(ពោធិ៍សាត់)៖ លោកបណ្ឌិត លី ណារុន រដ្ឋលេខាធិការ តំណាងលោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ និងលោក លឹម សុខតូ អភិបាលរងនៃគណៈអភិបាលខេត្ត តំណាងលោក ខូយ រីដា អភិបាលនៃគណៈអភិបាលខេត្តពោធិ៍សាត់ នាថ្ងៃទី០៤ ខែមិថុនា ឆ្នាំ២០២៥នេះ បានដឹកនាំកិច្ចប្រជុំផ្សព្វផ្សាយព័ត៌មាន អំពីគម្រោងកែលម្អការតភ្ជាប់ផ្លូវជនបទ (RRCIP) និងពិភាក្សាលើកិច្ចសហការសម្របសម្រួល ដល់ដំណើរការសិក្សាគម្រោងប្លង់លម្អិតខ្សែផ្លូវ និងការអនុវត្តគម្រោងលើផ្លូវជនបទ ដែលបានជ្រើសរើសរួច ក្នុងខេត្តពោធិ៍សាត់ ចំនួន១៤ខ្សែ ប្រវែងសរុប ១៤៤.៩០គីឡូម៉ែត្រ ក្រោមថវិកាហិរញ្ញប្បទាន (JICA)។ ពិធីនេះត្រូវបានធ្វើឡើង នៅសាលប្រជុំជាន់ទី១ សាលាខេត្ត ដោយបានការចូលរួមពី លោកនាយករងរដ្ឋបាលសាលាខេត្ត លោកប្រធានមន្ទីរពាក់ព័ន្ធ លោកអភិបាល អភិបាលរងក្រុង ស្រុក តំណាងទីភ្នាក់ងារសហប្រតិបត្តិការ ប្រទេសជប៉ុន (JICA) និងមន្ត្រីបច្ចេកទេសមួយចំនួនទៀត។ គួរជម្រាបជូនថា សម្រាប់គម្រោងកែលម្អការតភ្ជាប់ផ្លូវជនបទ ប្រភេទកំរាលDBST ក្រោមហិរញ្ញប្បទាន របស់ទីភ្នាក់ងារសហប្រតិបត្តិការ ប្រទេសជប៉ុន (JICA) ត្រូវអនុវត្តន៍ក្នុងខេត្តពោធិ៍សាត់ មានប្រវែងសរុប១៤៤.៩០គីឡូម៉ែត្រ ក្នុងនោះរួមមាន៖ ទី១៖ ផ្លូវអូតាប៉ោង-តាណៃ ប្រវែង១៨.២០គីឡូម៉ែត្រ ស្រុកបាកានទី២៖ ផ្លូវអណ្តូងក្រសាំង-ត្រាំពែ-ភូមិគៀន ប្រវែង១៧.៦០គីឡូម៉ែត្រ ស្រុកបាកាន/កណ្តៀងទី៣៖ ផ្លូវស្វាយដូនកែវ-ច្រប់-ស្ដុកឃ្លោក ប្រវែង១២.៩០គីឡូម៉ែត្រ ស្រុកបាកានទី៤៖ ផ្លូវវត្តទួលវែង ប្រវែង៩.៧០គីឡូម៉ែត្រ ក្រុងពោធិ៍សាត់ទី៥៖ ផ្លូវទួលចារ-កែវមុនី ប្រវែង៨.៨០គីឡូម៉ែត្រ ស្រុកកណ្តៀង/ក្រុងពោធិ៍សាត់ទី៦៖ ផ្លូវរលួស ប្រវែង១១.២០គីឡូម៉ែត្រ ស្រុកកណ្តៀង/ស្រុកក្រគរទី៧៖ ផ្លូវសន្ទ្រែ-ឈើតុំ ប្រវែង១៥គីឡូម៉ែត្រ ស្រុកភ្នំក្រវាញទី៨៖ ផ្លូវកញ្ជរ-កំពង់ពោធិ៍ ប្រវែង៥គីឡូម៉ែត្រ ស្រុកកណ្តៀង/ស្រុកក្រគរទី៩៖ ផ្លូវអូរសណ្តាន់-ស្នាអន្សា (មាត់ព្រៃ ជីចេះ) ប្រវែង៦.៥០គីឡូម៉ែត្រ ស្រុកក្រគរទី១០៖ ផ្លូវស្នាអន្សា-អន្លង់ត្នោត ប្រវែង១០.៣០គីឡូម៉ែត្រ ស្រុកក្រគរទី១១៖ ផ្លូវភូមិកាប៉ាស់លើ ប្រវែង៤.១០គីឡូម៉ែត្រ ស្រុកក្រគរទី១២៖ ផ្លូវអារ៉ងព្រួច-វិហារលួង ប្រវែង៨.៣០គីឡូម៉ែត្រ ស្រុកក្រគរទី១៣៖ ផ្លូវអង្កាញ់-ត្រាង-អូរព្រាល ប្រវែង៨.៥០គីឡូម៉ែត្រ ស្រុកបាកានទី១៤៖ ផ្លូវភូមិគៀន-ត្រាំពែ ប្រវែង៨.