ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោ ប៉េង ពោធិ៍នា និងលោក ឃួង ស្រេង អភិបាលរាជធានីភ្នំពេញ បានដឹកនាំមន្ត្រីជំនាញ អាជ្ញាធរដែនដី ចុះពិនិត្យ និងសិក្សាពីស្ថានភាពផ្លូវ ៦០ម៉ែត្រ ដើម្បីរកមធ្យោបាយធ្វើយ៉ាងណាឱ្យផ្លូវនេះកាត់បន្ថយបាននូវការគ្រោះថ្នាក់ចរាចរណ៍។ ការចុះសិក្សានេះ បន្ទាប់ពីផ្លូវនេះកេីតមាននូវគ្រោះថ្នាក់ចរាចរណ៍ផ្ទួនៗគ្នា បណ្តាលឱ្យមានមនុស្សស្លាប់ និងរបួសជាច្រេីននាក់រួចមក។ ក្រោយចុះត្រួតពិនិត្យ នៅសៀលថ្ងៃទី១២ ខែមករា ឆ្នាំ២០២៥ ក្រសួងសាធារណការ និងដឹកជញ្ជូន និងរដ្ឋបាលរាជធានីភ្នំពេញ បានឯកភាពគ្នាមួយ ដោយសម្រេចបង្កើនកម្លាំងនគរបាល រួមនឹងការរឹតបណ្តឹងការផាកពិន័យចំពោះ អ្នកបើកបរមិនគោរពច្បាប់ចរាចរណ៍ និងបើកបរលើសល្បឿនកំណត់នៅលើកំណត់ផ្លូវ ៦០ម៉ែត្រ ក្នុងមូលដ្ឋានខណ្ឌមានជ័យ និងខណ្ឌដង្កោ។ ពាក់ព័ន្ធការងារខាងលើ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានបញ្ជាក់ឲ្យដឹងថា ក្នុងឱកាសនៃការចុះត្រួតពិនិត្យនៅលើដងផ្លូវ៦០ម៉ែត្រ (សម្ដេចតេជោ ហ៊ុន សែន) ខាងលើ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងលោក ឃួង ស្រេង អភិបាលរាជធានីភ្នំពេញ បានឯកភាពគ្នាលើចំណុចមួយចំនួន រួមមាន នៅលើកំណត់ផ្លូវ ៦០ម៉ែត្រ ត្រូវបង្កើនកម្លាំងនគរបាល ដើម្បីត្រួតពិនិត្យការអនុវត្តច្បាប់ចរាចរណ៍ និងការផាកពិន័យចំពោះអ្នកបើកបរលើសល្បឿនកំណត់ ពោលគឺ កម្លាំងត្រូវអនុវត្តការងារដោយភាពទទួលខុសត្រូវ និងតឹងរឹងជាងមុន។ ក្រៅពីនេះ ត្រូវគូសគំនូសសញ្ញាចរាចរណ៍ជាថ្មី និងដាក់ភ្លើងស្តុបថ្មីបន្ថែមទៀត និបន្ថែមចំណាំងផ្លាតលើផ្លូវនេះ ដើម្បីកាត់បន្ថយគ្រោះថ្នាក់ចរាចរណ៍ និងផ្ដល់ភាពងាយស្រួលក្នុងការធ្វើដំណើរទាំងពេលយប់ទាំងពេលថ្ងៃ។ លោកប្រធានមន្ទីរ បានបន្តថា ការដាក់កាមេរ៉ាសុវត្ថិភាព ដាក់ផ្លាកសញ្ញាកំណត់ល្បឿន គឺចាប់ពីភ្លើងស្តុបមែកសឺដែសដល់ស្ពានអាកាស (មរតកតេជោ) អាចបើកបរក្នុងល្បឿន ៤០គីឡូម៉ែត្រក្នុងមួយម៉ោង។ ចាប់ពីផ្លូវជាតិលេខ២ មកដល់ភ្លើងស្តុបមែកសឺដែស កំណត់ល្បឿន៦០គីឡូម៉ែត្រ ក្នុងមួយម៉ោង។ ក្នុងឱកាសនោះដែរលោករដ្ឋមន្ត្រី និងអភិបាលរាជធានីភ្នំពេញ ក៏បានចែកមួកសុវត្ថិភាព ដល់ប្រជាពលរដ្ឋដែលបានឆ្លើយសំណួរបានត្រឹមត្រូវ ពាក់ព័ន្ធនឹងច្បាប់ចរាចរណ៍ ជាមួយនឹងការអំពាវនាវឲ្យប្រជាពលរដ្ឋទាំងអស់ ត្រូវគោរពគោរពច្បាប់ចរាចរណ៍ដោយពាក់មួកសុវត្ថិភាពឲ្យបានត្រឹមត្រូវ ចៀសវាងឲ្យបាននូវហេតុការណ៍គ្រោះថ្នាក់ចរាចរណ៍ ដោយក្នុងរយៈពេលប៉ុន្មានថ្ងៃកន្លងមកនេះ មានហេតុការណ៍គ្រោះថ្នាក់ចរាចរណ៍ លើបណ្តោយផ្លូវ៦០ម៉ែត្រនេះ៕