ពិធីប្រកាសសមាសភាពមន្រ្តីស្ថានីយជញ្ជីង ដើម្បីជំរុញការទប់ស្កាត់ការដឹកជញ្ជូនលើសទម្ងន់កម្រិតកំណត់ឱ្យកាន់តែមានប្រសិទ្ធភាព នាថ្ងៃទី១៦ ខែឧសភា ឆ្នាំ២០២៣ ឯកឧត្តម សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ អមដំណើរដោយ ឯកឧត្តម ម៉ី ម៉ារ៉ាឌី អនុរដ្ឋលេខាធិការទទួលបន្ទុក លោកប្រធាននាយកដ្ឋានបុគ្គលិក លោកប្រធានលេខាធិការដ្ឋាន និងប្រធានមន្ទីរសាធារណការ និងដឹកជញ្ជូនខេត្តពោធិ៍សាត់ បានអញ្ជើញជាអធិបតីក្នុងពិធីប្រកាសសមាសភាពប្រធានស្ថានីយឃ្លាំងមឿង ខេត្តពោធិ៍សាត់។ ការតែងតាំងប្រធានស្ថានីយថ្មី ធ្វើឡើងបន្ទាប់ពីអតីតប្រធានស្ថានីយ ដែលត្រូវបានចូលនិវត្តន៍ និងក្នុងគោល ពង្រឹងប្រសិទ្ធភាពនៃការអនុវត្តការងារ ការផ្លាស់ប្តូរបទពិសោធន៍ការងារលើការទប់ស្កាត់ការដឹកជញ្ជូនលើសទម្ងន់កម្រិតកំណត់ឱ្យកាន់តែមានប្រសិទ្ធភាព។ ថ្លែងក្នុងអង្គពិធី ឯកឧត្តមប្រធាន បានកោតសរសើរដល់ការដឹកនាំរបស់អតីតប្រធានស្ថានីយ ដែលបានយកចិត្តទុកដាក់ និងអនុវត្តការងារទប់ស្កាត់ការងារដឹកជញ្ជូនលើសទម្ងន់កម្រិតកំណត់កន្លងមក។ ទន្ទឹមនឹងនេះ ឯកឧត្តមប្រធានជំរុញឱ្យគ្រប់មន្ត្រី និងកងកម្លាំងប្រចាំការនៅស្ថានីយ ត្រូវយកចិត្តទុកដាក់បន្ថែម ពង្រឹងការងារត្រួតពិនិត្យយានយន្ដឱ្យបានហ្មត់ចត់ និងច្បាស់លាស់ ព្រមទាំងចេះសហការគ្នាក្នុងការអនុវត្តការងារឱ្យកាន់តែមានប្រសិទ្ធភាពខ្ពស់។ គួរបញ្ជាក់ផងដែរថា កន្លងមកគណៈកម្មាធិការសម្របសម្រួលអចិន្ត្រៃយ៍នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ក៏បានធ្វើការផ្លាស់ប្តូរសមាសភាពមន្រ្តីនៅតាមស្ថានីយមួយចំនួនផងដែរ ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube