ក្រសួងសាធារណការ និងដឹកជញ្ជូន រៀបចំវគ្គបណ្តុះបណ្តាល ស្តីពីវិធីសាស្ត្រក្នុងការសរសេរសំណើគម្រោង ទីស្តីការក្រសួង៖ នាព្រឹកថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២៤ ឯកឧត្តម កែន រដ្ឋា អគ្គនាយក នៃអគ្គនាយកដ្ឋានរដ្ឋបាល និងហិរញ្ញវត្ថុ ក្រសួងសាធារណការ និងដឹកជញ្ជូន បានអញ្ជើញថ្លែងស្វាគមន៍បើកវគ្គបណ្តុះបណ្តាល ស្តីពីវិធីសាស្ត្រក្នុងការសរសេរសំណើគម្រោង ដែលជាវគ្គបណ្តុះបណ្តាលទី២ បន្ទាប់ពីវគ្គបណ្តុះបណ្តាល ស្តីពីពិធីការជាតិ ពិធីការអន្តរជាតិ និងការតាក់តែងលិខិតរដ្ឋបាលផ្ទៃក្នុង រៀបចំឡើងដោយអគ្គនាយកដ្ឋានរដ្ឋបាល និងហិរញ្ញវត្ថុ។ វគ្គបណ្តុះបណ្តាលនេះមានការអញ្ជើញចូលរួមពីមន្ត្រីបង្គោលទទួលបន្ទុកលើការងារពាក់ព័ន្ធពីបណ្តាអង្គភាពរដ្ឋបាលថ្នាក់កណ្តាល និងមន្ទីរសាធារណការ និងដឹកជញ្ជូនរាជធានី-ខេត្ត សរុបប្រមាណ ១២០នាក់។ វគ្គបណ្ដុះបណ្ដាលនេះរៀបចំឡើងក្នុងគោលបំណង ដើម្បីលើកកម្ពស់ចំណេះដឹងសិក្ខាកាមឱ្យកាន់តែមានសមត្ថភាពក្នុងការសរសេរសំណើរគម្រោងប្រកបដោយទំនុកចិត្ត និងប្រសិទ្ធភាពខ្ពស់ តាមរយៈការចែករំលែកនូវបច្ចុប្បន្នភាពចំណេះដឹង ជំនាញ និងបទពិសោធន៍ពាក់ព័ន្ធនឹងទម្រង់បែបបទ នីតិវិធី និងវិធីសាស្ត្រនៃការសរសេរសំណើរគម្រោង ឱ្យមានភាពត្រឹមត្រូវស្របតាមស្តង់ដា។ វគ្គបណ្ដុះបណ្ដាលនេះ បាន និងកំពុងប្រព្រឹត្តទៅរយៈពេល២ថ្ងៃ គឺនៅថ្ងៃទី ២០-២១ ខែវិច្ឆិកា ឆ្នាំ២០២៤ ដោយមានការចូលរួមធ្វើបទបង្ហាញពីវាគ្មិនកិត្តិយស ឯកឧត្តមសាស្ត្រាចារ្យមហាបរិញ្ញា ហោ ប៊ុនឡេង ជំនាញការជាន់ខ្ពស់តំណាងទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន(JICA) ប្រចាំនៅកម្ពុជា និងតំណាងមកពីក្រុមប្រឹក្សាអភិវឌ្ឍន៍កម្ពុជា (CDC)៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube