ភ្នំពេញ៖ រដ្ឋបាលរាជធានីភ្នំពេញ គ្រោងនិងបង្កើត APP នៅក្នុងទូរស័ព្ទដៃ ដើម្បីបង្កើនភាពងាយស្រួល ដល់ប្រជាពលរដ្ឋ ដែលប្រើប្រាស់រថយន្ត ក្រុងសាធារណៈ ងាយស្រួល និងដឹងពីពេលវេលា ទីតាំងចំណត តម្រាយផ្លូវធ្វើដំណើរ ជាមួយគ្នានោះ គ្រោងនឹងបង្កើតប្រព័ន្ធទូទាត់បែប អេឡិកត្រូនិក ពីសាច់ប្រាក់មកជាការ ឆូតកាតផងដែរ ។ លោក មាស ម៉េតភក្តី អ្នកនាំពាក្យសាលារាជធានីភ្នំពេញ ប្រាប់ក្រុមអ្នកសារព័ត៌មាន ក្រោយកិច្ចប្រជុំ ស្តីពី ស្ថានភា ពនៃការគ្រប់គ្រង រដ្ឋាករស្វយ័តដឹកជញ្ជូន សាធារណៈរថយន្តក្រុង (City Bus) នៅព្រឹកថ្ងៃ២៨ សីហានេះ ក្រោមវត្តមាន លោក ឃួង ស្រេង អភិបាលនៃគណៈអភិបាលរាជធានីភ្នំពេញ ឲ្យដឹងថា ក្នុងកិច្ចប្រជុំដែលមានអាជ្ញាធរ ពាក់ព័ន្ធចូលរួមគ្រប់ភាគីលោក ឃួង ស្រេង បានរំលឹកឡើងវិញ ពីប្រសាសន៍សម្តេចតេជោ ដែលបានលើកឡើងកាល ពីពេលពេលកន្លងទៅថ្មីនេះ ដែលបានអនុញ្ញាតិឲ្យ កម្មករ-កម្មការិនី បានជិះរថយន្តក្រុងដោយ ឥតគិតប្រាក់រយៈពេលពីរឆ្នាំ ក្នុងនោះក៏បានណែនាំឲ្យ ភាគីពាក់ព័ន្ធយកចិត្តទុកដាក់ ក្នុងការអនុវត្តប្រសាសន៍ របស់សម្តេចតេជោដើម្បី ឲ្យមានប្រសិទ្ធិភាពផងដែរ ។ ជាមួយគ្នានោះដែរ អភិបាលរាជធានីភ្នំពេញ ក៏បានក្រើនរំលឹកដល់អ្នកបើកបរ រថយន្តក្រុងសាធារណៈទាំងអស់ ត្រូវមានក្រមសីលធម៌ វជ្ជាជីវៈ ជាអ្នកបើកបរ មានការយោគយល់ គោរពច្បាប់ចរាចណ៍ ដើម្បីបញ្ជៀសនៅ គ្រោះថ្នាក់ចរាចរណ៍ផ្សេងៗ រដ្ឋបាលរាជធានីភ្នំពេញ គ្រោងបង្កើតអោយមានលេខទូរស័ព្ទហតឡាញ Hot Line និងបង្ហាញនៅក្នុងរថយន្តក្រុងផ្ទាល់ ដើម្បីអោយប្រជាពលរដ្ឋងាយស្រួល ផ្តល់ដំណឺងជូនអាជ្ញាធរ ងាយស្រួលរកដំណោះស្រាយជូនប្រជាពលរដ្ឋ ដែលទទួលសេវាកម្មរថយន្តក្រុង ។ គួររំលឹកថា កាលពីថ្ងៃទី២០ ខែសីហានេះ រដ្ឋបាលរាជធានីភ្នំពេញ បានចេញសេចក្តីជូនដំណឹងមួយ ដល់កម្មករ កម្មការិនី ដើម្បីជួយ សំរួល ដល់ការ ចំណាយលើមធ្យាបាយប្រចាំថ្ងៃ សំដៅលើកកម្ពស់ ជីវភាពប្រចាំថ្ងៃ តាមប្រសាសន៍សម្តេចតេជោ នាយករដ្ឋមន្ត្រី ដែលអនុញ្ញាតិអឱ្យកម្មករ កម្មការិនី ជិះរថយន្តក្រុង គ្រប់ខ្សែរត់ក្នុងរាជធានីភ្នំពេញ ដោយមិនគិតថ្លៃសេវារយៈពេល ២ឆ្នាំ ដោយគ្រាន់តែ បង្ហាញ កាតការងារតែប៉ុណ្ណោះ ជាមួយគ្នានោះ លិខិតដដែលក៏បានឱ្យដឹងថា ដើម្បីឆ្លើយតបទៅនឹងសំណូមពរ ក៏ដូចជាសេចក្តី ត្រូវការលើ សេវាដឹកជញ្ជូនសាធារណៈរថយន្តក្រុង របស់ប្រជាពលរដ្ឋ ព្រះសង្ឃ ចាស់ជរា ជនពិការ កុមារ សិស្ស និស្សិត និងកម្មករ កម្មការិនី រដ្ឋបាលរាជធានី ក៏បានធ្វើការកែសម្រួលតម្រាយផ្លូវចាស់ ព្រមទាំងដាក់ដំណើរការ តម្រាយខ្សែរត់ថ្មីបន្ថែមទៀត ៕