កិច្ចប្រជុំពិភាក្សាលើការងារបច្ចេកទេស និងពិនិត្យលើចំណុចដែលអាចជាកត្តាប្រឈមដល់គម្រោងសាងសង់ស្ពានមិត្តភាពកម្ពុជា-កូរ៉េ ទីស្តីការក្រសួង៖ នាថ្ងៃពុធ ទី២០ ខែមីនា ឆ្នាំ២០២៤ ឯកឧត្តម សូរ វ៉ិចទ័រ រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានសម្របសម្រួលគម្រោង បានដឹកនាំកិច្ចប្រជុំពិភាក្សាលើការងារបច្ចេកទេស និងពិនិត្យលើចំណុចដែលអាចជាកត្តាប្រឈមដល់គម្រោងសាងសង់ស្ពានមិត្តភាពកម្ពុជា-កូរ៉េ ដោយមានការចូលរួមពី ឯកឧត្តមជាថ្នាក់ដឹកនាំក្រសួង តំណាងអគ្គនាយកដ្ឋានដោះស្រាយផលប៉ះពាល់ នៃក្រសួងសេដ្ឋកិច្ច និងហិរញ្ញវត្ថុ តំណាងសាលារាជធានីភ្នំពេញ តំណាងក្រុមហ៊ុនអ៊ីឌីស៊ីជូតា ខេមបូឌា និងមន្ត្រីពាក់ព័ន្ធ ជាសមាជិកគម្រោងសាងសង់ស្ពានមិត្តភាពកម្ពុជា-កូរ៉េ ផងដែរ។ អង្គប្រជុំបានបន្តពិភាក្សាយ៉ាងផុសផុល ដោយបានលើកឡើងនូវសំណូមពរ និងដំណោះស្រាយមួយចំនួនរួមមានៈ កំណត់កាលបរិច្ឆេទជាក់លាក់ក្នុងការជ្រើសរើសទីប្រឹក្សាបច្ចេកទេសសិក្សាលម្អិតគម្រោងសាងសង់ស្ពាន និងការសហការគ្នារវាងក្រសួង និងក្រុមហ៊ុន ព្រមទាំងភាគីពាក់ព័ន្ធ ដោយក្នុងនោះដែរក្រុមហ៊ុនក៏យល់ស្របផ្តល់ជូនមកក្រសួងនូវប្លង់សិក្សាលម្អិតការសាងសង់ចំណតរថយន្តក្រោមដី ដើម្បីបានជាធាតុចូលសម្រាប់ទីប្រឹក្សាបច្ចេកទេស ធ្វើការសិក្សាលម្អិតគម្រោងស្ពាននេះ សំដៅបង្កើនប្រសិទ្ធភាព និងបញ្ចៀសបានកត្តាដែលអាចប្រឈមដល់គម្រោង។ ជាលទ្ធផល កិច្ចប្រជុំសម្រេចដាក់ចេញកាលវិភាគការងារសម្រាប់បញ្ចប់ការសិក្សាហេតុប៉ះពាល់ និងទទួលបានធាតុចូលសម្រាប់បន្តការសិក្សាលម្អិតបរិស្ថាន និងសង្គមបន្ថែមទៀត ដែលនឹងសម្រួលដល់ការសិក្សាគ្រប់ជ្រុងជ្រោយ និងទទួលបានលទ្ធផលល្អប្រសើរ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube