(ព្រៃវែង)៖ លោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មការជាតិសុវត្តិភាពចរាចរណ៍ផ្លូវគោក នៅថ្ងៃទី៩ ខែមិថុនា ឆ្នាំ២០២៥ បានអញ្ជើញចូលរួមប្រារព្ធទិវាសប្តាហ៍ជាតិ សុវត្តិភាពចរាចរណ៍ផ្លូវគោកលើកទី១៦ ដែលប្រារព្ធធ្វើឡើងនៅសួនច្បារសម្ដេចក្រឡាហោម ស ខេង ស្ថិតក្នុងភូមិ១ សង្កាត់កំពង់លាវ ក្រុងព្រៃវែង ខេត្តព្រៃវែង។ ពិធីនេះក៏មានការចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ថ្នាក់ដឹកនាំក្រសួងមហាផ្ទៃ, អភិបាលខេត្តព្រៃវែង ព្រមទាំងមន្រ្តីពាក់ព័ន្ធជាច្រើននាក់ផ្សេងទៀត។ លោកអភិសន្តិបណ្ឌិត ស សុខា បានថ្លែងថា ទិវាដ៏មានសារៈសំខាន់នេះ ដើម្បីពញ្ញាក់ស្មារតីប្រជាពលរដ្ឋឲ្យយកចិត្តទុកដាក់លើការគោរពច្បាប់ចរាចរណ៍ផ្លូវគោក សំដៅចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោក ឲ្យមកកម្រិតទាប និងដើម្បីដាស់តឿនអ្នកប្រើប្រាស់ផ្លូវ ទាំងអ្នកថ្មើរជើង ទាំងអ្នកបើកបរយានយន្តគ្រប់ប្រភេទ ឱ្យខិតខំផ្លាស់ប្តូរឥរិយាបថដែលកន្លងមកមិនគោរពច្បាប់ មកប្រកាន់យកឥរិយាបថដែលគោរពច្បាប់ មានសណ្តាប់ធ្នាប់របៀបរៀបរយល្អ មានការអធ្យាស្រ័យ និងគោរពច្បាប់ចរាចរណ៍នៅពេលធ្វើដំណើរ ឬនៅពេលបើកបរយានយន្ត រួមគ្នាទប់ស្កាត់ និងកាត់បន្ថយគ្រោះថ្នាក់ដើម្បីកាត់បន្ថយទុក្ខសោក និងភាពក្រីក្ររបស់ប្រជាពលរដ្ឋ ឱ្យស្របតាមកម្មវិធីនយោបាយរបស់រាជរដ្ឋាភិបាល។ អភិសន្តិបណ្ឌិតបានបន្តថា ផ្អែកតាមស្ថានភាពគ្រោះថ្នាក់ចរាចរណ៍ក្នុងរយៈពេលចុងក្រោយនេះ ការស្លាប់ និងរបួស ដែលបង្កឡើងដោយសារការបើកបរក្នុងល្បឿនហួសកំណត់ ការបើកបរក្រោមឥទ្ធិពលគ្រឿងស្រវឹង ការមិនពាក់មួកសុវត្ថិភាព និងមិនពាក់ខ្សែក្រវាត់សុវត្ថិភាព ការវ៉ាជែងដោយប្រថុយប្រថាន នៅតែបង្កឱ្យមានគ្រោះថ្នាក់ចរាចរណ៍ដែលបណ្តាលឱ្យបាត់បង់ជីវិតមនុស្ស ឬរបួសពិការ រួមជាមួយនឹងការខូចខាតទ្រព្យសម្បត្តិរដ្ឋ និងឯកជនយ៉ាងច្រើនជាមួយនេះក៏បានបន្សល់ទុកនូវកូនកំព្រា ស្ត្រីមេម៉ាយ ពិការភាព សោកនាដកម្ម និងផលវិបាកជាច្រើនមកលើសង្គមកម្ពុជា។ បន្ថែមលើសពីនេះ លោកអភិសន្តិបណ្ឌិត