សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសនៅព្រឹកថ្ងៃទី៦ ខែមិថុនា ឆ្នាំ២០២៤ជាចំហរថា ការដ្ឋានសាងសង់ព្រែកជីកហ្វូណន តេជោ ដែលមានតម្លៃប្រមាណជា១.៧០០លានដុល្លារនឹងបើកជាផ្លូវការនៅថ្ងៃទី០៥ ខែសីហា ឆ្នាំ២០២៤ ខាងមុខនេះ ។ សម្តេចធិបតីបានបញ្ជាក់ ក្នុងពិធីសម្ពោធដាក់ឱ្យប្រើប្រាស់កំពង់ផែពហុបំណងកំពត តម្លៃ១៤០លានដុល្លារថា ព្រែកជីកនេះនឹងចូលរួមគ្នាវិនិយោគដោយក្រុមហ៊ុនសាធារណៈរបស់រដ្ឋ និងក្រុមហ៊ុនឯកជន ហើយសហការគ្នាមួយនឹងក្រុមហ៊ុនបរទេស តាមរូបមន្តកិច្ចសន្យាសាងសង់-ប្រតិបត្តិ-ផ្ទេរ (BoT)។សម្តេចធិបតីបានបញ្ជាក់ថា «កំពង់ផែស្វ័យយ័តខេត្តព្រះសីហនុ និងកំពង់ផែស្វ័យយ័តភ្នំពេញ នឹងរួមគ្នាជាមួយនឹងក្រុមហ៊ុនឯកជនកាន់កាប់ភាគហ៊ុន៥១ភាគរយ សហការជាមួយនឹងក្រុមហ៊ុនបរទេស ។ គម្រោងនេះគឺខ្មែរជាអ្នកកាន់កាប់ភាគហ៊ុនធំ »។ គម្រោងព្រែកជីកហ្វូណនតេជោ ត្រូវបានដាក់ចេញក្រោយពេលដែលអ្នកជំនាញជាតិ និងអន្តរ ជាតិប្រមាណជា៥០នាក់ បានធ្វើការសិក្សាប្រមាណជា២៦ខែ។ គម្រោងនេះ មានប្រវែងសរុបប្រមាណ១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គឆ្លងកាត់តាមព្រែកតាឯកនៃទន្លេ បាសាក់ ចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រ ខេត្តកែប ដោយឆ្លងកាត់ខេត្ត៤រួមមាន៖ ខេត្តកណ្តាល តាកែវ កំពត និងខេត្តកែប ដែលមានប្រជាជនសរុបប្រមាណ ១,៦លាននាក់ រស់នៅអមសងខាងផ្លូវទឹកនេះ។ព្រែកជីកនេះ មានទទឹងមុខកាត់ផ្នែកខាងលើ ប្រវែង ១០០ម៉ែត្រ និងមុខកាត់ផ្នែកខាងក្រោម ប្រមាណ៨០ម៉ែត្រ និងជម្រៅទឹកប្រមាណ៥,៤ម៉ែត្រ មានគន្លងនាវាចរណ៍ចំនួន២គន្លង អាចចេញ-ចូល និងចៀសគ្នាបានដោយសុវត្ថិភាព ៕