មន្ត្រីជំនាញនៃក្រសួងសាធារណការ និងដឹកជញ្ជូន កំពុងពិនិត្យសិក្សាស្រាវជ្រាវលម្អិតដើម្បីជំរុញការចាប់ផ្ដើមសាងសង់ស្ពានមិត្ដភាពកម្ពុជា-កូរ៉េ តភ្ជាប់ពីផ្សារចាស់-ជ្រោយចង្វារ, ជ្រោយចង្វារ-អរិយក្សត្រ ដោយនៅក្នុងនោះមានការខួងយកសំណាកដីពិនិត្យតាមលក្ខណៈបច្ចេកទេសផងដែរ ដើម្បីត្រៀមចាក់គ្រឹះ។ នេះបើតាមការបញ្ជាក់ពីក្រសួងសាធារណការ និងដឹកជញ្ជូន។ តើនៅពេលស្ពាននេះលេចចេញជារូបរាង នោះនឹងផ្ដល់អត្ថប្រយោជន៍យ៉ាងណាខ្លះទាំងវិស័យសេដ្ឋកិច្ច សង្គម និងទេសចរណ៍ជាដើម? លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានបញ្ជាក់ប្រាប់វិទ្យុវាយោថា ស្ពានដែលគ្រោងនឹងសាងសង់នេះមានសារប្រយោជន៍ច្រើនស្ទើរគ្រប់វិស័យសម្រាប់សេដ្ឋកិច្ចកម្ពុជានិងប្រជាជន។ ទាក់ទងនឹងប្រយោជន៍សេដ្ឋកិច្ចអ្នកជំនាញរូបនេះថា ពលរដ្ឋដូចទទួលបានកាដូមាសដូច្នោះដែរ។រីឯទិដ្ឋភាពសង្គម គម្រោងស្ពានមិត្ដភាពកម្ពុជា-កូរ៉េ ដែលតភ្ជាប់ពីផ្សារចាស់-ជ្រោយចង្វារ, ជ្រោយចង្វារ-អរិយក្សត្រ បានធ្វើឱ្យប្រជាពលរដ្ឋសាទរជាខ្លាំង ព្រោះពួកគេនឹងទទួលបានផ្លែផ្កាទាំងរូបីនិងអរូបី។ សូម្បីតែមិនទាន់លេចរូបរាងផង ប្រជាពលរដ្ឋបានបង្ហាញនូវភាពរីករាយរួចទៅហើយ។ដោយឡែក សម្រាប់ទិដ្ឋភាពស្ថាបត្យកម្មនិងទេសចរណ៍វិញ លោកបណ្ឌិត ហុង វណ្ណៈ បានគូសរំលេចដែរថា ស្ពាននេះនឹងឆ្លុះបញ្ចាំងពីភាពល្អឯកមួយដែលមានស្ពានឆ្លងកាត់ទន្លេដ៏ធំនៅមុខព្រះបរមរាជវាំង ដែលមិនធ្លាប់មានទេនៅក្នុងប្រវត្ដិសាស្ដ្រកម្ពុជា។ ទាក់ទងនឹងវិស័យទេសចរណ៍ ប្រជាពលរដ្ឋអាចផ្លាស់ប្ដូរបរិយាកាសតាមរយៈការទៅកម្សាន្ដនៅតំបន់អរិយក្សត្រ ឬតំបន់ក្បែរៗនោះ។បច្ចុប្បន្ននៅមិនទាន់មានការបញ្ជាក់ច្បាស់ការឡើយថា គម្រោងមានតម្លៃជាង២០០លានដុល្លារនេះអាចនឹងបើកការដ្ឋានសាងសង់ជាផ្លូវការនៅពេលណា ប៉ុន្ដែតាមព័ត៌មានលេចលឺកន្លងមក បើគ្មានការប្រែប្រួលទេអាចនឹងចាប់ផ្ដើមក្នុងរង្វង់ខែមិថុនា ឆ្នាំ២០២៥។ គួរជម្រាបថា ស្ពានមិត្តភាពកម្ពុជា-កូរ៉េ ជាប្រភេទស្ពានខ្សែកាប(Two cable stayed bridges) ដែលប្រវែងស្ពានគឺ២,៣៧៥ម៉ែត្រ ទទឹង២៧,៥ម៉េត្រ ,ប្រវែងផ្លូវក្បាលស្ពានសរុប(Approach road) ១,១៧៤ម៉ែត្រ ទទឹងផ្លូវ២២,៥ម៉ែត្រ៕