បានថ្លែងផ្ដាំផ្ញើប្អូនៗយុវជន សិស្សានុសិស្ស ព្រមទាំងបងប្អូនប្រជាពលរដ្ឋក្នុងខេត្តព្រៃវែង ឲ្យចេះបង្កើនការប្រុងប្រយ័ត្នខ្ពស់នៅពេលធ្វើចរាចរណ៍លើដងផ្លូវ និងបានចែកជូននូវសៀវភៅ ច្បាប់ស្ដីពីចរាចរណ៍ផ្លូវគោក និងមួកសុវត្ថិភាព សរុបចំនួន ៨៥០មួក ដល់តំណាងយុវជន និងសិស្សានុសិស្ស ដើម្បីជាការផ្សព្វផ្សាយ ចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក ឲ្យមកកម្រិតទាប ស្របតាមគោលនយោបាយរបស់រាជរដ្ឋាភិបាលកម្ពុជា។ លោក សួន សុម៉ាលីន អភិបាលខេត្តបានឲ្យដឹងថា ក្នុងត្រីមាសទី១ ឆ្នាំ២០២៥ ខេត្តព្រៃវែង មានគ្រោះថ្នាក់ចរាចរណ៍កើតឡើងចំនួន ៣២ករណី លើ៩៧ករណី បើប្រៀបធៀបនឹងត្រីមាសទី១ ឆ្នាំ២០២៤ ថយចុះ ៦៥ករណី ស្មើនឹង៦៧% ក្នុងនោះស្លាប់ មនុស្សចំនួន ២៦នាក់ ស្រី ៣នាក់, របួស ៣៦នាក់ ស្រី៨នាក់ ខូចរថយន្ត ១២គ្រឿង ម៉ូតូ ៤៦គ្រឿង និង ខូចខាតទ្រព្យសម្បត្តិផ្សេងៗទៀត។ លោកបានបន្ថែមថា ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក ក្នុងត្រីមាសទី១ ឆ្នាំ២០២៥ អនុគណៈ កម្មាការសុវត្ថិភាពចរាចរណ៍ផ្លូវគោកខេត្ត បានចុះអប់រំផ្សព្វផ្សាយច្បាប់ចរាចរណ៍ផ្លូវគោកដល់ប្រជាពលរដ្ឋ ព្រមទាំង ចែកជូនខិត្តប័ណ្ណជំនួយស្មារតីផ្សេងៗចំនួន ១២លើក ក្នុងនោះសៀវភៅច្បាប់ចរាចរណ៍ផ្លូវគោកចំនួន ៤៧២ក្បាល, កូនសៀវភៅអ្វីដែលអ្នកបើកបរទោចក្រយានយន្តត្រូវយល់ដឹង ចំនួន ៤៧២ក្បាល, ខិត្តប័ណ្ណជំនួយស្មារតី ស្តីពី ច្បាប់ចរាចរណ៍ផ្លូវគោកសម្រាប់ផ្សព្វផ្សាយ ចំនួន ៤៧២ច្បាប់, ខិត្តប័ណ្ណអ្វីដែលអ្នកបើកបរត្រូវដឹង ចំនួន ៤៧២ ច្បាប់, ស្ទីគ័រចំណាំងផ្លាត ចំនួន ២៣៧ផ្ទាំង និងខិត្តប័ណ្ណសុវត្ថិភាពអ្នកបើកបរចំនួន ៤៤១សន្លឹក។ជាមួយនេះ អនុគណៈកម្មាការសុវត្ថិភាពចរាចរណ៍ផ្លូវគោកខេត្ត បានអនុវត្តការងាររឹតបន្តឹងការអនុវត្តច្បាប់ ដោយត្រួតពិនិត្យ រថយន្តខុសបច្ចេកទេស បានសរុបចំនួន ១.៤២២ ក្នុងនោះរថយន្តត្រឹមត្រូវ ចំនួន ១.២៩២គ្រឿង, រថយន្តត្រូវបានបកស្ទីគ័រ និងស្កុតខ្មៅលើកញ្ចក់ អ្នកបើកបរគ្មានប័ណ្ណបើកបរ ចំនួន ២០នាក់, រថយន្តត្រូវដោះរានក្រោយ ចំនួន ០៥គ្រឿង៕