៨០គីឡូម៉ែត្រ ស្រុកកណ្តៀង/ស្រុកបាកាន។ លោកបណ្ឌិត លី ណារុន រដ្ឋលេខាធិការ តំណាងលោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានថ្លែងថា កិច្ចប្រជុំនេះ គឺធ្វើឡើងក្នុងគោលបំណង ដើម្បីបង្ហាញនូវវឌ្ឍនភាពគម្រោងកែលម្អការតភ្ជាប់ផ្លូវជនបទ (RRCIP) និងដើម្បីត្រៀមលក្ខណៈឱ្យបានគ្រប់ជ្រុងជ្រោយ ជុំវិញការដោះស្រាយផលប៉ះពាល់ទាំងឡាយទាំងពួង ធ្វើយ៉ាងណាកុំឱ្យមានការកកស្ទះ ដល់ការអនុវត្តគម្រោង។ លោកបណ្ឌិតបន្តថា ជាការពិតណាស់ថា ខេត្តពោធិ៍សាត់ គឺជាខេត្តពិសេសមួយ ដែលមានភ័ព្វសំណាងជាងខេត្តកំពង់ឆ្នាំង ខេត្តបាត់ដំបង និងខេត្តបន្ទាយមានជ័យ ដែលទទួលបានប្រវែងខ្សែផ្លូវច្រើនជាងគេ ក្នុងគម្រោងកែលម្អការតភ្ជាប់ផ្លូវជនបទ។ នេះក៏ដោយសារការខ្នះខ្នែង និងភាពឆ្លាតវៀងវៃ របស់លោក ធីម សុធារ៉ា ប្រធានមន្ទីរអភិវឌ្ឍន៍ជនបទខេត្ត ពិសេសក្រោមការដឹកនាំរបស់អភិបាលខេត្តពោធិ៍សាត់។ លោកបន្ថែមថា គម្រោងកែលម្អការតភ្ជាប់ផ្លូវជនបទ (RRCIP) ដែលទទួលបានថវិកាហិរញ្ញប្បទាន ពីទីភ្នាក់ងារសហប្រតិបត្តិការ ប្រទេសជប៉ុន (JICA) គឺមានភាពច្បាស់លាស់ ហ្មត់ចត់ និងមានស្តង់ដារខ្ពស់ ទាំងគុណភាព និងសោភណ្ឌភាព។ អ្វីទាំងអស់ អាចដំណើរការទៅបាន ក៏ដោយសារតែគ្រប់ភាគីពាក់ព័ន្ធ ធ្វើការសម្របសម្រួលដោះស្រាយ ពិសេសត្រូវបន្តផ្សព្វផ្សាយដល់ប្រជាពលរដ្ឋ ឱ្យពួកគាត់បានដឹង ពីផលប្រយោជន៍នៃគម្រោងនេះ និងត្រូវឱ្យពួកគាត់មានការចូលរួម ធ្វើយ៉ាងណាកុំឱ្យមានការរាំងស្ទះដល់ការអនុវត្តគម្រោង នៅដើមឆ្នាំ២០២៦ខាងមុខ ពុំដូច្នេះ គម្រោងនេះនឹងត្រូវកាត់ចោល ឬលើកទៅបណ្តាខេត្តដ៏ផ្សេងទៀត។ លោក លឹម សុខតូ អភិបាលរងនៃគណៈអភិបាលខេត្ត តំណាងលោក ខូយ រីដា អភិបាលនៃគណៈអភិបាលខេត្តពោធិ៍សាត់ បានថ្លែងអំណរគុណ ដល់ថ្នាក់ដឹកនាំក្រសួងអភិវឌ្ឍន៍ជនបទ ក៏ដូចជាទីភ្នាក់ងារសហប្រតិបត្តិការ ប្រទេសជប៉ុន (JICA) និងមន្ត្រីបច្ចេកទេស ដែលផ្តល់ការគាំទ្រ ក្នុងការស្ថាបនាកសាងផ្លូវ ចំនួន១៤ខ្សែ ប្រវែងសរុប ១៤៤.៩០គីឡូម៉ែត្រ ខណៈដែលផ្លូវទាំងអស់នេះ ពិតជាមានតម្រូវការខ្ពស់ ក្នុងការតភ្ជាប់ដល់ការធ្វើដំណើរ និងដឹកជញ្ជូនកសិផល របស់បងប្អូនប្រជាពលរដ្ឋ ក៏ដូចប្រជាកសិករ។ ជាមួយគ្នានោះ លោកក៏សូមស្នើដល់រដ្ឋបាលខេត្ត និងរដ្ឋបាលក្រុងស្រុក ឃុំសង្កាត់ ធ្វើការផ្សព្វផ្សាយ និងធ្វើការដោះស្រាយផលប៉ះពាល់ទៅតាមលទ្ធភាព ដើម្បីឱ្យខ្សែផ្លូវទាំង១៤ខ្សែនេះ ឈានទៅសម្រេចតាមគ្រោងទុក និងគ្មានការរាំងស្ទះ៕