កិច្ចប្រជុំផ្ទៃក្នុងរបស់អគ្គនាយកដ្ឋានរដ្ឋបាល និងហិរញ្ញវត្ថុ ដើម្បីពិនិត្យលើលទ្ធផលអនុវត្តការងារឆ្នាំ២០២៤ និងលើកទិសដៅការងារឆ្នាំ២០២៥ ដើម្បីគាំទ្រប្រសិទ្ធភាពការងារនៅក្នុងវិស័យសាធារណការ និងដឹកជញ្ជូន ទីស្តីការក្រសួង៖ ថ្ងៃទី១៨ ខែធ្នូ ឆ្នាំ២០២៤ ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ បានអញ្ជើញដឹកនាំកិច្ចប្រជុំផ្ទៃក្នុងរបស់អគ្គនាយកដ្ឋាន ដើម្បីពិនិត្យលើលទ្ធផលអនុវត្តការងារឆ្នាំ២០២៤ និងលើកទិសដៅការងារឆ្នាំ២០២៥ ដោយមានការចូលរួមពី លោក លោកស្រីជាថ្នាក់ដឹកនាំអគ្គនាយកដ្ឋាន លោក លោកស្រីជាប្រធាននាយកដ្ឋាន អនុប្រធាននាយកដ្ឋាន និងមន្រ្តីពាក់ព័ន្ធមួយចំនួន។ ជាការកត់សម្គាល់លើលទ្ធផលអនុវត្តសកម្មភាពការងារដែលបានដាក់ចេញនៅក្នុងឆ្នាំ២០២៤ អគ្គនាយកដ្ឋានរដ្ឋបាល និងហិរញ្ញវត្ថុ និងនាយកដ្ឋានក្រោមឱវាទទាំងអស់ បានអនុវត្តការងារ និងសម្រេចលទ្ធផលជារួមបានប្រមាណ ៩៥% ធៀបនឹងផែនការលម្អិតចំនួន ១២៤សកម្មភាព និងមានផែនការសកម្មភាពសំខាន់ៗមួយចំនួនផ្សេងទៀតនៅក្រៅផែនការប្រចាំឆ្នាំ ដែលអគ្គនាយកដ្ឋានបានអនុវត្តស្របតាមគោលការណ៍សម្រេចផ្សេងៗពីប្រមុខរាជរដ្ឋាភិបាល និងតាមការណែនាំរបស់ថ្នាកដឹកនាំក្រសួង។ ជាទិសដៅការងារបន្ត អគ្គនាយកដ្ឋានរដ្ឋបាល និងហិរញ្ញវត្ថុ បានជ្រើសរើសសកម្មភាពការងារសំខាន់ៗពាក់ព័ន្ធនឹងការគាំទ្រលើវិស័យសាធារណការ និងដឹកជញ្ជូន ដោយផ្តោតលើការងារកំណែទម្រង់រដ្ឋបាលសាធារណៈ ការគ្រប់គ្រងប្រសិទ្ធភាពរដ្ឋបាល និងការប្រើប្រាស់ប្រព័ន្ធឌីជីថលនៅក្នុងបរិបទការងារ, ការងារកំណែទម្រង់ហិរញ្ញវត្ថុសាធារណៈ ការគ្រប់គ្រងចំណូលចំណាយ និងទ្រព្យសម្បត្តិរដ្ឋ, រួមជាមួយនឹងការងារពាក់ព័ន្ធនឹងកិច្ចសហការប្រតិបត្តិការអន្តរជាតិ និងការងារផ្នែកច្បាប់ និងកិច្ចការនីតិកម្មផងដែរ។ ឆ្លៀតក្នុងឱកាសនេះ ឯកឧត្តមប្រធានអង្គប្រជុំ បានកោតសរសើរ និងថ្លែងអំណរគុណដល់ថ្នាក់ដឹកនាំអគ្គនាយកដ្ឋាន និងមន្រ្តីក្រោមឱវាទទាំងអស់ ដែលបានចូលរួមអនុវត្តការងារប្រកបដោយការទទួលខុសត្រូវខ្ពស់ ស្របតាមការប្រគល់ភារកិច្ច ហើយ ឯកឧត្តមប្រធានអង្គប្រជុំ ក៏បានណែនាំនូវសកម្មភាពការងារអាទិភាពចំពោះមុខ ដើម្បីត្រៀមសហកាអនុវត្ត រួមមាន ការងាររៀបចំសិក្ខាសាលាផ្សព្វផ្សាយលើការងារវិភាគមុខងារ និងរចនាសម្ព័ន្ធរបស់ក្រសួងសាធារណការ និងដឹកជញ្ជូន និងក្រសួងមុខងារសាធារណៈ និងការងាររៀបចំសន្និបាតបូកសរុបការងារឆ្នាំ២០២៤ និងទិសដៅការងារឆ្នាំ២០២៥ របស់ក្រសួង ដើម្បីធានាឱ្យបាននូវដំណើរការប្រព្រឹត្តទៅបានរលូន និងទទួលបានលទ្ធផលជោគជ័យ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube