កិច្ចប្រជុំបូកសរុបស្តីពី ការត្រួតពិនិត្យគោលនយោបាយពាណិជ្ជកម្មកម្ពុជា ក្រោមក្របខ័ណ្ឌអង្គការពាណិជ្ជកម្មពិភពលោក (គ.គ.ព.) ពាក់ព័ន្ធនឹងវិស័យសាធារណការ និងដឹកជញ្ជូន ទីស្ដីការក្រសួង៖នាថ្ងៃចន្ទ ទី១ ខែមេសា ឆ្នាំ២០២៤ ឯកឧត្តម ឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំបូកសរុបស្តីពី ការត្រួតពិនិត្យគោលនយោបាយពាណិជ្ជកម្មកម្ពុជា ក្រោមក្របខ័ណ្ឌអង្គការពាណិជ្ជកម្មពិភពលោក (គ.គ.ព.) ពាក់ព័ន្ធនឹងវិស័យសាធារណការ និងដឹកជញ្ជូន ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធផងដែរ។ កិច្ចប្រជុំនេះធ្វើឡើងក្នុងគោលបំណងបូកសរុបនូវធាតុចូលពីអគ្គនាយកដ្ឋាន នាយកដ្ឋាន និងអង្គភាពពាក់ព័ន្ធ បន្ទាប់ពីកិច្ចប្រជុំលើកទី១ ដែលបានប្រព្រឹត្តកាលពីថ្ងៃទី២២ ខែមីនា ឆ្នាំ២០២៤ ដើម្បី៖ (១) បំពេញសំណួរ និងផ្តល់នូវឯកសារ និងទិន្នន័យពាក់ព័ន្ធដល់វឌ្ឍនភាព ការរីកចម្រីន និងបញ្ហាប្រឈមរបស់វិស័យសាធារណការ និងដឹកជញ្ជូនកន្លងមក ក្នុងចន្លោះពេលអនុវត្តឆ្នាំ២០១៧-២០២៥ (២)ធ្វើបច្ចុប្បន្នភាព និងរៀបចំរបាយការណ៍ពិនិត្យមើលឡើងវិញគោលនយោបាយពាណិជ្ជកម្ម និងវឌ្ឍនភាពពាក់ព័ន្ធនឹងវិស័យសាធារណការ និងដឹកជញ្ជូន ដែលជាឯកសារជំហររបស់រាជរដ្ឋាភិបាលកម្ពុជា និង(៣) ត្រៀមខ្លួនសម្រាប់កិច្ចប្រជុំជាមួយប្រតិភូអង្គការពាណិជ្ជកម្ម (គ.ត.ព.) និងឆ្លើយតបនឹងសំណួរ (ប្រសិនបើមាន) ក្នុងអំឡុងខែឧសភា ឆ្នាំ២០២៤ ខាងមុខនេះ។ មុននឹងបិទបញ្ចប់ ឯកឧត្ដមរដ្ឋលេខាធិការ និងជាប្រធានអង្គប្រជុំក៏បានផ្ដាំផ្ញើដល់អគ្គនាយកដ្ឋាន និងនាយកដ្ឋានពាក់ព័ន្ធទាំងអស់ឱ្យពិនិត្យមើលឡើងវិញនូវការសន្យារបស់កម្ពុជាជាមួយនឹងអង្គការពាណិជ្ជកម្មពិភពលោក ដើម្បីជំរុញការងារដែលនៅសេសសល់ ឱ្យសម្រេចបាន និងអាចដាក់ឱ្យអនុវត្តដោយប្រសិទ្ធភាពក្នុងពេលឆាប់ៗនេះ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube