ភ្នំពេញ ៖ គិតត្រឹមខែមីនា ឆ្នាំ២០២៥ គម្រោងសាងសង់កំណត់ផ្លូវជាតិលេខ៧ ពីស្គន់ទៅកាន់ទីរួមខេត្តកំពង់ចាម សម្រេចប្រមាណ៤៣ភាគរយ ដែលនឹងអាចបញ្ចប់មុនផែនការកំណត់ ។ នេះបើតាមលោកលឹម ស៊ីដេនីន រដ្ឋលេខាធិការក្រសួងសាធារណការនិងដឹកជញ្ជូន ក្នុងឱកាសចុះពិនិត្យគម្រោងសាងសង់ផ្លូវជាតិលេខ៧កាលពីពេលថ្មីៗនេះ ។លោកបន្តថា នៅដាច់ខែមីនា ឆ្នា ២០២៥នេះ ការសាងសង់ផ្លូវជាតិលេខ៧ ចាប់ពីរង្វង់មូលស្គន់ នឹងចាប់ផ្ដើមក្រាលថ្ម ធ្វើសួនកណ្ដាលផ្លូវបានជាបណ្ដើរៗហើយ ដើម្បីសម្រួលដល់ការធ្វើដំណើររបស់ប្រជាពលរដ្ឋឆ្លងកាត់ផ្លូវមួយនេះ ។ លោកបន្តថា ចាប់ពីរង្វង់មូលស្គន់ ដល់ទីរួមខេត្តកំពង់ចាម បានពង្រីកទទឹងផ្លូវចំនួន២៤ម៉ែត្រ និងសាងសង់ស្ពានចំនួន៨ស្ពា ន និងមានពីរគន្លងទៅនិងពីរកន្លងមក ។ បើតាមផែនការគម្រោងនេះ នឹងបញ្ចប់នៅអំឡុងខែកក្កដា ឆ្នាំ ២០២៧ ប៉ុន្តែបើតាមមើលជាក់ស្ដែង និងតាមការវាយតម្លៃគម្រោងមួយនេះ អាចនឹងបញ្ចប់នៅអំឡុងឆ្នាំ ២០២៦ ខណៈបច្ចុប្បន្ននេះ សម្រេចបាន៤៣ភាគរយហើយ ។ គួរបញ្ជាក់គម្រោងផ្លូវជាតិលេខ៧ពីស្គន់ ទៅទីរួមខេត្តកំពង់ចាមមានប្រវែងជាង៤៥គីឡូម៉ែត្រ និងចំណាយទឹកប្រាក់សាងសង់ប្រមាណ ១១៧លានដុល្លារអាមេរិក ដែលជាឥណទានសម្បទានពីរដ្ឋាភិបាលនៃប្រទេសចិន ៕