ភ្នំពេញ ៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន បានឱ្យដឹងថា ក្នុងឆ្នាំ២០២៤ ផ្លូវជាតិនិងផ្លូវខេត្តប្រវែងជាង២ម៉ឺនគីឡូម៉ែត្រ ត្រូវបានក្រសួងសាធារណការគ្រប់គ្រងនិងស្ថាបនា ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ។ ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន បានមានប្រសាសន៍ថា ការលើក កម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្ទីក និងការអភិវឌ្ឍហេដ្ឋារចនាសម្ព័ន្ធដឹកជញ្ជូន តាមរយៈការតភ្ជាប់ និងការអភិវឌ្ឍហេដ្ឋារចនាសម្ព័ន្ធផ្លូវថ្នល់ បច្ចុប្បន្ន ក្រសួងបាននិងកំពុងធ្វើការគ្រប់គ្រង និងស្ថាបនាផ្លូវជាតិ និង ផ្លូវខេត្តសរុបចំនួន ៨៥៤ខ្សែ មានប្រវែងសរុប ២០ ៣០៧គីឡូម៉ែត្រ បានក្រាលកៅស៊ូ និងបេតុង សរុបប្រវែង ១១ ៦៤៩គីឡូម៉ែត្រស្មើនឹង ៥៧% នៃប្រវែងផ្លូវសរុប ក្នុងនោះ ផ្លូវជាតិកម្រិត១ មាន ចំនួន ៩ខ្សែ មានប្រវែង ២ ២៥៤គីឡូម៉ែត្រ បានក្រាលកៅស៊ូ និងបេតុងបាន១០០%, ផ្លូវជាតិ កម្រិត២ មានចំនួន ៧១ខ្សែ មានប្រវែង ៥ ១២០គីឡូម៉ែត្រ បានក្រាលកៅស៊ូ និងបេតុង បាន ៤ ០១០គីឡូម៉ែត្រ ស្មើនឹង៧៨%, និងផ្លូវខេត្ត មានចំនួន៧៧៤ខ្សែ មានប្រវែង ១២ ៩៣២គីឡូម៉ែត្រ បានក្រាលកៅស៊ូ និងបេតុងបាន ៥ ៣៨៤គីឡូម៉ែត្រ ស្មើនឹង ៤២%។ ឯកឧត្តម បានបន្តថា ក្រសួងក៏បានរៀបចំពិធីសម្ពោធបើកឱ្យប្រើប្រាស់ជាផ្លូវការ វិថីតេជោសន្តិភាពឆ្នេរអង្គោល នៅខេត្តកែប និងសម្ពោធជានិមិត្តរូបប្រសិទ្ធនាមខ្សែផ្លូវក្រវាត់ក្រុងទី៣ ជា “មហាវិថី ស៊ី ជីនពីង” ក្រោម អធិបតីភាពដ៏ខ្ពង់ខ្ពស់ សម្តេចធិបតីនាយករដ្ឋមន្ត្រី។ ឯកឧត្តម បានបន្តថា ក្រសួងក៏បានបញ្ចប់គម្រោងសាងសង់ កំណាត់ផ្លូវជាតិលេខ៧ (ស្រុកស្នួល-ក្រុងក្រចេះ), ផ្លូវជាតិ លេខ៣១, ផ្លូវជាតិលេខ៣៣, ផ្លូវជាតិលេខ៤១, ផ្លូវជាតិលេខ៧១សេ ដែលគម្រោងទាំងអស់នេះ ក្រសួងគ្រោងនឹងគោរពស្នើសុំ សម្តេចធិបតីនាយករដ្ឋមន្ត្រី ដើម្បីរៀបចំពិធីសម្ពោធ បើកឱ្យប្រើប្រាស់ជាផ្លូវការនាពេលវេលាសមស្របខាងមុខ។ បន្ថែមពីនោះទៀត ក៏បានសាងសង់ ជួសជុល ថែទាំ និងត្រួតពិនិត្យបច្ចេកទេសហេដ្ឋារចនាសម្ព័ន្ធផ្លូវ-ស្ពាន ដោយ ប្រើប្រាស់ថវិកាជាតិ រួមមាន ជួសជុលខួបសម្រាប់ផ្លូវថ្នល់ ប្រវែងសរុប ២៥៧គីឡូម៉ែត្រ, សាងសង់ ផ្លូវថ្មី ប្រវែងសរុប ៣៣៣គីឡូម៉ែត្រ, ថែទាំខួប សម្រាប់ស្ពានប្រវែងសរុប ១ ៥០០ម៉ែត្រ, សាងសង់ស្ពានថ្មី ប្រវែងសរុប ១ ២៤៤ម៉ែត្រ, ថែទាំប្រចាំផ្លូវជាតិ និងផ្លូវខេត្តចំនួន ៥៧៩ខ្សែ ប្រវែងសរុប ១១ ៩២៥គីឡូម៉ែត្រ និងថែទាំប្រចាំស្ពានធំៗចំនួន ១៩ស្ពាន ប្រវែង សរុប ១ម៉ឺន ៤ពាន់ម៉ែត្រ។ ឯកឧត្តមបានបន្តថា ក្រសួងសាធារណការក៏បាននិងកំពុងអនុវត្តគម្រោងសាងសង់ រួមមាន ផ្លូវល្បឿនលឿនភ្នំពេញ-ក្រុងបាវិត, ផ្លូវជាតិ លេខ៤(ភ្នំពេញ-ព្រះសីហនុ), កំណាត់ផ្លូវជាតិលេខ៥ (សិរីសោភ័ណ-ប៉ោយប៉ែត), កំណាត់ ផ្លូវជាតិលេខ៧ (ស្គន់-កំពង់ចាម), ផ្លូវជាតិលេខ១០ (សំឡូត-វាលវែង-កោះកុង), ផ្លូវជាតិ លេខ២៣(ស្រុកកោះធំ-ស្រុកលើកដែក), ផ្លូវជាតិលេខ៤៨(ស្រែអំបិល-កោះកុង), ផ្លូវជាតិលេខ ៧៣(ក្រចេះ-ត្បូងឃ្មុំ), ផ្លូវខេត្តលេខ៣១២(ខេត្តព្រៃវែង-ច្រកព្រំដែនបន្ទាយចក្រី), ផ្លូវខេត្ត លេខ៣៧៧ និងលេខ៣៧៧A ខេត្តក្រចេះ, ស្ពានឆ្លងកាត់ទន្លេមេគង្គ ខេត្តក្រចេះ, ស្ពាន ឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) និងស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ)។ បន្ថែមពីនោះ ក៏បានត្រៀមអនុវត្តគម្រោងអាទិភាព រួមមាន កំណាត់ផ្លូវជាតិលេខ៦(ត្រពាំងធំ-ស្លក្រាម), កំណាត់ ផ្លូវជាតិលេខ៧ (រមាត-ត្រពាំងគ្រៀល), កំណាត់ផ្លូវជាតិលេខ៣ (ត្រពាំងរពៅ-វាលរេញ), ផ្លូវភ្ជាប់ក្រុងសៀមរាបទៅកាន់អាកាសយានដ្ឋានអន្តរជាតិសៀមរាបអង្គរ, ផ្លូវជាតិលេខ៥០សេ (កំពង់ឆ្នាំង-កំពង់ធំ) និងស្ពានឆ្លងកាត់ទន្លេសាប, ផ្លូវខ្សែក្រវាត់ក្រុងទី៣ ត្រើយខាងកើតទន្លេ មេគង្គ, កំណាត់ផ្លូវជាតិលេខ៨ (ព្រែកតាមាក់-ស្វាយអន្ទរ), ផ្លូវជាតិតភ្ជាប់ខេត្តបាត់ដំបង- សៀមរាប, ផ្លូវជាតិលេខ៧៨-៥(រតនគិរី បានលុង-កន្ទុយនាគ ព្រំប្រទល់កម្ពុជា-វៀតណាម), និងស្ពានមិត្តភាពកម្ពុជា-កូរ៉េ (ផ្សារចាស់-ជ្រោយចង្វារ-អរិយក្សត្រ)៕