កិច្ចប្រជុំតាមដានការអនុវត្តការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្តកំពង់ឆ្នាំង និងខេត្តពោធិ៍សាត់ ក្រោមអធិបតីភាព ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស ខេត្តកំពង់ឆ្នាំង និងពោធិ៍សាត់៖ នៅថ្ងៃចន្ទ ទី២១ ខែតុលា ឆ្នាំ២០២៤ នៅមន្ទីរសាធារណការ និងដឹកជញ្ជូនខេត្តកំពង់ឆ្នាំង និងខេត្តពោធិ៍សាត់ ឯកឧត្តម សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស អមដំណើរដោយ ឯកឧត្តម ម៉ី ម៉ារ៉ាឌី អនុរដ្ឋលេខាធិការ ក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស បានអញ្ជើញជាអធិបតី ក្នុងកិច្ចប្រជុំតាមដានការអនុវត្តការងារត្រួតពិនិត្យយានយន្តកែច្នៃខុសលក្ខណៈបច្ចេកទេសនៅខេត្តកំពង់ឆ្នាំង និងខេត្តពោធិ៍សាត់ ដោយមានការអញ្ជើញចូលរួមពី ឯកឧត្តម ឈិន សេងងួន អភិបាលរង នៃគណៈអភិបាលខេត្តកំពង់ឆ្នាំង និង ឯកឧត្តម ឡាយ វិសិដ្ឋ អភិបាលរង នៃគណៈអភិបាលខេត្តពោធិ៍សាត់ លោកស្នងការរងនគរបាលខេត្ត បញ្ជាការរងកងរាជអាវុធហត្ថខេត្ត ប្រធាននាយកដ្ឋាន អនុប្រធាននាយកដ្ឋាន ប្រធានមន្ទីរសាធារណការ និងដឹកជញ្ជូនខេត្ត នាយករងការិយាល័យនគរបាលខេត្ត អនុប្រធានមន្ទីរសាធារណការ និងដឹកជញ្ជូនខេត្ត ប្រធានការិយាល័យ អនុប្រធានការិយាល័យ និងមន្រ្តីពាក់ព័ន្ធរបស់ក្រុមការងារជាច្រើនរូបទៀតផងដែរ។ កិច្ចប្រជុំធ្វើឡើងក្នុងគោលបំណងផ្សព្វផ្សាយសេចក្តីសម្រេចលេខ ០៣១/២៤ ចុះថ្ងៃទី៨ ខែសីហា ឆ្នាំ២០២៤ ស្តីពីការតែងតាំងសមាសភាពក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេស និងតាមដានការអនុវត្តការងាររបស់ រាជធានី ខេត្ត ពាក់ព័ន្ធនឹងការងារត្រួតពិនិត្យយានយន្តកែច្នៃខុសលក្ខណៈបច្ចេកទេស។ ឯកឧត្តមប្រធានក្រុមការងារ បានថ្លែងកោតសរសើរ និងវាយតម្លៃខ្ពស់ចំពោះក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្ត ដែលបានអនុវត្តការងាររបស់ខ្លួនបានយ៉ាងម៉ឺងម៉ាត់ និងឥតឈប់ឈរ ដោយមិនមានការលើកលែងចំពោះយានយន្តកែច្នៃខុសលក្ខណៈបច្ចេកទេសនាពេលកន្លងមក។ ក្រុមការងារថ្នាក់ជាតិ បានយល់ស្របចំពោះការលើកឡើងរបស់ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្ត៖ ១.ត្រូវអនុវត្តច្បាប់ស្តីពីចរាចរណ៍ផ្លូវគោកឱ្យបានតឹងរ៉ឹង ២.ជ្រើសរើសយានដ្ឋានណាមួយធ្វើជាគំរូ ដើម្បីធានាអំពីលក្ខណៈបច្ចេកទេសយានយន្តដោយត្រូវមានយន្តការគ្រប់គ្រង ត្រួតពិនិត្យច្បាស់លាស់ ៣.លុបបំបាត់ការអន្តរាគមន៍ក្នុងអំឡុងពេលអនុវត្តច្បាប់។ ក្រុមការងារថ្នាក់ជាតិ បានស្នើដល់ក្រុមការងារខេត្តចំនួន ៥ចំណុច រួមមាន៖ ១. ស្នើឱ្យចុះអនុវត្តការងារឱ្យបានយ៉ាងតិច ១ដងក្នុង១សប្តាហ៍ ២.ស្នើផ្តល់ទីតាំងកូអរដោនេចុះអនុវត្តសកម្មភាពត្រួតពិនិត្យរថយន្តកែច្នៃខុសលក្ខណៈបច្ចេកទេសក្នុងភូមិសាស្ត្រខេត្តរបស់ខ្លួនដើម្បីងាយស្រួលតាមដានការអនុវត្តការងារ ៣.ស្នើឱ្យអាជ្ញាធរមានសមត្ថកិច្ចចុះបិទយានដ្ឋានដែលមិនមានច្បាប់អនុញ្ញាត ៤.ស្នើឱ្យស្វែងរកយានដ្ឋានដែលមានអាជ្ញាបណ្ណ និងលក្ខណៈសម្បត្តិសមស្រប ដើម្បីធ្វើជាដៃគូក្នុងការកែយានយន្តខុសលក្ខណៈបច្ចេកទេសនោះឱ្យបានត្រឹមត្រូវតាមច្បាប់កំណត់វិញ ៥.ស្នើផ្តល់នូវសេចក្តីសម្រេច (ថ្មី) ស្តីពីការកែសម្រួលសមាភាពក្រុមការងារកែច្នៃខុសលក្ខណៈបច្ចេកទេសខេត្តពោធិ៍សាត់ មកក្រុមការងារលខាធិការដ្ឋាន៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube