ជំនួបសម្តែងការគួរសម និងពិភាក្សាការងារជាមួយគណៈប្រតិភូវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (Economic Research Institute for ASEAN and East Asia) ទីស្តីការក្រសួង ៖ នាថ្ងៃសុក្រទី២១ ខែ កុម្ភៈ ឆ្នាំ២០២៥ ឯកឧត្តម នឹម សុធា អនុរដ្ឋលេខាធិការ និងជាប្រធានគណៈកម្មាធិការបច្ចេកទេសអន្តរក្រសួង ដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្រ្តជាតិសម្រាប់គ្រប់គ្រង និងអភិវឌ្ឍវិស័យយានយន្តអគ្គិសនី តំណាងដ៏ខ្ពស់ខ្ពស់ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញទទួលជួបសម្តែងការគួរសម និងពិភាក្សាការងារជាមួយគណៈប្រតិភូ វិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា ដឹកនាំដោយ លោក Jeremy Gross នាយកប្រតិបត្តិ កិច្ចការមេគង្គ និងការកសាងសមត្ថភាព (Mekong Affairs and Capacity Building) ដោយមានការអញ្ជើញចូលរួមពីលោកអគ្គនាយករងនៃអគ្គនាយកដ្ឋានដឹកជញ្ជូនផ្លូវគោក លោកប្រធាននាយកដ្ឋានដឹកជញ្ជូនសាធារណៈក្រុង ព្រមទាំងមន្ត្រីជំនាញពាក់ព័ន្ធជាច្រើនរូបផងដែរ។ ជំនួបនេះ ត្រូវបានប្រព្រឹត្តឡើងក្នុងគោលបំណង ដើម្បីពិភាក្សាអំពីការរៀបចំសិក្ខាសាលាពាក់ព័ន្ធទៅនឹងការចងក្រងសៀវភៅអាស៊ានណែនាំស្តីពីយានយន្តអគ្គិសនី និងការគ្រប់គ្រងសំណល់អាគុយ ក្រោមជំនួយឧបត្ថម្ភពី វិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា ហៅកាត់ថា ERIA៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube