(សង្គម)៖ ថ្មីៗនេះមានការភ្ញាក់ផ្អើលក្រោយពីបានឃើញវីដេអូមួយដែលបានបង្ហាញឱ្យឃើញរថយន្តមួយគ្រឿងបានព្រហើនហ៊ានបើកបរបញ្រ្ចាសទិសចរាចរណ៍ នៅលើផ្លូវល្បឿនឡើន។ ជាក់ស្ដែងយោងតាមគណនីឈ្មោះ បង តោ បានបង្ហោះវីដេអូមួយដែលយកចេញពីកាមេរ៉ាសុវត្តភាពឡាននោះ ព្រមទាំងអមមកជាមួយខ្លឹមសារថា «02/07/2024ផ្លូវល្បឿនលឿន បុរាណនិយាយថាកុំទុកចិត្តមនុស្សក្បាលខ្មៅតែម្ចាស់ឡានសនេះមិនដឹងក្បាលពណ៍អីទេលោកព្រះ ព្រលឹងចង់ចេញទៅហូបប្រលិតហើយ»។ តាមរយៈវីដេអូខាងលើដែលបានបង្ហោះចេញទៅនោះផងដែរឃើញមានអ្នកប្រើប្រាស់បណ្ដាញសង្គមជាច្រើនបានចូលទៅរិះគន់ និងបង្ហាញអារម្មណ៍ហួសចិត្តទៅកាន់អ្នកបររថយន្តមួយនោះដែលព្រហើននិងក្លាហានដូច្នេះ ហើយខ្លះទៀតក៏បានលើកឡើងឌឺដងថា បើគេសួរប្រាប់ថាថៃទៅ។ ក្នុងនោះក៏ឃើញមានអ្នក សំណូមពរឱ្យសមត្តកិច្ចស្វែងរកមុខអ្នកបើកបរដើម្បីពិន័យនិងណែនាំកុំឱ្យខាន ព្រោះថាបើបន្តតែបែបនេះពិតជាអាចនាំឱ្យមានគ្រោះថ្នាក់ដល់អ្នកដំណើរដទៃជាក់ជាពុំខាន។ យ៉ាងណាមិញក្រោយពីបានឃើញមានការចែកចាយនូវវីដេអូនេះយ៉ាងព្រោងព្រាតហើយនោះ នៅព្រឹក ថ្ងៃទី០២ ខែកក្កដា ឆ្នាំ២០២៤ នៅវេលាម៉ោង ៧៖០០នាទី កម្លាំងប្រចាំការលើផ្លូវល្បឿនលឿន បានធ្វើការឃាត់រថយន្ត ១គ្រឿងម៉ាក TOYOTA CAMRY ពណ៌ស ពាក់ផ្លាកលេខ ភ្នំពេញ2T ដែលគេដឹងថាជារថយន្តបានបើកបរបញ្រ្ចាសទិសចរាចរណ៍ នៅចំនុច K28 ទិសដៅ ព្រះសីហនុ-ភ្នំពេញ។ បន្ទាប់ពីបានឃាត់សួរនាំ និងពន្យល់ពីហានិភ័យដែលអាចបង្កជាគ្រោះថ្នាក់ចរាចរណ៍ធ្ងន់ធ្ងរ ដោយសារការបើកបរបញ្រ្ចាសទិសចរាចរណ៍ អ្នកបើកបរបានយល់ពីកំហុស ដោយបានធ្វើកិច្ចសន្យាជាមួយសមត្ថកិច្ច និងទទួលយកការពិន័យទៅតាមច្បាប់ស្តីពីចរាចរណ៍ផ្លូវគោក នៃព្រះរាជាណាចក្រកម្ពុជា៕