ការចុះពិនិត្យវឌ្ឍនភាពនៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្នុងក្រុងសៀមរាប ដើម្បីធានាបានថាការតភ្ជាប់បណ្តាញលូមានភាពត្រឹមត្រូវតាមស្តង់ដារបច្ចេកទេស និងជាពិសេសជួបជាមួយប្រជាពលរដ្ឋដែលទទួលផលពីគម្រោង សៀមរាប៖ នាថ្ងៃព្រហស្បតិ៍ ទី១៧ ខែតុលា ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានចុះពិនិត្យការអនុវត្តគម្រោងលើកកម្ពស់ការផ្គត់ផ្គង់ទឹកស្អាតនិងអនាម័យ (WaSSIP) របស់ក្រុមការងារធនាគារពិភពលោក(WB) ទៅកាន់ខេត្តសៀមរាប ដោយមានការអញ្ជើញចូលរួមពី ក្រុមការងារគ្រប់គ្រងគម្រោង WaSSIP ក្រុមការងារធនាគារពិភពលោក តំណាងCTI-Consultant ក្រុមហ៊ុនម៉ៅការសាងសង់ ក្រុមហ៊ុនទីប្រឹក្សា និងមន្ត្រីជំនាញនៃមន្ទីរសាធារណការ និងដឹកជញ្ជូនខេត្តសៀមរាប ផងដែរ។ គោលបំណងនៃដំណើរបេសកកម្មនេះគឺដើម្បីចុះពិនិត្យការងារដោយផ្ទាល់នៅការដ្ឋានដែលកំពុងអនុវត្តសម្រាប់គម្រោងលើកកម្ពស់ការផ្គត់ផ្គង់ទឹកស្អាតនិងអនាម័យ(WaSSIP) ក្នុងន័យពិនិត្យលើកម្រិតបច្ចេកទេសតភ្ជាប់បណ្តាញលូត្រឹមត្រូវតាមស្តង់ដារស្របតាមកិច្ចសន្យាសាងសង់ ព្រមទាំងជួបប្រជុំពិភាក្សាការងារ ជាមួយក្រុមហ៊ុនទីប្រឹក្សា និងក្រុមហ៊ុនម៉ៅការសាងសង់ ពិនិត្យលើវឌ្ឍនភាពការងារ និងជាពិសេសជួបជាមួយប្រជាពលរដ្ឋដែលទទួលផលពីគម្រោងផងដែរ។ គួរបញ្ជាក់ផងដែរថា ក្នុងដំណើរបេសកកម្មនេះ ប្រតិភូបានចុះពិនិត្យការងារដោយផ្ទាល់នៅតាមខ្នងផ្ទះរបស់ប្រជាពលរដ្ឋ ទីប្រជុំជន តាមផ្សារ និងពិនិត្យលើទីតាំងមួយចំនួនដែលកំពុងសាងសង់ និងត្រៀមក្នុងការអនុវត្តការងារដាក់លូភ្ជាប់តាមខ្នងផ្ទះប្រជាពលរដ្ឋ និងបានចុះពិនិត្យការងារនៅស្ថានីយបូមទឹកកខ្វក់សាលាកន្សែងផងដែរ៕