កិច្ចប្រជុំសម្របសម្រួលជាមួយភាគីពាក់ព័ន្ធ ស្ដីពីការកសាងកិច្ចសហការរួមគ្នាសម្រាប់សន្តិសុខទឹក និងភាពធន់នៅបឹងទន្លេសាប ភ្នំពេញ៖ នាថ្ងៃទី២៧ ខែមករា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជាសមាជិកសមាសភាពរបស់អាជ្ញាធរទន្លេសាប បានអញ្ជើញចូលរួមកិច្ចប្រជុំសម្របសម្រួលជាមួយភាគីពាក់ព័ន្ធស្ដីពី "ការកសាងកិច្ចសហការរួមគ្នាសម្រាប់សន្តិសុខទឹក និងភាពធន់នៅបឹងទន្លេសាប" ក្រោមអធិបតីភាព ឯកឧត្តម ហ៊ែល តូនី អនុប្រធានអចិន្ត្រៃយ៍ អាជ្ញាធរទន្លេសាប តំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប រួមជាមួយនឹង លោកស្រី Tania Mayer ប្រធានគ្រប់គ្រងប្រចាំប្រទេសនៃធនាគារពិភពលោកប្រចាំកម្ពុជា ដោយមានកិច្ចសហការជាមួយ ធនាគារពិភពលោក (WBG), ក្រសួងការបរទេស និងពាណិជ្ជកម្មអូស្ត្រាលី(DFAT) និង Australian Water Partnership (AWP) ក្នុងការអនុវត្តកម្មវិធីវាយតម្លៃសន្តិសុខ និងភាពធន់នៃបឹងទន្លេសាប សម្រាប់ឆ្នាំ ២០២៤-២០២៦ ដោយមានការចូលរួមពី សមាជិក-សមាជិកា អាជ្ញាធរទន្លេសាប ក្រសួង- ស្ថាប័នពាក់ព័ន្ធ ជុំវិញបឹងទន្លេសាប ស្ថាប័នអប់រំ ស្រាវជ្រាវ និងដៃគូអភិវឌ្ឍន៍ផងដែរ។ កិច្ចប្រជុំត្រូវបានធ្វើឡើងក្នុងគោលបំណងបង្កើននូវការយល់ដឹងអំពីកម្មវិធីសន្តិសុខទឹក និងបញ្ហាប្រឈមនៅក្នុងតំបន់បឹងទន្លេសាប និងស្ទឹងសំខាន់ៗទាំង១១ ដើម្បីផ្ដល់ការគាំទ្រគោលនយោបាយនានាដែលពាក់ព័ន្ធ ក្នុងការចូលរួមឯកភាពគ្នាក្នុងការបង្កើតឡើងនូវការគ្រប់គ្រងអាងទន្លេសាប ព្រមទាំងការសម្រេចចិត្តផ្អែកលើភស្តុតាងនានា សម្រាប់បង្កើតនូវផែនការអភិវឌ្ឍពហុដំណាក់កាលរយៈពេលវែងសម្រាប់ទន្លេសាបប្រកបដោយនិរន្តរភាព និងកិច្ចសហការផ្លាស់ប្តូរចំណេះដឹង បង្កើតកម្មវិធី និងការពង្រឹងសមត្ថភាពរវាងភាគីពាក់ព័ន្ធ។ ជាលទ្ធផល នៃអង្គប្រជុំ បានឯកភាពគ្នានូវការចែករំលែក និងពិភាក្សាក្នុងចំណោមភាគីពាក់ព័ន្ធអំពីទស្សនៈទានសម្រាប់ការអភិរក្ស និងការអភិវឌ្ឍតំបន់បឹងទន្លេសាប ក៏ដូចជាការកសាងរួមបញ្ចូលគ្នាសម្រាប់សន្តិសុខទឹក និងភាពធន់នៅបឹងទន្លេសាប ដោយអនុលោមទៅតាមផែនការចូលរួមរបស់គម្រោង ការពិគ្រោះយោបល់ជាបន្តបន្ទាប់ ការចែករំលែកផ្លាស់ប្តូរចំណេះដឹង និងត្រូវរៀបចំឡើងជាជំហានសំខាន់ៗ ក្រោមគម្រោងសម្រាប់កម្មវិធីសន្តិសុខទឹក និងភាពធន់នៃបឹងទន្លេសាប៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube