កិច្ចប្រជុំពិភាក្សាគណៈកម្មការរៀបចំសេចក្ដីព្រាងកិច្ចព្រមព្រៀង ស្តីពីការគ្រប់គ្រង ថែទាំ និងប្រើប្រាស់ស្ពានមិត្តភាពកម្ពុជា-ថៃ (ស្ទឹងបត់-បានណងអៀន) នៅប្រទេសថៃ នៅថ្ងៃទី២០ ដល់ថ្ងៃទី២១ ខែកុម្ភៈ ឆ្នាំ២០២៥ ឯកឧត្ដម ហេង រត្នពិសិដ្ឋ អគ្គនាយកសាធារណការ និងជាប្រធានក្រុមការងារអន្ដរក្រសួងសម្របសម្រួល និងចរចារកិច្ចព្រមព្រៀងស្ដីពីការគ្រប់គ្រង និងថែទាំស្ពានមិត្តភាពកម្ពុជា-ថៃ (ស្ទឹងបត់-បានណងអៀន) បានដឹកនាំគណៈប្រតិភូកម្ពុជា ចូលរួមកិច្ចប្រជុំពិនិត្យពិភាក្សា និងចរចាលើសេចក្ដីព្រាងកិច្ចព្រមព្រៀងស្ដីពីការគ្រប់គ្រង និងថែទាំស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ជាមួយគណៈប្រតិភូថៃ នៅខេត្តជលបុរី ប្រទេសថៃ ដែលមានការចូលរួមពីតំណាងក្រសួងមហាផ្ទៃ ក្រសួងការបរទេសនិងសហប្រតិបត្តិការអន្ដរជាតិ ទីស្ដីការគណៈរដ្ឋមន្ដ្រី អគ្គនាយកដ្ឋានគយនិងរដ្ឋាករកម្ពុជា តំណាងរដ្ឋបាលខេត្តបន្ទាយមានជ័យ ប្រធានមន្ទីរសាធារណការ និងដឹកជញ្ជូនខេត្តបន្ទាយមានជ័យ និងមន្ដ្រីបច្ចេកទេស នៃក្រសួងសាធារណការ និងដឹកជញ្ជូន។ កិច្ចប្រជុំបានពិនិត្យ ពិភាក្សា និងចរចាលើសេចក្ដីព្រាងកិច្ចព្រមព្រៀងនេះ ដោយឈរលើស្មារតីភាពជាអ្នកជិតខាងល្អ និងភាពជាដៃគូយុទ្ធសាស្រ្ត រហូតឈានទៅរកការឯកភាពរួមគ្នាលើការប្រើប្រាស់ពាក្យពេចន៍ទៅតាមមាត្រានីមួយៗ ជាពិសេសគឺបានសម្រេចបញ្ចប់ការចរចាលើមាត្រាដែលកំណត់អំពីការមិនប្រមូលយកកម្រៃសេវាឆ្លងកាត់ស្ពានមិត្តភាពកម្ពុជា-ថៃ(ស្ទឹងបត់-បានណងអៀន)។ ភាគីទាំងពីរនឹងពិភាក្សា ប្រឹក្សាយោបល់ និងឯកភាពលើការប្រមូលកម្រៃសេវាឆ្លងកាត់ស្ពាននាពេលអនាគត។ សេចក្ដីព្រាងកិច្ចព្រមព្រៀង ស្ដីពីការគ្រប់គ្រង និងថែទាំស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ត្រូវបានការរំពឹងទុកថា នឹងអាចនឹងចុះហត្ថលេខាដោយភាគីទាំងពីរ ក្នុងពេលឆាប់ៗខាងមុខ ក្នុងឆ្នាំ២០២៥ នេះ ហើយក៏ក្លាយជាសមិទ្ធផលមួយសម្រាប់ចូលរួមអបអរសាទររំលឹកខួបអនុស្សាវរីយ៍លើកទី៧៥ នៃចំណងការទូតរវាងប្រទេសទាំងពីរ កម្ពុជា-ថៃ ផងដែរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube