ខេត្តបាត់ដំបង៖ ក្រោយកំណើនទឹកភ្លៀងនៅខេត្តបាត់ដំបងធ្លាក់ចុះក្នុងរយៈពេលមួយសប្តាហ៍ចុងក្រោយ ផ្លូវដែលបានរងការខូចខាតដោយសារទឹកជំនន់ជន់លិច ក្រុមហ៊ុនស្ថាបនាចាប់ផ្តើមសម្រុកជួសជុលឡើងវិញ ដើម្បីសម្រួលដល់ការធ្វើដំណើររបស់ប្រជាពលរដ្ឋ។ បើតាមប្រធានមន្ទីរសាធារណការ និងដឹកជញ្ជូនខេត្តបាត់ដំបង លោក ព្រួញ រិទ្ធ បានឱ្យដឹងកាលពីថ្ងៃទី១៤ ខែសីហា ឆ្នាំ២០២៤ នេះថា ដោយរយៈពេលមួយអាទិត្យចុងក្រោយនេះអាកាសធាតុអំណោយផលល្អ លោកក៏បានសម្របសម្រួលឱ្យក្រុមហ៊ុនស្ថាបនាផ្លូវរួសរាន់ធ្វើការ ដោយចាប់ផ្តើមជួសជុលផ្លូវដែលរងការខូចខាតក្រោយទឹកជំនន់ ខណៈបានធ្វើតេស្ត និងសិក្សាពីលក្ខណៈបច្ចេកទេសចប់។ ក្នុងនោះផ្លូវមួយចំនួនក្នុងក្រុងបាត់ដំបងដូចជា ផ្លូវភ្លោះនៅសួនព្រែកមហាទេព ផ្លូវខាងពេទ្យធំ ផ្លូវវត្តរំដួល និងផ្លូវមួយចំនួនទៀតបាននឹងកំពុងចាប់ផ្តើមជួសជុលបណ្តើៗជាមួយគ្នានោះលោកក៏បានបញ្ជាក់ផងដែរថា ចំពោះបញ្ហាលូទឹកកខ្វក់នៅក្នុងក្រុងបាត់ដំបង គឺមានទាំងប៉ែកខាងកើតស្ទឹង និងប៉ែកខាងលិចស្ទឹង ដោយសម្រាប់ប៉ែកខាងកើតស្ទឹងគឺដំណើរការជួសជុល និងស្ថាបនាសម្រេចបានប្រមាណជាង៩៥% ហើយចំណុចប៉ែកខាងលិចស្ទឹងនៅតែបន្តជួបបញ្ហាប្រឈម ដោយកំពុងស្ថាបនា ជំនន់ទឹកស្ទឹងបានហក់ឡើង បុកចូលក្រុងបណ្តាលឱ្យលិចផ្លូវមួយចំនួន ដែលជាហេតុធ្វើឱ្យរំខានដល់ការស្ថាបនាសាងសង់ ជាពិសេសបង្កការលំបាកដល់ប្រជាពលរដ្ឋដែលត្រូវធ្វើដំណើរឆ្លងកាត់។ យ៉ាងណាក្រោយជួបបញ្ហានេះលោកក៏អំពាវនាវឱ្យមានការយោគយល់ពីប្រជាពលរដ្ឋក្នុងក្រុងបាត់ដំបងទាំងមូល រួមទាំងអ្នកដំណើរឆ្លងកាត់ទាំងអស់ ព្រោះការស្ថាបនាសាងសង់ ការអភិវឌ្ឍគឺតែងតែជួបផលពិបាកដែលជៀសមិនផុត ហើយលោកក៏នឹងជម្រុញក្រុមការងារឱ្យរួសរាន់បញ្ចប់ការជួសជុលឱ្យបានឆាប់រហ័សទៅតាមផែនការ។គួរបញ្ជាក់ថា ក្រុងបាត់ដំបងកំពុងអនុវត្តគម្រោងស្តារប្រព័ន្ធលូរំដោះទឹកកខ្វក់ និងអាងប្រព្រឹត្តកម្មទឹកកខ្វក់ចេញក្រៅក្រុងនៅប៉ែកខាងកើតស្ទឹងសង្កែក្នុងសង្កាត់រតនៈ និងសង្កាត់ព្រែកព្រះស្ដេច ដោយគ្រោងនឹងបញ្ចប់ចុងឆ្នាំ២០២៤នេះ និងប៉ែកខាងលិចស្ទឹងសង្កែ ក្នុងសង្កាត់ស្វាយប៉ោ សង្កាត់ទួលតាឯក និងសង្កាត់ចំការសំរោង គ្រោងបញ្ចប់ចុងឆ្នាំ២០២៥ ក្រោមការគាំទ្រដោយថវិកាហិរញ្ញប្បទានពីធនាគារអភិវឌ្ឍន៍អាស៊ី (ADB) អនុវត្តដោយក្រសួងសាធារណការ និងដឹកជញ្ជូន។