ឯកឧត្តម ប៉េង ពោធិ៍នា ប្រធានក្រុមការងារគណបក្សចុះមូលដ្ឋានស្រុកកោះធំ អញ្ជើញជាអធិបតីក្នុងពិធីពិនិត្យ ព្យាបាល វាស់ភ្នែក និងកាត់វ៉ែនតា ដោយឥតគិតថ្លៃជូនប្រជាជនស្រុកកោះធំ ដោយក្រុមគ្រូពេទ្យភ្នែកស្ម័គ្រចិត្ត ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន នាព្រឹកថ្ងៃអាទិត្យ ទី២៥ ខែឧសភា ឆ្នាំ២០២៥ ឯកឧត្តម ប៉េង ពោធិ៍នា សមាជិកគណៈអចិន្ត្រៃយ៍នៃគណៈកម្មាធិការកណ្ដាល ប្រធានគណៈកម្មាធិការគណបក្សក្រសួងសាធារណការ និងដឹកជញ្ជូន និងជាប្រធានក្រុមការងារគណបក្សចុះមូលដ្ឋានស្រុកកោះធំ បានអញ្ជើញជាអធិបតីក្នុងពិធីពិនិត្យ ព្យាបាល វាស់ភ្នែក និងកាត់វ៉ែនតា ដោយឥតគិតថ្លៃជូនប្រជាជនស្រុកកោះធំ ដោយក្រុមគ្រូពេទ្យភ្នែកស្ម័គ្រចិត្តឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ដែលដឹកនាំដោយ ឯកឧត្តម ជិត ប៉ុណ្ណារ៉ា ជាអនុប្រធានក្រុមគ្រូពេទ្យភ្នែកស្ម័គ្រចិត្ត និងមានការចូលរួមពី ឯកឧត្តម លោកជំទាវ អនុប្រធាន សមាជិក សមាជិកា ក្រុមការងារគណបក្សចុះមូលដ្ឋានស្រុកកោះធំ ក្រុមវេជ្ជបណ្ឌិត ក្រុមគ្រូពេទ្យ ព្រមទាំងក្រុមការងារបច្ចេកទេសផ្សេងទៀត និងក្រុមការងារចុះមូលដ្ឋានឃុំ លោក លោកស្រី អាជ្ញាធរគ្រប់លំដាប់ថ្នាក់ និងប្រជាពលរដ្ឋជាច្រើនរូប។ ពិធីនេះ ឡើងកើតចេញពីស្មារតីមនុស្សធម៌សុទ្ធសាធ និងស្ដែងចេញពីទឹកចិត្តស្រឡាញ់ និងយកចិត្តទុកដាក់ពីសំណាក់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារគណបក្សចុះមូលដ្ឋានខេត្តកណ្តាល ដែលតែងតែគិតគូរចំពោះសុខទុក្ខប្រជាពលរដ្ឋនៅមូលដ្ឋាន។ ថ្លែងក្នុងអង្គពិធី ឯកឧត្តមប្រធាន ថ្លែងអំណរគុណដល់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន តាមរយៈ ឯកឧត្តម ជិត ប៉ុណ្ណារ៉ា និងលោកជំទាវ និងអរគុណក្រុមការងារគណបក្សចុះមូលដ្ឋាន ព្រមទាំងអាជ្ញាធរដែនដី ដែលបានសម្របសម្រួលរៀបចំកម្មវិធីនេះឡើង ព្រមទាំង ឯកឧត្តម លោក លោកស្រីវេជ្ជបណ្ឌិត គ្រូពេទ្យ និងក្រុមការងារបច្ចេកទេសពាក់ព័ន្ធទាំងអស់ ដែលបានលះបង់នូវពេលវេលា កម្លាំងកាយ ចិត្ត ក្នុងកម្មវិធីស្ម័គ្រចិត្តថ្ងៃនេះ ដែលជាការរួមចំណែកអនុវត្តគោល នយោបាយ និងកម្មវិធីនានារបស់គណបក្សប្រជាជនកម្ពុជា តាមរយៈការផ្តល់សេវា ពិនិត្យ ព្យាបាល និងថែទាំសុខភាពភ្នែកជូនប្រជាជននៅស្រុកស្អាង ដោយមិនគិតថវិកា និងមិនគិតពីនិន្នាការនយោបាយ។ ទន្ទឹមនឹងនេះ ឯកឧត្តមប្រធាន ក៏បានអំពាវនាវដល់ប្រជាពលរដ្ឋទាំងអស់ សូមអញ្ជើញទៅធ្វើបច្ចុប្បន្នភាពបញ្ជីឈ្មោះបោះឆ្នោត ដែលរួមមានរូបថត និងស្នាមមេដៃ និងជំរុញកូនចៅគ្រប់អាយុបោះឆ្នោត ទៅចុះឈ្មោះនៅតាមឃុំរបស់ខ្លួន ដែលនឹងត្រូវបិទបញ្ចប់ថ្ងៃទី២៦ ខែឧសភានេះ និងសូមបងប្អូនទាំងអស់បន្តផ្តល់សេចក្តីទុកចិត្តជូនគណបក្សប្រជាជនកម្ពុជា៕