កិច្ចប្រជុំពិភាក្សាលើក្របខណ្ឌសហប្រតិបត្ដិការ រវាងវិទ្យាស្ថានតេជោសែន សាធារណការ និងដឹកជញ្ជូន និងសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់កម្ពុជា ទីស្តីការក្រសួង៖ នារសៀលពុធ ទី១២ ខែកុម្ភៈ ឆ្នាំ២០២៥ ឯកឧត្ដម ប្រាងហង្ស សេរីរិទ្ធ នាយកវិទ្យាស្ថាន បានអញ្ជើញជួបប្រជុំពិភាក្សាជាមួយគណៈប្រតិភូនៃសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់កម្ពុជា ដឹកនាំដោយ លោកជា ចាន់ដារ៉ា ប្រធានសមាគម ដោយមានការចូលរួមពីដឹកនាំថ្នាក់ដឹកនាំវិទ្យាស្ថាន និងមន្រ្តីបច្ចេកទេសវិទ្យាស្ថានផងដែរ។ គោលបំណងសំខាន់នៃកិច្ចប្រជុំនេះ គឺដើម្បីពិនិត្យលទ្ធភាពបង្កើតកិច្ចសហប្រតិបត្ដិការ ក្នុងក្របខណ្ឌអប់រំ និងបណ្ដុះបណ្ដាលធនធានមនុស្ស ក្នុងជំនាញភស្តុភាកម្ម និងខ្សែច្រវាក់ផ្គត់ផ្គង់ និងជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក។ ជាលទ្ធផលកិច្ចប្រជុំនេះ វិទ្យាស្ថាន និងសមាគម បានឯកភាពលើការធ្វើកិច្ចសហប្រតិបត្តិការក្នុងក្របខណ្ឌអប់រំជាមួយគ្នា ដែលផ្ដោតលើកិច្ចការមួយចំនួន រួមមាន៖ ១).ការផ្តល់ឱកាសកម្មសិក្សា ការហាត់ការ និងផ្សព្វផ្សាយឱកាសការងារជូនដល់និស្សិត ២).ការរៀបចំវគ្គបណ្តុះបណ្តាលខ្លី ឬកម្មវិធីបាឋកថាចែករំលែកបទពិសោធន៍ដល់និស្សិត និង ៣).ការផ្ដល់ធនធានមនុស្សរបស់សមាគមមកបង្រៀននៅវិទ្យាស្ថាន។ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube