ភ្នំពេញ៖ លោក ជា ចាន់ដារ៉ា ប្រធានក្រុមប្រឹក្សាភិបាល និងជាប្រធានសមាគមពាណិជ្ជករដឹកជញ្ជូនទំនិញ និងខ្សែច្រវាក់ផ្គត់ផ្គង់នៅកម្ពុជា បានបង្ហាញអបអរសាទរ និងបានចាត់ទុក គម្រោងសាងសង់ផ្លូវ នៅខ្សែក្រវាត់ព្រំដែនកម្ពុជាជាមួយប្រទេសជិតខាង ជាពិសេសខេត្ត ដែលស្ថិតក្នុងតំបន់ត្រីកោណអភិវឌ្ឍន៍ (CLV-DTA) នោះ នឹងនាំមកនូវភាពងាយស្រួល ក្នុងការដឹកជញ្ជូនផលិតផលកម្ពុជា ទៅកាន់ទីផ្សារក្រៅប្រទេស។ មានប្រសាសន៍នៅក្នុងពិធីជំនួបម្ចាស់អាជីវកម្មនាំចេញ នាំចូល ក្រុមហ៊ុនដឹកជញ្ជូន និងឡូជីស្ទ៉ីក លើកទី៥ នៅយប់ថ្ងៃទី២៤ ខែសីហា ឆ្នាំ២០២៤, លោក ជា ចាន់ដារ៉ា បានបន្ថែមថា ការដែលកម្ពុជារៀបចំកសាងហេដ្ឋារចនាសម្ព័ន្ធផ្លូវថ្នល់ នៅតាមខ្សែក្រវាត់ព្រំដែននេះ នឹងជួយឱ្យសេដ្ឋកិច្ចកម្ពុជា កាន់តែមានភាពប្រសើរឡើង តាមរយៈការនាំចេញផលិតផលិតកម្ពុជា ជាពិសេសផលិតផលកសិកម្ម ទៅកាន់ប្រទេសជិតខាង។ «ប្រាកដណាស់, រយៈពេលខ្លីនេះ ក៏ឃើញអំពីការលើកឡើងរបស់រាជរដ្ឋាភិបាល ដែលចង់ឱ្យមានការបង្កើតផ្លូវក្រវាត់ព្រំដែនរបស់កម្ពុជា ជាមួយនឹងប្រទេសជិតខាងទាំងអស់ នេះវានឹងជួយជម្រុញសេដ្ឋកិច្ចកម្ពុជា និងផ្តល់ភាពងាយស្រួល ក្នុងការដឹកជញ្ជូនផលិតផលកម្ពុជា ទៅកាន់ប្រទេសដែលជាប់ព្រំដែនរបស់កម្ពុជា។ ដូច្នេះវាជាការល្អមួយ ដែលកម្ពុជា គួរតែបើកឱ្យធំទូលាយ ក្នុងការធ្វើយ៉ាងណា អាចនាំចេញផលិតផលកម្ពុជា ឱ្យបានកាន់តែច្រើន»។ នេះជាការលើកឡើងរបស់លោក ជា ចាន់ ដារ៉ា ក្នុងកិច្ចសម្ភាសន៍ជាមួយអ្នកសារព័ត៌មាន។ លោកប្រធានសមាគមពាណិជ្ជករដឹកជញ្ជូនទំនិញ និងខ្សែច្រវាក់ផ្គត់ផ្គង់នៅកម្ពុជា បានសង្កេតឃើញដែរថា កាលពីចុងឆ្នាំ២០២៣ មានកំណើនវិនិយោគបន្ថែម ពីបណ្តាប្រទេសផ្សេងៗមកកម្ពុជា ជាពិសេសគឺវិស័យកាត់ដេរសម្លៀកបំពាក់ វាយនភណ្ឌ និងមិនមែនវិស័យកាត់ដេរ គឺមានការកើនឡើង ដូច្នេះកត្តាទាំងនេះ នឹងរុញច្រានឱ្យសេដ្ឋកិច្ចកម្ពុជា ក្នុងឆ្នាំ២០២៤នេះ មានការកើនឡើង។ ជាក់ស្តែង យោងតាមទិន្នន័យផ្លូវការ រយៈពេល៦ខែឆ្នាំនេះ សេដ្ឋកិច្ចកម្ពុជា បានកើនឡើងជាបន្តបន្ទាប់ ហើយអាចនិយាយបានថា សេដ្ឋកិច្ចកម្ពុជា ឆ្នាំ២០២៤នេះ មានភាពល្អជាងឆ្នាំ២០២៣។ សូមរំលឹកថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការថ្លែងសារខួប១ឆ្នាំ នៃការបង្កើតរាជរដ្ឋាភិបាល អាណត្តិទី៧ នៃរដ្ឋសភា កាលពីថ្ងៃទី២២ ខែសីហា បានចាត់ទុក ការកសាងហេដ្ឋារចនាសម្ព័ន្ធតភ្ជាប់ តាមបណ្តោយព្រំដែន ជាពិសេសផ្លូវតាមខ្សែក្រវាត់ព្រំដែន គឺជាកិច្ចការមួយដ៏សំខាន់ ក្នុងការជួយជំរុញការអភិវឌ្ឍ នៅតាមតំបន់ព្រំដែនដាច់ស្រយាល។ សម្តេចធិបតីបានថ្លែងថា រាជរដ្ឋាភិបាលជាច្រើនអាណត្តិ តែងបានរៀបចំការជំរុញកសាងផ្លូវ តាមបណ្តោយខ្សែក្រវាត់ព្រំដែនកម្ពុជា ជាប់ព្រំដែនវៀតណាម ថៃ និងឡាវ តាំងពីឆ្នាំ១៩៩៤មក។ ការកសាងខ្សែក្រវាត់តាមបណ្តោយព្រំដែនរវាងកម្ពុជា វៀតណាម គិតរវាងពីឆ្នាំ២០១៧ មកដល់២០២២ គឺមានការកសាងផ្លូវប្រវែង៦៨៥.៩៦គីឡូម៉ែត្រ លើផែនការសរុប១,០៦៩គីឡូម៉ែត្រ ការកសាងផ្លូវតាមព្រំដែនជាប់ នឹងថៃចាប់ផ្តើមតាំងពីឆ្នាំ១៩៩៤ ដល់ឆ្នាំ២០២៣ បានប្រវែង៤៥៥.៥គីឡូម៉ែត្រ លើផែនការសារុប៥០៩គីឡូម៉ែត្រ និងការកសាងផ្លូវតាមខ្សែព្រំដែនកម្ពុជា ជាប់ នឹងប្រទេសឡាវរវាងពីឆ្នាំ២០១៥ ដល់២០២២ បានប្រវែង១៧៩.២ គីឡូម៉ែត្រ លើផែនការសារុប៣៧៧គីឡូម៉ែត្រ។ សម្តេចធិបតី បានថ្លែងបញ្ជាក់ថា កាលពីថ្ងៃទី៤ ខែកក្កដា ឆ្នាំ២០២៤ សម្តេចបានផ្តល់គោលការណ៍ឯកភាព លើបញ្ជាការដ្ឋានវិស្វកម្មអគ្គបញ្ជាការដ្ឋាន នៃកងយោធពលខេមរភូមិន្ទ សម្រេចបញ្ចប់ជំហានមួយ លើការបោះបង្គោលខណ្ឌសីមា និងការស្ថាបនាដែនគមនាគមន៍ តាមតំបន់ព្រំដែនកម្ពុជា ជាប់ប្រទេសថៃ ឡាវ និងវៀតណាម សម្រាប់រយៈពេល១០ ឆ្នាំ (២០២៤-២០៣៤) នៅលើដី ដែលបានឯកភាពគ្នារួចមកហើយ៕