គម្រោងសង់ផ្លូវក្រវាត់ព្រំដែន ក្រោមមូលនិធិហេដ្ឋារចនាសម្ព័ន្ធតាមព្រំដែនជិត ២៧លានដុល្លារ បាននិងកំពុងរីកចម្រើនគួរឱ្យកត់សម្គាល់ បើគិតចាប់តាំងពីថ្ងៃបើកការដ្ឋានសាងសង់កាលពីថ្ងៃទី៤ ខែវិច្ឆិកា ឆ្នាំ២០២៤ រហូតមកទល់បច្ចុប្បន្នមានរយៈពេល ២ខែហើយ។ ខាងក្រោមនេះជាសមិទ្ធិផលសំខាន់ៗមួយចំនួននៃគម្រោងជាប្រវត្តិសាស្ត្រសម្រាប់ប្រទេសកម្ពុជា៖ ប្រតិបត្តិការដោះមីន៖-ក្រុមការងារបានធ្វើការបោសសម្អាតគ្រាប់យុទ្ធភណ្ឌមិនទាន់ផ្ទុះបានទំហំ ១.៤៦២.៥០០ម៉ែត្រការ៉េ (ដែលក្នុងនោះនៅខេត្តមណ្ឌលគិរីមានទំហំ ១.២២៥.០០០ម៉ែត្រការ៉េ និង ២៣៧,៥០០ ម៉ែត្រការ៉េ ស្ថិតនៅខេត្តរតនគិរី) ។ ក្នុងអំឡុងពេលរាវរកគ្រាប់មីន ក្រុមការងារបានរកឃើញគ្រាប់រំសេវចំនួន ២៣គ្រាប់ រួមទាំងគ្រាប់ប្រភេទប៊ុមប៊ី ឬគ្រាប់បែកចង្កោមចំនួន ៦គ្រាប់។ បញ្ជាការដ្ឋានវិស្វកម្ម នៃកងយោធពលខេមរភូមិន្ទ កំពុងបន្តធ្វើការងារនេះដោយមិនមានភាពនឿយហត់ ដើម្បីធានាបានថា នៅតំបន់នោះមានសុវត្ថិភាព។ ការងារឈូសឆាយ៖ -ការងារឈូសឆាយបើកមុខផ្លូវខ្សែដំបូងមានទទឹង ៥ម៉ែត្រ សម្រេចបានប្រវែង ៥៨,៥គីឡូម៉ែត្រ (ក្នុងនោះខេត្តមណ្ឌលគិរីមានប្រវែង ៤៩គីឡូម៉ែត្រ និងខេត្តរតនគិរីមានប្រវែង ៩,៥គីឡូម៉ែត្រ) ។ -ការងារឈូសផ្លូវដែលមានទទឹង ២០ម៉ែត្រ សម្រាប់រកអ័ក្សផ្លូវ ដោយលុបជ្រលងអូរ បន្ទាបចំណោទភ្នំ សម្រេចបានប្រវែង ៣៦គីឡូម៉ែត្រ (ក្នុងនោះ ២៧,៩គីឡូម៉ែត្រស្ថិតក្នុងខេត្តមណ្ឌលគិរី និង ៨,៧គីឡូម៉ែត្រក្នុងខេត្តរតនគិរី)។ -ការសាងសង់ប្រឡាយ សម្រេចបានប្រវែង ៣០,២០គីឡូម៉ែត្រ (ក្នុងនោះខេត្តមណ្ឌលគិរី ២០,៦០ គីឡូម៉ែត្រ និងខេត្តរតនគិរី ៧,៦ គីឡូម៉ែត្រ)។ -ការសាងសង់តួផ្លូវ និងចិតជញ្ជាំងភ្នំ សម្រេចបានប្រវែង ២៥គីឡូម៉ែត្រ (២២គីឡូម៉ែត្រក្នុងខេត្តមណ្ឌលគិរី និង ៣គីឡូម៉ែត្រនៅរតនគិរី) ។ -ការងារក្រាលកំទេចថ្ម សម្រេចបានជាស្ថាពរ ដែលមានប្រវែង ១០,២០ គីឡូម៉ែត្រ ស្ថិតិក្នុងខេត្តមណ្ឌលគិរី។ ក្រុមការងារ និងអង្គភាពវិស្វកម្ម នៅការដ្ឋានសាងសង់ផ្លូវក្រវាត់ព្រំដែន បានប្តេជ្ញាធ្វើការនេះដោយការទទួលខុសត្រូវខ្ពស់ ដើម្បីសម្រេចឱ្យបាននូវគម្រោងជាប្រវត្តិសាស្ត្រមួយនេះតាមផែនការដែលបានគ្រោងទុក។ ការខិតខំប្រឹងប្រែងឥតឈប់ឈររបស់ពួកគេកំពុងត្រួសត្រាយផ្លូវសម្រាប់អនាគតដ៏ត្រចះត្រចង់សម្រាប់កម្ពុជា។ គួររំលឹកថា រាជរដ្ឋាភិបាលកម្ពុជា បានបើកការដ្ឋានសាងសង់ផ្លូវក្រវ៉ាត់ព្រំដែនប្រវែង ២៥០គ.ម ក្រោមមូនិធិសរុបជិត ២៦.៩៦៧.៦០៩លានដុល្លារអាមេរិក នៅថ្ងៃទី១ វិច្ឆិការ ឆ្នាំ២០២៤ និងគ្រោងបញ្ចប់នៅចុងខែមេសា ឆ្នាំ២០២៧។