កិច្ចប្រជុំទ្វេភាគីលើកទី៦ កម្រិតថ្នាក់ដឹកនាំរវាង កម្ពុជា-ជប៉ុន ពិភាក្សាលើកិច្ចសហប្រតិបត្តិការបច្ចេកទេសលើការងារប្រព័ន្ធលូទឹកកខ្វក់ ក្នុងមូលបទ “ជំរុញការសាងសង់គម្រោងប្រព័ន្ធប្រព្រឹត្តកម្មទឹកកខ្វក់ និងពង្រីកវិសាលភាពតំបន់គ្របដណ្តប់បណ្តាញលូ” ភ្នំពេញ ៖ ថ្ងៃទី២២ ខែកក្កដា ឆ្នាំ២០២៤ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំទ្វេភាគីលើកទី៦ កម្រិតថ្នាក់ដឹកនាំរវាង កម្ពុជា-ជប៉ុន ពិភាក្សាលើកិច្ចសហប្រតិបត្តិការបច្ចេកទេសលើការងារប្រព័ន្ធលូទឹកកខ្វក់ ជាមួយក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន ដោយមានអ្នកចូលរួមប្រមាណ ៥០នាក់។ កិច្ចប្រជុំនេះមានការអញ្ជើញចូលរួមពី ពីខាងភាគីជប៉ុន រួមមាន ឯកឧត្តម MASUBARA Hidenori ជំនួយការឯកឧត្តមអនុរដ្ឋមន្ត្រី និងជាលេខាផ្ទាល់ឯកឧត្តមរដ្ឋមន្ត្រីនៃក្រសួងដែនដី ហេដ្ឋារចនាសម្ព័ន្ធដឹកជញ្ជូន និងទេសចរណ៍ (MLIT) នៃប្រទេសជប៉ុន ឯកឧត្តម KURBAYASHI Takanori ជាលេខាទី១ ស្ថានទូតជប៉ុនប្រចាំនៅកម្ពុជា កញ្ញា MIURA Yoshiko តំណាងជាន់ខ្ពស់នៃការិយាល័យ JICA ប្រចាំនៅកម្ពុជា ឯកឧត្តម ឯក ឃុនដឿន អភិបាលរងនៃគណអភិបាលរាជធានីភ្នំពេញ តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងមហាផ្ទៃ តំណាងក្រសួងបរិស្ថាន តំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង ឯកឧត្តមអនុរដ្ឋលេខាធិការទទួលបន្ទុក ឯកឧត្តមអគ្គនាយក ថ្នាក់ដឹកនាំ មន្ត្រីរាជការ នៃអគ្គនាយកដ្ឋានប្រព័ន្ធចម្រោះទឹកកខ្វក់ ព្រមទាំងមន្ត្រីរាជការមកពីមន្ទីរសាធារណការ និងដឹកជញ្ជូន រាជធានី-ខេត្ត ផងដែរ។ កិច្ចប្រជុំនេះរៀបចំឡើងជាទៀងទាត់ប្រចាំឆ្នាំក្នុងគោលបំណងបង្ហាញសមិទ្ធផលនៃកិច្ចសហប្រតិបត្តិការបច្ចេកទេសក្រោយបានចុះអនុស្សរណៈនៃកិច្ចសហប្រតិបត្តិការ (MOC) ជាមួយគ្នាតាំងពីឆ្នាំ២០១៨ និងដើម្បីពិភាក្សាលើគម្រោងគាំទ្រអនុវត្តកន្លងមក រហូតដល់បច្ចុប្បន្ន របស់ខាងកម្ពុជា ដែលមានការចូលរួមពីដៃគូអភិវឌ្ឍពាក់ព័ន្ធ ក្នុងនោះមានទាំងមិត្តជប៉ុនផងដែរ ។ កិច្ចប្រជុំក៏មានការចែករំលែកនូវបទពិសោធន៍ការអនុវត្តកិច្ចការងារអំពី វិស័យប្រព័ន្ធលូ និងប្រព័ន្ធទឹកកខ្វក់ រវាងប្រទេសទាំងពីរ ក្នុងធ្វើឱ្យមានភាពកាន់តែប្រសើរឡើងលើការគ្រប់គ្រងកិច្ចការងារខាងប្រព័ន្ធលូទឹកកខ្វក់នៅកម្ពុជា ឱ្យកាន់តែមានប្រសិទ្ធភាពខ្ពស់ លើកកម្ពស់បរិស្ថានទឹកនៅតាមតំបន់ទីប្រជុំជននានា បន្តបង្កើនចំណងមិត្តភាពរវាងដៃគូអភិវឌ្ឍន៍ពីមិត្តជប៉ុន មកជួយដល់កម្ពុជាបន្ថែមទៀត ជាពិសេសលើគម្រោងអភិវឌ្ឍន៍វិស័យប្រព័ន្ធលូ និងប្រព័ន្ធទឹកកខ្វក់នៅកម្ពុជា នាពេលបច្ចុប្បន្ន និងទៅថ្ងៃខាងមុខ៕