កំពង់ផែទេសចរណ៍អន្តរជាតិខេត្តកំពត ស្ថិតនៅជាប់នឹងដងព្រែក ដែលមានចម្ងាយ ៦ គីឡូម៉ែត្រពីក្រុងកំពត តម្លៃជាង ១៨ លានដុល្លារ នឹងបើកសម្ពោធជាផ្លូវការនៅថ្ងៃទី ០៣ ខែមេសា ឆ្នាំ ២០២៥ ខណៈបច្ចុប្បន្នកំពុងដាក់ឱ្យប្រើប្រាស់ជាបណ្ដោះអាសន្ន។កំពង់ផែទេសចរណ៍ខេត្តកំពតបានបញ្ចប់ការសាងសង់នៅឆ្នាំ ២០២២ តែមិនអាចដាក់ឲ្យប្រើប្រាស់ដោយសារផ្លូវនាវាចរណ៍មានជម្រៅទឹករាក់ មិនអាចឲ្យនាវាបើកចេញចូលបាន។ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាមានប្រសាសន៍ នៅក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន នៅថ្ងៃទី ២៣ ខែមករា ឆ្នាំ ២០២៥ នេះថា៖ «កំពង់ផែទេសចរណ៍កំពតជា សហថាមពលដ៏សំខាន់សម្រាប់តភ្ជាប់ ការកសាងហេដ្ឋារចនាសម្ព័ន្ធ ផ្លូវទឹក ផ្លូវគោក ផ្លូវអាកាសនេះ ចាំបាច់ ដរាបណាទំនិញនៅតែបញ្ជូនតាមរថយន្ត កប៉ាល់ ប្រព័ន្ធនេះនឹងនៅរាប់រយឆ្នាំទៀត»។កំពង់ផែទេសចរណ៍ខេត្តកំពត បានអភិវឌ្ឍឡើងក្រោមកម្ចីថវិការបស់ធនាគារអភិវឌ្ឍន៍អាស៊ី ADB ជាង ១៨ លានដុល្លារ ស្ថិតនៅជាប់ដងព្រែកចម្ងាយប្រមាណ ៦ គីឡូម៉ែត្រ ពីក្រុងកំពត។ កំពង់ផែនេះបានចាប់ផ្តើមសាងសង់កាលពីឆ្នាំ ២០១៨ ហើយបញ្ចប់ការសាងសង់ទាំងស្រុងនៅចុងខែមិថុនា ឆ្នាំ២០២២ លើផ្ទៃដីទំហំជាង ៤ ហិកតា។ តាមរយៈកំពង់ផែទេសចរណ៍ខេត្តកំពត អាចភ្ជាប់ទៅនឹងកំពង់ផែក្នុងខេត្តព្រះសីហនុ ខេត្តកោះកុង កោះរ៉ុង ហើយក៏ភ្ជាប់ទៅកំពង់ផែកោះត្រល់ និងកំពង់ផែដទៃទៀតនៅប្រទេសវៀតណាម និងប្រទេសថៃផងដែរ៕