ថ្នាក់ដឹកនាំក្លឹបហែលទឹកក្រសួងសាធារណការ និងដឹកជញ្ជូន ចុះសួរសុខទុក្ខ ពិនិត្យការហាត់សមរបស់កីឡាករ និងផ្តល់រង្វាន់លើកទឹកចិត្តចំពោះកីឡាការិនី ដែលទទួលបានជ័យលាភី ក្នុងការប្រកួតអន្តរជាតិ XVIII CMAS FINSWIMMING World Cup 2024 Round 4 ភ្នំពេញ ៖ ថ្ងៃទី ១៩ ខែកញ្ញា ឆ្នាំ២០២៤ ឯកឧត្តម ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្លឹបហែលទឹកក្រសួងសាធារណការ និងដឹកជញ្ជូន បានអញ្ជើញចុះសួរសុខទុក្ខ ពិនិត្យការហាត់សមរបស់កីឡាករក្លឹបហែលទឹកក្រសួង និងចូលរួមអបអរសាទរដល់កីឡាការិនី ហួន ទិត្យដាលីន ដែលទទួលបានជ័យលាភី ឈ្នះមេដាយប្រាក់ចំនួន ២ និងមេដាយសំរឹទ្ធិ ចំនួន ២ ក្នុងការប្រកួតអន្តរជាតិ XVIII CMAS FINSWIMMING World Cup 2024 Round 4 នាថ្ងៃទី ៥-១០ ខែកញ្ញា ឆ្នាំ២០២៤ នៅខេត្តភូកេត ប្រទេសថៃ កន្លងមក។ ឯកឧត្តម ហេង ណន បានជម្រាបជូននូវការផ្តាំសាកសួរសុខទុក្ខពីសំណាក់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងសម្តែងការកោតសរសើរចំពោះកីឡាករយើង ដែលបានខិតខំហ្វឹកហាត់ប្រកួតទទួលបានមេដាយគួរជាទីមោទន: ទាំងចំពោះបុគ្គលខ្លួនឯងផង ក្លឹបផង និងប្រទេសជាតិផង។ ស្ថិតក្នុងឱកាសនោះ ឯកឧត្តមប្រធានបានប្រគល់ថវិកាជាប្រាក់ឧបត្ថម្ភប្រចាំខែ និងប្រាក់រង្វាន់លើកទឹកចិត្តជូនដល់ក្លឹប និងកីឡាការិនីជ័យលាភីដោយផ្ទាល់ ជាមួយការក្រើនរំលឹកដល់កីឡាករទាំងអស់ ត្រូវបន្តខិតខំហ្វឹកហាត់បន្ថែមទៀត ព្រោះថានៅចុងឆ្នាំ២០២៤នេះ នឹងមានព្រឹត្តិការណ៍ប្រកួតសំខាន់ៗជាច្រើនទៀត ទាំងកម្រិតជាតិ និងអន្តរជាតិ៕