មានប្រជាពលរដ្ឋមួយចំនួនដែលជាអ្នកធ្វើដំណើរតាមផ្លូវល្បឿនលឿន មានចម្ងល់និងសំណូមពរពាក់ព័ន្ធនឹងការដំឡើងភ្លើងបំភ្លឺតាមដងផ្លូវល្បឿនលឿនភ្នំពេញ-ព្រះសីហនុ។ ដើម្បីស្រាយចម្ងល់និងសំណូមពរទាំងនេះ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានពន្យល់នូវហេតុផលមួយចំនួនដូចខាងក្រោម៖ ១. ផ្លូវល្បឿនលឿនត្រូវបានបំពាក់នូវប្រព័ន្ធចំណាំងផ្លាតលើផ្លូវ ដែលអាចឆ្លុះបញ្ចាំងឃើញគំនូសផ្លូវ ទ្រូងផ្លូវ គំនូសបែងចែកគន្លងផ្លូវ និងរបាំងកណ្តាលបានយ៉ាងច្បាស់លាស់។ ពេលអ្នកបើកបរបើកភ្លើងបំភ្លឺផ្លូវខាងមុខនៅពេលយប់ ប្រព័ន្ធចំណាំងផ្លាតគន្លងផ្លូវទាំងសងខាងនឹងផ្លាតពន្លឺបានយ៉ាងច្បាស់នៅពេលប៉ះជាមួយភ្លើងរថយន្ត។ ២. ផ្លូវល្បឿនលឿន គឺមិនអនុញ្ញាតឱ្យអ្នកថ្មើរជើង ទោចក្រយាន(កម្លាំងក្រោម៥០០CC) ត្រីចក្រយាន យានអូសដោយសត្វ ម៉ូតូកង់បួនប្រើប្រាស់ផ្លូវនេះទេ។ ភ្លើងបំភ្លឺផ្លូវជាធម្មតា គឺរចនាឡើងដើម្បីសម្រួលដល់អ្នកថ្មើរជើង និងទោចក្រឬត្រីចក្រយានក្នុងករណីគ្មានពន្លឺបញ្ចាំងឬខ្សោយពន្លឺ។ ៣. ដើម្បីកាត់បន្ថយការប្រើប្រាស់ថាមពល ព្រមទាំងគិតគូរអំពីបរិស្ថាន និងផលប៉ះពាល់ផ្សេងៗជាយថាហេតុ។ ម៉្យាងវិញទៀតបង្គោលភ្លើងត្រូវមានចន្លោះកំណត់ ពន្លឺដែលបំភ្លឺតាមផ្លូវអាចមានការបំភ្លឺមិនស្មើគ្នា ខ្លះភ្លឺខ្លះងងឹត។ ក្នុងការបើកបរដោយល្បឿនលឿន ការប្រែប្រួលពន្លឺបែបនេះអាចធ្វើឱ្យភ្នែកអស់កម្លាំង ឆាប់ហត់ និងបង្កការងងុយក្នុងការបើកបរ ដែលអាចបណ្តាលឱ្យមានហានិភ័យលើសុវត្ថិភាពចរាចរណ៍។ ជារួមអ្នកនាំពាក្យបញ្ជាក់ថា ការមិនដំឡើងអំពូលភ្លើងបំភ្លឺតាមដងផ្លូវល្បឿនលឿននេះ គឺជាការអនុវត្តតាមគោលការណ៍ និងមាត្រដ្ឋានដែលទទួលស្គាល់ពីអន្តរជាតិ។ ទន្ទឹមគ្នាអ្នកនាំពាក្យក៏សូមអរគុណដល់ប្រជាពលរដ្ឋអ្នកធ្វើដំណើរចំពោះការចូលរួមបញ្ចេញមតិស្ថាបនា ប្រកបដោយសីលធម៌ពាក់ព័ន្ធផ្លូវល្បឿនលឿនភ្នំពេញ-ក្រុងព្រះសីហនុ។ មតិយោបល់របស់ពលរដ្ឋពិតជាមានសារៈសំខាន់ សម្រាប់ការកែលម្អ បំពេញបន្ថែមនូវចំណុចខ្វះខាត ដើម្បីផ្តល់សេវាកម្មឱ្យកាន់តែប្រសើរឡើងមួយកម្រិតទៀត៕