារណការ និងដឹកជញ្ជូន សម្រាប់សិស្សានុសិស្ស ថ្នាក់ទី១២ នៃវិទ្យាល័យ ១០ មករា ១៩៧៩ ក្នុងខេត្តសៀមរាប ខេត្តសៀមរាប៖ នាថ្ងៃព្រហស្បតិ៍ ទី១៩ ខែមិថុនា ឆ្នាំ២០២៥ ឯកឧត្តម ប្រាងហង្ស សេរីរិទ្ធ នាយកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីភាពបើកកម្មវិធីសិក្ខាសាលាតម្រង់ទិសជំនាញសិក្សារបស់វិទ្យាស្ថានតេជោសែន សាធារណការ និងដឹកជញ្ជូន សម្រាប់សិស្សានុសិស្ស ថ្នាក់ទី១២ នៃវិទ្យាល័យ ១០ មករា ១៩៧៩ ក្នុងខេត្តសៀមរាប ដោយមានការចូលរួមពី លោក លោកស្រី ជាថ្នាក់ដឹកនាំ និងមន្ត្រីជំនាញ និងឯកឧត្តមជាសាស្ត្រាចារ្យ លោកគ្រូឧទ្ទេស វាគ្មិនកិត្តិយស តំណាងមន្ទីរសាធារណការ និងដឹកជញ្ជូន ខេត្តសៀមរាប លោកនាយករងវិទ្យាល័យ ១០ មករា ១៩៧៩ និងសិស្សានុសិស្សចំនួនប្រមាណ ១៥០នាក់។ សិក្ខាសាលានេះរៀបចំឡើងក្នុងគោលបំណង ដើម្បជួយតម្រង់ទិសដល់សិស្សានុសិស្សនៅកម្រិតមធ្យមសិក្សាទុតិយភូមិ ឱ្យមានគោលដៅច្បាស់លាស់ ក្នុងការចាប់យកជំនាញឱ្យសមស្របទៅតាមតម្រូវការទីផ្សារការងារ និងជំនាញដែលជាបំណងប្រាថ្នាពិតប្រាកដរបស់ខ្លួន នៅតាមគ្រឹះស្ថានឧត្តមសិក្សានានាក្រោយពីបញ្ចប់ថ្នាក់មធ្យមសិក្សា។ សូមបញ្ជាក់ជូនផងដែរថា វិទ្យាស្ថានតេជោសែន សាធារណការ និងដឹកជញ្ជូន គ្រោងនឹងបើកទទួលសិស្សនិស្សិតជំនាន់ទី៦ ចំនួន៣០០នាក់ សម្រាប់ឆ្នាំសិក្សា២០២៥-២០២៦ ខាងមុខនេះ លើជំនាញទាំង៦ ក្នុងនោះរួមមាន៖ ១). ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ ២). ជំនាញប្រព័ន្ធចម្រោះទឹកកខ្វក់ ៣). ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ៤). ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ ៥). ជំនាញបើកបរនាវា ៦). ជំនាញម៉ាស៊ីននាវា៕