សិក្ខាសាលាផ្សព្វផ្សាយលទ្ធផលនៃការអនុវត្តគម្រោង ASEAN Blue Innovation Challenge ក្រោមប្រធានបទ «អនាគតនៃអាហារដោយការប្រើប្រាស់ប្រព័ន្ធសម្អាត និងបំប្លែងសំណល់សារធាតុចិញ្ចឹមពីក្នុងទឹកអាងចិញ្ចឹមត្រី ដើម្បីប្រើប្រាស់ក្នុងការដាំបន្លែនៅលើទឹក ដើរដោយថាមពលពន្លឺព្រះអាទិត្យ» ទីស្តីការក្រសួង៖ នាថ្ងៃទី២០ ខែមីនា ឆ្នាំ២០២៥ ឯកឧត្តម ឡាវ វ៉ាន់ រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីបើកវគ្គសិក្ខាសាលាផ្សព្វផ្សាយលទ្ធផលនៃការអនុវត្តគម្រោង ASEAN Blue Innovation Challenge ក្រោមប្រធានបទ «អនាគតនៃអាហារដោយការប្រើប្រាស់ប្រព័ន្ធសម្អាត និងបំប្លែងសំណល់សារធាតុចិញ្ចឹមពីក្នុងទឹកអាងចិញ្ចឹមត្រីដើម្បី ប្រើប្រាស់ក្នុងការដាំបន្លែនៅលើទឹក ដើរដោយថាមពលពន្លឺព្រះអាទិត្យ» ដោយមានការអញ្ជើញចូលរួម ពី ឯកឧត្ដមនាយកវិទ្យាស្ថាន ឯកឧត្តមទីប្រឹក្សាក្រសួង ថ្នាក់ដឹកនាំ និងមន្រ្ដីរាជការវិទ្យាស្ថាន មន្ដ្រី-បុគ្គលិកមកពីគ្រឹះស្ថានឧត្ដមសិក្សា ស្ថាប័នស្រាវជ្រាវ ក្រុមហ៊ុនមកពីវិស័យពាក់ព័ន្ធ និងនិស្សិតវិទ្យាស្ថាន ប្រមាណ១០០នាក់។ សិក្ខាសាលានេះត្រូវបានធ្វើឡើងក្នុងគោលបំណង ដើម្បីផ្សព្វផ្សាយអំពីលទ្ធផលនៃការអនុវត្ដគម្រោង ពង្រឹងចំណេះដឹង ជំនាញ អត្ថប្រយោជន៍ និងនវានុវត្តន៍ដល់ដៃគូ និងភាគីពាក់ព័ន្ធនានា និងចែកសៀវភៅណែនាំស្តីពីការឌីហ្សាញ និងប្រតិបត្តិការ និងថែទាំ ហើយក៏ជាផ្នែកមួយក្នុងការអនុវត្តគម្រោងផងដែរ។ ថ្លែងក្នុងកម្មវិធីសិក្ខាសាលានេះ ឯកឧត្ដមរដ្ឋលេខាធិការ គូសបញ្ជាក់ថា សៀវភៅណែនាំស្ដីពី ការឌីហ្សាញ ប្រតិបត្ដិការ និងការថែទាំប្រព័ន្ធរុក្ខវារីវប្បកម្ម ដែលត្រូវបានផ្សព្វផ្សាយនាពេលនេះ នឹងអាចចូលរួមចំណែកជាធាតុចូលបន្ថែមទៀត ដល់អង្គភាព និងស្ថាប័នពាក់ព័ន្ធ ក្នុងការអនុវត្ដការងាររបស់ខ្លួនហើយក៏អាចក្លាយជាឯកសារពិគ្រោះសម្រាប់ការសិក្សាស្រាវជ្រាវបន្ថែមទៀតនាពេលអនាគត។ ទន្ទឹមនឹងនេះ ថ្លែងក្នុងមតិបិទកម្មវិធី ឯកឧត្ដមនាយកវិទ្យាស្ថានបានលើកឡើងថា វិទ្យាស្ថានតេជោសែន សាធារណការ និងដឹកជញ្ជូន (TSIPWT) នៃក្រសួងសាធារណការ និងដឹកជញ្ជូន បាននិងកំពុងចូលរួមយ៉ាងសកម្ម និងប្រកបដោយភាពច្នៃប្រឌិត ដើម្បីប្រើប្រាស់នូវជំនាញទឹកកខ្វក់ ដើម្បីចូលរួមចំណែក សម្រេចបាននូវចក្ខុវិស័យរបស់រាជរដ្ឋាភិបាល ក្នុងការអភិវឌ្ឍន៍ប្រកបដោយចីរភាព៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube